Provebs 5 - Pijin Bible

Olketa woning fo no durong

¹ San, herem waes toktok blong mi, an lisin kam gudfala long save blong mi.

² Sapos yu duim olsem, bae yu save falom gudfala tingting, an tok blong yu bae somaot dat yu garem save.

³ Maos blong woman hu hemi laek fo durong hemi suit olsem suga, an kis blong hem hemi naes tumas,

⁴ bat bihaen bae hemi test saoa tumas.

⁵ Bae hemi lidim yu go long ples fo dae.

⁶ Hemi nating save long wei blong laef, an wei blong hem hemi nating stret.

⁷ San, lisin long mi, no fogetem wanem mi talem yu.

⁸ Stap farawe from kaen woman olsem, no go kolsap long haos blong hem.

⁹ Nogud yu lusim gudfala nem blong yu, an nogud yu dae.

¹⁰ Nogud samting wea yu hadwaka long hem, strensa bae kam tekem from yu.

¹¹ Nogud taem yu olo bae yu krae tumas bikos bodi blong yu hemi bon nating.

¹² Nogud bae yu tok olsem, “Mi bin les fo falom stretfala wei, an les long man fo stretem mi.

¹³ Mi nating obeim tisa blong mi o herem olketa tok blong hem.

¹⁴ Mi kamap nogud nao long ae blong evri pipol.”

¹⁵ Waef blong yu hemi olsem springwata, yu mas dring long hem nomoa.

¹⁶ Yu tu yu olsem springwata, no letem nara woman dring long yu.

¹⁷ Letem yutufala nomoa dring long springwata blong yutufala, no letem eniwan moa dring long hem.

¹⁸ Hemi gud fo yu laekem tumas bodi blong waef wea yu maritim fastaem.

¹⁹ Wei wea bodi blong hem ya i muv hemi naes tumas, hem nomoa hemi mekem yu hapi olowe. Holetaet long lav blong hem.

²⁰ San, yu no holetaet long woman fo durong, an yu no hapi long waef blong nara man.

²¹ Yawe hemi lukim evri wei blong man, an hemi luksave long evri rod wea yu go falom.

²² Ravis wei blong ravis man bae trapem hem, hemi olsem rop wea i taengem hem.

²³ Hem no stretem laef blong hem seleva, so bae hemi dae. Krangge wei blong hem nao bae mekem hem go rong.