Provebs 3 - Pijin Bible

Toktok fo helpem olketa yanga

¹ San blong mi, tingim olketa tising blong mi, an no fogetem olketa toktok blong mi.

² Sapos yu duim olsem, bae yu no sot long enisamting an bae yu garem longfala laef.

³ No lusim wei fo lavem pipol, an kaen long olketa olowe. Somaot long laef blong yu olsem wanfala nekles, kipim insaet long haat blong yu.

⁴ Sapos yu duim olsem, bae God hemi hapi long yu, an pipol tu bae hapi long yu.

⁵ Trastem Yawe long ful haat blong yu. Yu no dipen nomoa long save blong yu seleva.

⁶ Tingim Yawe long evrisamting, an bae hemi stretem rod blong yu.

⁷ Yu no tingim yu seleva nao waes, tinghae long Yawe an tanem baeksaet long evri nogud samting.

⁸ Sapos yu duim olsem, bae yu helti, an yu save filgud.

⁹ Mekhae long Yawe long wei wea yu givim go fas kaikai from gaden blong yu long hem.

¹⁰ Sapos yu duim olsem, bae yu garem plande kaikai fo kipim, an bae yu garem staka waen.

¹¹ San blong mi, yu no les long strongfala toktok blong Yawe, yu no taet long wei wea hemi stretem yu.

¹² Olsem dadi hemi lavem san blong hem, Yawe hemi stretem eniwan hu hemi lavem.

¹³ Man hu hemi faendem save an hu hemi garem waes, hem nao hemi hapi.

¹⁴ Waes hemi gud moa winim silva, an save hemi hae moa winim gol.

¹⁵ Waes hemi gud moa winim olketa pel an daemen, no enisamting wea yu laekem tumas hemi save winim hem.

¹⁶ Hemi givim yu plande gudfala samting an longfala laef tu, mekem pipol tinghae long yu.

¹⁷ Olketa wei blong hem hemi naes tumas, an yu save falom hem fo kasem piis.

¹⁸ Waes hemi olsem tri wea yu save laef long frut blong hem, holem frut blong hem an bae yu hapi.

¹⁹ Yawe hemi yusim waes fo mekem wol, an long save, hemi mekem skae.

²⁰ Long save, Yawe hemi mekem riva fo ran, an hemi mekem ren foldaon from klaod.

²¹ San blong mi, yu holetaet long waes blong yu, an kipim gudfala tingting. Lukaot, nogud yu lusim tufala.

²² Tufala save givim gud laef long yu, an laef blong yu bae hemi luknaes.

²³ Ya, bae yu stap gud an sef an bae yu no save foldaon.

²⁴ Bae yu slip gud long naet, an bae yu no fraet.

²⁵ Kuiktaem nomoa trabol save kasem ravis pipol. Bat yu no fraetem samting ya.

²⁶ Yawe hemi barava lukaftarem yu, an bae hemi no letem yu foldaon long trap.

²⁷ Sapos yu save helpem eniwan hu i nidim, yu mas duim nao.

²⁸ Taem yu save helpem wantok, duim tude. No weitem tumoro.

²⁹ Yu no mekem plan fo spoelem wantok, hem ya hemi trastem yu.

³⁰ Sapos man no duim eni ravis samting long yu, yu no raoa long hem.

³¹ Yu no joles long olketa man fo faet, an no falom wei blong olketa.

³² Yawe no laekem olketa ravis man ya. Hemi trastem olketa stretfala man, an talemaot tingting blong hem long olketa.

³³ Yawe mekem trabol kasem famili blong nogud man, bat hemi blesim famili blong stretfala man.

³⁴ Hemi daonem olketa hu i tokdaonem nara man, bat hemi kaen long olketa hu i hambol.

³⁵ Pipol hu i waes bae garem gudfala nem, bat pipol hu i krangge bae garem ravis nem nomoa.