Sams 122 - Pijin Bible

(Toktok go long olketa pipol.)

¹ Mi barava hapi tumas taem olketa pipol i tok olsem long mi, “Yumi go long Tambuhaos blong Yawe.”

(Toktok go long Jerusalem, ples wea Tambuhaos blong God hemi stap long hem.)

² !Jerusalem! Distaem mifala stanap nao insaet long geit long bikfala wolston blong yu nao.

(Toktok go long olketa pipol.)

³ Biktaon ya long Jerusalem, olketa wakembaek gudfala tumas. An evrisamting long hem i stret an barava luknaes fogud.

⁴ Hem ya nao ples wea yumi olketa pipol blong Yawe i kam fo tengkiu long hem, olsem hemi bin talem.

⁵ Long hia long Jerusalem nao, oltaem olketa king blong laen blong Deved i gohed fo mekem kot fo jajem yumi.

⁶ Yumi mas prea fo olketa pipol long Jerusalem mekem olketa save garem piis. Ya, yumi mas prea olsem, “Lod Yawe, hemi gud tumas sapos yu mekem olketa hu i lavem yu fo stap gudfala.

⁷ Hemi gud tumas sapos evri pipol long taon ya i garem gudfala laef, an olketa bikman long ples ya fo stap gudfala.”

(Toktok go moa long Jerusalem.)

⁸ Jerusalem, bikos mi tingim tumas olketa wantok blong mi wea i stap long yu, hem nao hemi gud tumas sapos yu garem piis.

⁹ An bikos Tambuhaos blong Yawe hu hemi God blong mifala, hemi stap long yu, hem nao, mi laekem tumas fo yu stap gudfala olowe. (Olketa singim disfala singsing taem olketa goap fo fist long Jerusalem.)