Sams 125 - Pijin Bible

(Toktok go long olketa pipol.)

¹ Olketa pipol hu i trastem Yawe, olketa i olsem maonten long Saeon wea olketa enemi no save spoelem olketa long faet.

² Hem nao Yawe hemi gadem olketa pipol blong hem olowe nao, olsem olketa maonten i stap raonem Jerusalem.

³ Olketa nogud pipol i no save rul fo longtaem long kantri blong yumi olketa pipol hu i trastem God. Sapos olketa duim olsem, maet yumi tu bae i falom nogud wei blong olketa ya.

(Toktok go long God.)

⁴ Lod Yawe, plis yu givim olketa gudfala samting long olketa gudfala pipol hu i obeim olketa strongfala toktok blong yu.

⁵ Bat taem yu panisim olketa nogud pipol ya, plis yu panisim tu olketa hu i lusim olketa gudfala wei blong yu. Lod Yawe, hemi gud tumas sapos yu mekem mifala long Israel fo garem gudfala laef. (Olketa singim disfala singsing taem olketa goap fo fist long Jerusalem.)