Sams 112 - Pijin Bible

Gudfala man hemi save hapi (Toktok go long olketa pipol.)

¹ !Yumi preisim Yawe! Eniwan hu hemi gohed fo tinghae long Yawe, an hemi laekem tumas fo obeim olketa toktok blong hem, hem ya nao hemi hapi.

² Bae olketa pikinini blong hem i garem staka gudfala samting long lan wea Yawe hemi bin givim long olketa. An bae Yawe hemi blesim olketa wea i bon kam long laen blong hem.

³ Bae Yawe hemi mekem olketa ris an garem plande gudfala samting. An God hemi talem dat man ya hemi stret olowe.

⁴ Eniwan hu hemi falom olketa gudfala wei an hemi sore long olketa narafala pipol an hemi kaen an hemi stret, hemi olsem laet wea hemi saen bikfala long tudak.

⁵ Eniwan hu hemi wakem bisnis long stretfala wei, an hemi save givim kaon long olketa narafala pipol, hem ya nao hemi hapi.

⁶ Oltaem laef blong gudfala man hemi no save bagarap, an bae olketa pipol i gohed fo tingim olketa gudfala wei blong hem.

⁷ Disfala man ya hemi no save fraetem eni badnius wea bae kasem hem, bikos hemi trastem Yawe, an oltaem biliv blong hem hemi strong nomoa long Yawe.

⁸ Hemi no save wari o fraet, bikos hemi save dat bae olketa enemi blong hem i barava lus.

⁹ Hemi gohed fo helpem olketa pua pipol, an olketa gudfala wei blong hem bae hemi stap olowe. God hemi talem dat man ya hemi stret olowe, an bae olketa pipol i tinghae long hem.

¹⁰ Bat taem olketa nogud pipol i lukim wei blong gudfala man ya, olketa kros tumas. Olketa heitem man ya, so olketa lus nao. Ya, wanem olketa nogud pipol i laekem hemi no save kamap gudfala.