Sams 1 - Pijin Bible

BUK WAN ( Sams 1—41 ) Tufala Rod (Toktok go long olketa pipol.)

¹ Olketa wea i no laek fo falom toktok blong olketa nogud pipol, olketa ya nao i hapi. An olketa wea i no laek fo falom wei blong sin, olketa ya nao i hapi. An olketa wea i no laek fo joen wetem olketa wea i gohed fo tokdaonem God, olketa ya nao i hapi.

² Olketa pipol ya i hapi bikos olketa falom Lo blong Yawe, an oltaem olketa gohed fo ridim an tingting long hem evri de an evri naet.

³ Olketa ya i olsem olketa tri wea i grou long gudfala graon wea hemi garem wata. Olketa tri ya i gohed fo garem frut long barava taem blong olketa, an lif blong olketa i no save dae. An long sem wei ya tu, evrisamting wea olketa pipol ya i gohed fo duim i kamap gudfala.

⁴ Bat olketa nogud pipol i nating olsem ya. Olketa nogud pipol ya i olsem nomoa olketa dae lif wea win hemi bloum go.

⁵ Bae God hemi jajem olketa, an bae hemi aotem olketa from olketa gudfala pipol blong hem.

⁶ Olketa nogud pipol ya i go-go fo dae blong olketa nao ya, bat God hemi gohed fo lukaftarem gogo blong olketa gudfala pipol.