Provebs 4 - Pijin Bible

Waes Toktok hemi nambawan

¹ !Olketa pikinini! Lisin kam gudfala long olketa tising blong mi, an bae yufala save gudfala.

² Olketa gud samting nao, mi talem long yufala, so yufala no les long olketa.

³ Taem mi nomoa san blong mami an dadi blong mi,

⁴ dadi hemi tisim mi an tok olsem, “San, tingim evrisamting mi talem yu, barava falom an bae yu laef.

⁵ Kasem waes an kasem gudfala save. Yu mas no fogetem tufala, an nating givap long toktok blong mi.

⁶ Yu no les long waes, an bae hemi gadem yu. Laekem hem tumas, an bae hemi helpem yu.

⁷ Waes hemi nambawan, yu mas garem. Nomata gudfala save hemi dia tumas, yu mas garem tu.

⁸ Tinghae long waes toktok, an bae olketa mekhae long yu, holetaet long hem, an bae olketa tinghae long yu.

⁹ Bae hemi olsem naes flaoa raonem nek blong yu, an bae yu garem trufala biknem long hem.”

Gudfala wei an Ravis wei

¹⁰ Pikinini, lisingud long mi, tinghevi long toktok blong mi an bae yu garem longfala laef.

¹¹ Mi tisim yu fo kamap waes, an mi lidim yu long stretfala wei.

¹² Falom an bae yu stret, taem yu ran long hem bae yu no foldaon.

¹³ Holetaet long waes toktok ya, gadem gud, hemi laef blong yu.

¹⁴ No falom nogud wei, an no falom wei blong ravis pipol.

¹⁵ !No falom wei ya! !Yu mas tane go long deferen wei!

¹⁶ Olketa ya no save slip gogo olketa duim eni nogud samting, o spoelem narafala man.

¹⁷ Wei nogud an wei fo faet nao i olsem kaikai an dring blong olketa.

¹⁸ Bat stretfala wei hemi olsem fas laet long moning, hemi gohed fo saen gogo hemi olsem san hemi kamap.

¹⁹ Bat wei blong ravis pipol hemi olsem tudak, olketa nating save nomoa wanem i mekem olketa foldaon.

²⁰ Pikinini, herem gud wanem mi talem, lisin gud long toktok blong mi.

²¹ Yu mas lukluk long hem olowe, an tingting tumas long hem.

²² Savegud long hem, an bae yu laef, an bodi blong yu i save gudbaek.

²³ Kontrolem tingting long haat blong yu, laef blong yu hemi kamaot long hem.

²⁴ No laea olsem konman, talem nomoa trutoktok.

²⁵ Luk stret long gogo blong yu, no luk olobaot.

²⁶ Planem gud wanem yu wande duim, evrisamting bae stret nomoa ya.

²⁷ Yu no tane go long lefsaet o long raetsaet from stretfala wei, bat tane goawe from wei nogud.