Provebs 31 - Pijin Bible

Toktok blong King Lemuel

¹ Olketa waes toktok wea mami blong King Lemuel hemi tisim hem.

² “Pikinini blong mi, yu nao bon kam olsem ansa long prea blong mi.

³ Yu no aftarem olketa woman fo slip wetem olketa, kaen wei hemi spoelem olketa bikman.

⁴ “Lemuel, hemi no stret fo lida hemi spaka, an hemi no stret sapos bikman hemi laekem tumas fo dringim bia.

⁵ Sapos olketa dring nomoa, bae olketa no save tingabaotem lo, an bae olketa no save helpem pua pipol fo garem raet blong olketa.

⁶ Bia hemi blong olketa wea kolsap olketa dae, an waen hem blong olketa hu filnogud long ravis laef blong olketa.

⁷ Kaen pipol save spaka an fogetem ravis laef blong olketa, an no tingim wei wea olketa filnogud tumas.

⁸ “Yu mas toktok fo helpem olketa hu i no save toktok fo olketa seleva. Yu mas sapotem raet blong pipol wea narafala pipol i mekful long olketa.

⁹ Yu mas tok stret taem yu jajem olketa pipol. Yu mas gadem raet blong pua pipol an olketa hu i garem hadtaem.”

Wei blong Nambawan Woman

¹⁰ Hemi had tumas fo faendem nambawan woman fo maritim. Hemi barava gud moa winim enikaen barava spesol ston olsem pel.

¹¹ Hasban blong hem save barava trastem hem, an hemi no sot long enisamting.

¹² Hemi gud tumas long man blong hem olowe, hemi no spoelem hem enitaem.

¹³ Oltaem nomoa hemi bisi tumas, hemi gohed fo wakem enikaen gudfala kaleko.

¹⁴ Oltaem hemi goaot fo lukaotem kaikai an karim kam long haos, hemi olsem sip blong bisnisman wea i karim kam olketa kago.

¹⁵ Hemi save wekap long eli moning fo redim kaikai blong famili blong hem, an fo talemaot waka long olketa haosgele.

¹⁶ Hemi save lukaotem pisgraon fo peim, an hemi wakem plantesin blong grep long hem.

¹⁷ Hemi wanfala strong woman, an hemi gohed fo wakahad oltaem.

¹⁸ Hemi savegud hao fo mekem bisnis blong hem, an plande taem, hemi waka long naet.

¹⁹ Oltaem hemi yusim save blong hem fo wakem olketa kaleko.

²⁰ Hemi kaen tumas long pua pipol, an hemi helpem pipol hu i garem hadtaem.

²¹ Long taem fo tukol, hemi no save wari, bikos famili blong hem i garem olketa nambawan kaleko.

²² Hemi wakem olketa gudfala sitbed fo dekoretem bed, an kaleko blong hem hemi nambawan papol kaleko.

²³ Hasban blong hem, olketa man i tinghae long hem, an hemi bikman long ples blong olketa.

²⁴ Woman olsem, hemi wakem olketa gudfala kaleko, an hemi salem long olketa bisnisman.

²⁵ Pipol tinghae an tinghevi long hem. Hemi no fraet long olketa samting wea bae kasem laef blong hem.

²⁶ Hemi save talem olketa waes toktok, an olketa save trastem gudfala toktok blong hem.

²⁷ Oltaem nomoa hemi bisi, an hemi barava lukaftarem famili blong hem.

²⁸ Olketa pikinini blong hem tokhapi long hem, an hasban blong hem hemi tokhae long hem tu.

²⁹ Hasban blong hem hemi sei, “Plande woman i gud, bat yu nambawan winim olketa evriwan.”

³⁰ Samfala woman i naes, bat hemi laea nomoa, samfala woman luknaes, bat lelebet taem nomoa an hem finis. Bat woman hu hemi tinghae long Yawe, hemi stret fo tokhae long hem.

³¹ Olketa mas tinghae long diskaen woman fo nambawan wei blong hem. An hemi stret fo evriwan i tokhae long hem from waka blong hem.