Sams 111 - Pijin Bible

Singsing fo preisim God (Toktok go long olketa pipol.)

¹ !Yumi preisim Yawe! Long ful laef blong mi bae mi talem tengkiu long Yawe long ae blong olketa pipol hu i hipap fo wosipim hem.

² Evrisamting wea Yawe hemi duim hemi barava gud tumas, an evriwan hu i hapi tumas long evrisamting ya, olketa laekem tumas fo savegud moa long olketa samting ya.

³ Evrisamting wea hemi duim hemi liftimap nem blong hem, an olketa somaot paoa blong hem wea hemi King. An bae stretfala wei blong hem hemi stap olowe nao.

⁴ Yawe hemi laekem yumi fo tingabaotem olketa bikfala waka wea hemi duim, mekem yumi save dat hemi kaen tumas, an hemi save sore long yumi.

⁵ Hemi gohed fo givim kaikai long olketa wea i tinghae long hem, bikos hemi no save fogetem agrimen wea hemi mekem wetem yumi olketa pipol blong hem.

⁶ Hemi somaot paoa blong hem long yumi long wei wea hemi givim yumi disfala kantri ya wea hemi blong olketa narafala pipol.

⁷ Evrisamting wea hemi duim hemi stret an hemi somaot dat hemi barava kipim promis blong hem. An yumi save trastem olketa gudfala toktok blong hem.

⁸ Olketa gudfala toktok ya i barava tru an stret fogud, an bae olketa ya i stap evritaem olowe nao.

⁹ Hemi sevem yumi olketa pipol blong hem an hemi mekem disfala agrimen wetem yumi wea bae hemi no save finis. !Yawe hemi holi, an hemi garem evri paoa!

¹⁰ Eniwan hu hemi laek fo kamap waes hemi mas tinghevi long Yawe. Ya, hemi givim gudfala tingting long olketa hu i obeim olketa gudfala toktok blong hem. Yumi mas preisim hem olowe.