Sams 114 - Pijin Bible

Singsing long Fist blong Pasova (Toktok go long olketa pipol.)

^1-2 Yumi evriwan i pipol blong Jiuda ya, an yumi olketa traeb blong Israel disfala olo blong yumi ya nao Jekob. Nao taem yumi kamaot from Ijip, God hemi mekem yumi fo kamap pipol blong hem.

³ Taem God hemi kam, Red Si hemi divaed long tufala haf. Ya, an Jodan Riva tu hemi no ran moa.

⁴ Olketa maonten i seksek olsem olketa nanigot wea i fraet. Ya, olketa hil i olsem olketa sipsip wea i ra-ran olobaot bikos olketa fraet tumas.

⁵ ?Red Si, wanem nao hemi mekem yu fo divaed long tufala haf? ?Jodan Riva, wanem nao hemi mekem yu fo no ran moa?

⁶ ?Olketa maonten, wanem nao hemi mekem yufala fo seksek olsem olketa nanigot ya? ?Olketa hil, wanem nao hemi mekem yufala olsem olketa sipsip wea i ja-jam olobaot ya?

^7-8 Taem God hu Jekob hemi wosipim hemi kam, graon ya hemi seksek. Hemi mekem wata fo kamaot from ston. Ya, taem Yawe hemi kam hemi mekem springwata tu fo kamaot from had ston.