Sams 113 - Pijin Bible

Singsing fo preisim God fo gudfala wei blong hem (Toktok go long olketa pipol.)

¹ !Yumi preisim Yawe! Ya, Yumi evri wakaman blong hem mas preisim nem blong hem.

² Stat distaem bae yumi mas preisim nem blong hem, an bae yumi mas preisim nem blong hem olowe nao.

³ Stat long ist, go kasem long west, yumi evriwan mas preisim nem blong Yawe.

⁴ Hem nao hemi rul ovarem evri pipol long evri kantri. Saen blong paoa blong hem hemi hae tumas winim skae.

⁵ No eniwan hemi olsem Yawe hu hemi God blong yumi. Hemi King, an hemi sidaon long tron blong hem long antap,

⁶ an hemi luk kamdaon long skae an graon fo helpem olketa pipol.

⁷ Hemi helpem olketa hu i pua, an hemi tekem olketa aot from trabol.

⁸ Hemi mekhae long olketa olsem wea olketa i pikinini blong king, an olsem wea olketa i bikman blong olketa pipol blong hem.

⁹ Hemi mekem woman hu hemi no save garem pikinini fo hemi save garem pikinini. Hem nao mekem woman ya fo hemi hapi tumas. !Yumi preisim Yawe!