Sams 115 - Pijin Bible

Yawe nao hemi tru God (Toktok go long God.)

¹ Lod Yawe, yu nomoa, mifala mas mekhae long yu. bikos oltaem yu lavem mifala tumas, an oltaem yu kipim olketa promis blong yu long mifala.

(Toktok go long olketa pipol.)

² Olketa narafala kantri i askem yumi olsem, “?Wea nao God blong yufala?”

³ God blong yumi hemi stap long heven, an hemi garem paoa fo duim evrisamting wea hemi laekem.

⁴ Bat olketa god blong olketa hiden pipol ya, olketa pipol nomoa i wakem long silva an gol.

⁵ Olketa god ya i garem maos, bat olketa nating save toktok. Olketa garem ae, bat olketa nating save lukluk.

⁶ Olketa garem ia, bat olketa nating save herem enisamting. Olketa garem nous, bat olketa nating save smelem enisamting.

⁷ Olketa garem han bat olketa nating save holem enisamting. Olketa garem lek, bat olketa nating save wakabaot. Ya, olketa no save mekem eni noes bikos olketa i no laef.

⁸ Evriwan hu i mekem olketa kaving ya, an evriwan hu i trastem, letem olketa kamap olsem olketa kaving ya.

⁹ Yumi olketa laen blong Israel mas trastem Yawe. Bikos hem nao hemi helpem yumi an hemi gadem yumi.

¹⁰ Yufala olketa prist blong God, yufala mas trastem Yawe. Bikos hem nao hemi helpem yumi an hemi gadem yumi.

¹¹ Yumi evriwan hu i wosipim Yawe mas trastem hem. Bikos hem nao hemi helpem yumi an hemi gadem yumi.

¹² Yawe hemi gohed olowe fo tingim yumi, an bae hemi blesim yumi. Ya, bae hemi blesim yumi olketa Israel pipol an evri prist blong hem.

¹³ Bae hemi blesim evriwan hu i tinghae long hem, nomata wea hemi garem biknem o nomoa.

¹⁴ Hemi gud tumas sapos Yawe hemi givim plande pikinini fo yufala, an fo olketa wea bae i bon kam long laen blong yufala.

¹⁵ Hemi gud tumas sapos Yawe hu hemi mekem heven an disfala wol ya, hemi blesim yufala.

¹⁶ Heven hemi ples blong Yawe, bat wol ya, hemi givim long man.

¹⁷ Olketa hu i dae finis i no save preisim Yawe.

¹⁸ Bat yumi hu i laef, bae yumi talem tengkiu long hem, stat distaem an olowe nao. !Yumi preisim Yawe!