Sams 116 - Pijin Bible

Tengkiu long God bikos hemi sevem man from dae (Toktok go long olketa pipol.)

¹ Mi lavem Yawe tumas, bikos hemi lisin long prea blong mi. Ya, hemi herem olketa prea blong mi.

² Oltaem long laef blong mi bae mi prea long hem bikos hemi herem mi.

³ Mi kolsap dae nao taem bikfala trabol hemi bin kasem mi. Dastawe nao mi barava fraet tumas an mi wari fogud.

⁴ Nao mi kol go long Yawe olsem, “Lod Yawe, plis yu sevem mi.”

⁵ Yawe hu hemi God blong yumi hemi gud tumas. Ya, hemi kaen an hemi save sore long olketa pipol.

⁶ Hemi gohed fo gadem olketa hu i wik. Ya, hemi sevem mi taem trabol hemi kasem mi.

⁷ An distaem mi save hapi moa, bikos Yawe hemi bin gud tumas long mi.

⁸ Yawe hemi bin sevem mi from dae. Dastawe nao mi no krae moa. Ya, hemi kipim mi from dae.

⁹ Hem nao mi gohed fo falom wei blong hem long disfala wol.

^10-11 Mi gohed fo biliv strong long yu nomata mi barava safa tumas. Ya, mi gohed fo biliv strong long yu nomata mi fraet an mi no save trastem eniwan.

¹² ?Wanem nao bae mi ofarem go long Yawe fo olketa gudfala samting wea hemi bin duim fo mi?

¹³ Bae mi ofarem go waen long hem fo talem tengkiu long hem bikos hemi sevem mi.

¹⁴ Long ae blong olketa pipol blong Yawe hu i hipap fo wosipim hem, bae mi givim evrisamting wea mi bin promisim long hem.

(Toktok go long God.)

¹⁵ Lod Yawe, yu barava sore tumas taem wanfala long olketa pipol hu i tinghevi long yu hemi dae.

¹⁶ Lod Yawe, mi wakaman blong yu olsem mami blong mi bifoa. Yu nao yu bin sevem mi from dae.

¹⁷ Bae mi mekem sakrifaes fo tengkiu long yu. Ya, bae mi prea fo tengkiu long yu.

^18-19 Long ae blong olketa pipol blong yu hu i hipap fo wosipim yu long Tambuhaos blong yu long Jerusalem, bae mi givim evrisamting wea mi bin promisim. !Yumi preisim Yawe!