Sams 128 - Pijin Bible

(Toktok go long olketa pipol.)

¹ Olketa pipol hu i tinghae long Yawe, an falom olketa strongfala toktok blong hem, olketa ya nao i hapi.

² Sapos yu gohed fo duim olsem, bae waka blong yu hemi save helpem yu, an bae yu garem gudfala laef an yu hapi olowe.

³ Waef blong yu bae hemi garem plande pikinini, olsem grep tri wea hemi garem plande frut long hem, an olketa pikinini ya bae i stap raonem tebol blong yu olsem olketa smolfala oliv tri wea i grou raonem botom blong tri.

⁴ An long wei ya nao, bae Yawe hemi blesim man hu hemi falom an obeim hem olowe.

⁵ Hemi gud tumas sapos Yawe hemi stap long Saeon, an hemi blesim yufala. Ya, hemi gud tumas sapos yufala lukim evrisamting long Jerusalem i kamap gudfala, evride long laef blong yufala.

⁶ Hemi gud tumas sapos yufala laef go-go yufala lukim olketa smolfala grani blong yufala. Hemi gud tumas sapos yumi pipol long Israel i garem gudfala laef. (Olketa singim disfala singsing taem olketa goap fo fist long Jerusalem.)