Sams 101 - Pijin Bible

(Toktok go long God.)

¹ Lod Yawe, bae mi singim wanfala singsing abaotem wei wea mi laek fo kipim olketa promis blong mi long yu, an wei wea mi laek fo jajem olketa pipol long stretfala wei. Ya, bae mi singim fo preisim yu.

² Mi laekem tumas fo yu kam long mi mekem mi falom wei blong yu wea hemi stret fogud. Long evrisamting wea mi duim fo rulim pipol blong yu, bae mi falom evri wei wea hemi stret long ae blong yu.

³ Mi barava les long olketa nogud samting an mi nating laekem wei blong olketa nogud pipol. Ya, bae mi no joen wetem olketa.

⁴ Bae mi no falom olketa laea wei, an bae mi no fren wetem olketa nogud pipol.

⁵ Bae mi kilim dae eniwan hu hemi tokhaed fo spoelem nem blong narafala man. An bae mi giraotem eniwan hu hemi praod.

⁶ Bat olketa wea i tingting strong long yu, bae i save stap wetem mi. An olketa wea wei blong olketa hemi stret, bae i save waka fo mi.

⁷ Man hu hemi save laea tumas, bae mi no letem fo stap long haos blong mi. Ya, man hu hemi save laea tumas, bae mi no letem fo stap wetem mi tu.

⁸ Lod Yawe, evri de bae mi spoelem finis olketa nogud pipol long kantri blong mifala ya. Ya, bae mi giraotem evriwan hu i duim evri nogud samting from disfala taon blong yu.