Sams 129 - Pijin Bible

(Toktok go long olketa pipol.)

¹ !Pipol long Israel, yufala talem kam! ?Stat long taem wea olketa olo blong yumi i bin slev long Ijip ka-kam kasem tude, hao nao olketa enemi blong yumi i bin spoelem yumi?

(Olketa pipol i givim ansa.)

² Stat long taem ya ka-kam kasem tude, olketa enemi blong yumi i bin ronem yumi an spoelem yumi, bat olketa nating winim yumi nomoa.

³ Olketa bin wipim baeksaet blong yumi wetem wanfala wip nogud, go-go hemi garekil fogud an skin hemi brek nogud.

⁴ Bat Yawe hu hemi stret fogud, hemi mekem yumi fri finis from olketa enemi blong yumi.

(Toktok go long God.)

⁵ Hemi gud tumas sapos yu ronemaot evriwan hu i heitem Saeon, fo mekem olketa sem fogud.

^6-7 Hemi gud tumas sapos yu mekem olketa fo kamap olsem gras wea hemi grou nomoa antap long ston, an hemi no fitim fo eniwan fo katem hem fo yusim. Hemi laef fo lelebet taem nomoa den hemi dae nao.

⁸ Hemi gud tumas sapos evriwan hu i gopas i nating talem eni blesing olsem long olketa enemi ya, “Bae Yawe hemi blesim yufala, an mifala blesim yufala long nem blong hem.” (Olketa singim disfala singsing taem olketa goap fo fist long Jerusalem.)