Provebs 29 - Pijin Bible

¹ Man hemi gohed fo bikhed nomata olketa tokstrong long hem plande taem, seknomoa, bae hem bagarap, an no enisamting save sevem hem.

² Taem olketa stretfala man i holem paoa, pipol i hapi tumas. Taem olketa ravis man i holem paoa, pipol i krae tumas.

³ Man laekem waes tingting, dadi blong hem i hapi. Man laekem olketa jiukong, evrisamting blong hem i lus.

⁴ Taem bikman falom stretfala wei, kantri blong hem bae stanap strong. Taem bikman laek fo tekem nila, kantri blong hem bae foldaon.

⁵ Man os-os long eniwan, hem mekem net fo kasem hem seleva.

⁶ Sin blong ravis man hemi holem hem taet olsem wanfala trap, bat stretfala man i fri an save singsing.

⁷ Stretfala pipol i wari long raet blong pua pipol, bat ravis man hemi no save long disfala raet.

⁸ Man fo tokspoelem nara man hemi mekem taon fo bone, bat waes man save aotem faea blong raoa.

⁹ Sapos waes man hemi tekem krangge man go long kot, hem no save stap kuaet bikos krangge man bae tokdaonem hem an toksuea long hem.

¹⁰ Olketa hu laek fo faet i heitem eni gudfala man, an trae fo kilim olketa stretfala pipol.

¹¹ Krangge man barava somaot kros blong hem, bat waes man hemi kontrolem kros blong hem.

¹² Taem bikman lisin long laea, evri wakaman long gavman blong hem bae kamap nogud.

¹³ Nomata puaman o man hu i spoelem puaman, tufala semsem nomoa. Yawe mekem tufala evriwan fo lukluk.

¹⁴ Taem bikman jajem pua pipol long stretfala wei, bae hemi save lidim pipol olowe.

¹⁵ Panisim pikinini fo mekem hem waes. Pikinini wea no eniwan i stretem hem, bae hemi meksem long mami blong hem.

¹⁶ Taem olketa ravis man kamap strong, olketa ravis wei i kamap strong, bat stretfala pipol bae lukim olketa foldaon.

¹⁷ Stretem pikinini blong yu, bae yu stap gud, an bae hemi mekem yu hapi.

¹⁸ No falom toktok blong Yawe, pipol bae mektrabol. Falom lo long Yawe, pipol bae hapi.

¹⁹ Nomata wakaman blong yu hemi smat, toktok nomoa no save stretem hem.

²⁰ Sapos yu lukim man hu hemi toktok kuiktaem nomoa, oraet, krangge man hemi garem moa sans fo kasem save winim kaen man ya.

²¹ Sapos yu kaen tumas long wakaman blong yu, bae hemi mekem yu krae.

²² Man fo kros, hemi statem raoa, wei blong hem, sin olowe.

²³ Pipol tinghae long hambol man, praod man bae hemi sem fogud.

²⁴ Yu helpem nara man fo stil, yu heitem yu seleva, bikos taem yu long kot yu no save toktru so trabol bae kasem yu.

²⁵ Fraetem man, bae yu trabol. Trastem Yawe, bae yu sef.

²⁶ Plande man laek toktok long sif, bat Yawe nomoa save mekem man garem raet blong hem.

²⁷ Stretfala pipol i les long ravis pipol. Ravis pipol i les long stretfala pipol.