Sams 108 - Pijin Bible

(Toktok go long God.)

¹ !God, oltaem tingting blong mi hemi stap strong long yu! !So bae mi singsing an preisim yu! !Distaem mi mas wekap!

² !Olketa gita blong mi, yufala mas wekap! !Bae mi wekapem san ya!

³ Lod Yawe, bae mi talem tengkiu long yu long ae blong olketa pipol. Ya, bae mi singsing fo preisim yu long ae blong olketa pipol blong olketa narafala kantri.

⁴ Wei blong yu wea oltaem yu lavem olketa pipol tumas, hemi hae fogud. Ya, hemi hae go kasem antap long skae. Wei blong yu wea oltaem yu gohed fo kipim olketa promis blong yu, hemi hae tumas. Ya, hemi hae go kasem antap long olketa klaod.

⁵ God yu nao yu hae winim skae, an bikfala paoa blong yu hemi kasem evri ples long wol.

⁶ Yu lavem mifala tumas, so plis sevem mifala wetem bikfala paoa blong yu, an ansarem kam prea blong mi, mekem mifala stap gudfala.

(Toktok go long olketa pipol.)

⁷ God hemi stap long Tambuhaos blong hem, hemi tok olsem, “Taem mi win, bae mi divaedem lan long Sekem go long olketa pipol blong mi, an bae mi makem olketa haf long vali long Sukot fo givim gobaek long olketa.

⁸ Eria ya long Gilead hemi blong mi, an eria ya long Manase hemi blong mi tu. Eria ya long Efrem hemi olsem hat blong mi fo faet, an eria ya long Jiuda hemi olsem stik blong king wea mi king nao mi holem.

⁹ An bae mi yusim kantri long Moab olsem besin fo wasim fes blong mi, an bae mi torowem go slipa blong mi long kantri long Idom, hem nao fo makemaot wea ples ya hemi blong mi. Mi singaot bikos mi winim kantri ya long Filistia.”

(Toktok go long God.)

¹⁰ ?God, hu nao bae hemi lidim mifala fo go long kantri long Idom? ?Hu nao bae hemi tekem mifala fo go insaet long taon blong olketa ya wea i strong tumas?

¹¹ ?Waswe, hemi tru wea yu lusim mifala finis? ?Waswe, hemi tru wea bae yu no go wetem olketa soldia blong mifala fo faet?

¹² Plis yu helpem mifala fo agensim olketa enemi blong mifala, bikos olketa help wea olketa pipol i save givim long mifala hemi yusles nomoa.

(Toktok go long olketa pipol.)

¹³ Taem God hemi stap wetem yumi, bae yumi save win, bikos bae hemi save winim olketa enemi blong yumi. (Singsing blong Deved.)