Sams 130 - Pijin Bible

(Toktok go long God.)

^1-3 Lod Yawe, yu nao yu Masta blong mi. Taem mi kol go long yu, plis yu helpem mi. Olketa trabol wea hemi kasem mi, hemi mekem tingting blong mi fo barava wikdaon. ?Sapos yu raetemdaon olketa sin blong mifala, hu nao save ranawe from panis blong yu?

⁴ Bat yu fogivim nomoa olketa sin blong mifala mekem mifala save mekhae long yu an wosipim yu.

(Toktok go long olketa pipol.)

^5-6 Mi we-weit nomoa fo Yawe, bikos mi laekem tumas fo hemi helpem mi. An hem nao mi trastem olowe wanem hemi talem. Mi laekem tumas Masta blong mi, winim wei wea gad long naet hemi laekem tumas fo hemi delaet kuiktaem. Ya, mi barava laekem hem fo kam winim wei wea gad long naet hemi laekem moning fo kam.

⁷ Yumi olketa pipol blong Israel, yumi mas trastem Yawe, bikos lav blong hem fo yumi hemi bikfala tumas olowe, an oltaem hemi laekem tumas fo sevem yumi.

⁸ Ya, bae hemi sevem yumi olketa pipol blong hem long Israel from evri sin blong yumi. (Olketa singim disfala singsing taem olketa goap fo fist long Jerusalem.)