Provebs 28 - Pijin Bible

¹ Ravis pipol save ranawe nomata no eniwan aftarem olketa. Bat stretfala pipol i gohed strong olsem laeon.

² Taem pipol blong wanfala kantri i faetem olketa seleva, hemi garem staka bikman, bat waes man hu hemi save gud, hemi save stretem.

³ Bikman hu hemi mekful long puaman, hemi olsem saekloun wea i spoelem gaden.

⁴ Olketa hu i les long lo i tokhapi long ravis man, bat olketa hu i hapi long lo i les long ravis man.

⁵ Olketa man nogud i nating save jaj long stretfala wei, bat olketa hu tinghae long Yawe i savegud long hem.

⁶ Puaman hu hemi falom stretfala wei, hemi moabeta winim risman hu hemi falom ravis wei.

⁷ Yanga hu hemi obeim lo hemi garem save, bat fren blong olketa man nogud hemi meksem long dadi blong hem.

⁸ Yu kamap ris from ravis wei wea yu mekem olketa peim bikfala intres long kaon, bae yu lusim seleni go long nara man hu save givim go long pua pipol

⁹ Sapos yu les fo herem lo, Yawe bae les fo herem prea blong yu.

¹⁰ Yu lidim stretfala man long wei nogud, bae yu kasem trap wea yu mekem. Bat man hemi barava gud tumas, bae hemi kasem gudfala samting.

¹¹ Risman hemi tingse hemi waes, bat puaman hu hemi save, hemi luksave long risman ya.

¹² Taem olketa stretfala man i holem paoa, pipol i hapi tumas. Bat taem olketa man nogud i kasem paoa, pipol i haed.

¹³ Yu haedem sin blong yu, laef blong yu bae nogud. Bat yu talemaot sin blong yu an lusim hem, God bae kaen long yu.

¹⁴ Tinghae long Yawe olowe, bae yu save hapi. Bat sapos yu bikhed, bae yu kasem trabol.

¹⁵ Ravis bikman hu hemi bos ovarem pua pipol, hemi olsem laeon wea hemi hanggre tumas, o wael pikpik wea hemi ronem man.

¹⁶ Bikman hu hemi no garem save, hemi mekful long pipol. Bat bikman hu hemi les fo ravem eniwan, hemi garem longfala laef.

¹⁷ Yu no helpem man hu hemi fit fo panis bikos hem bin kilim man dae, bae hemi no save stap kuaet go kasem taem hemi dae.

¹⁸ Man falom stretfala wei, bae hemi stap gud. Bat man falom ravis wei, bae hemi foldaon.

¹⁹ Man waka long gaden, bae garem plande kaikai. Bat man waka long drim, bae garem plande trabol.

²⁰ Man yu save trastem, bae hemi hapi fogud. Bat man faetem dola nomoa, bae hemi panis.

²¹ Hemi no stret fo jaj hemi saetem wanfala man long kot, bat lelebet kaikai nomoa hemi save grisim samfala jaj.

²² Man holetaet long olketa samting blong hem an faetem dola nomoa, hem no save dat seknomoa bae hemi pua tumas.

²³ Tokstrong long man fo stretem hem, an bae hemi barava tinghae long yu. Talem suit toktok long hem nomoa, an hemi no tinghae long yu.

²⁴ Man hemi tingse hemi stret fo ravem dadi an mami blong hem, hemi fren wetem olketa hu i kilim man dae.

²⁵ Man hemi gridi tumas hemi mekem raoa kamap. Bat man hemi trastem Yawe hemi mekem gudfala laef kamap.

²⁶ Man trastem tingting blong hem seleva, hemi krangge. Bat man trastem waes tingting, hemi stap sef.

²⁷ Yu helpem olketa pua pipol, bae yu no save sot long enisamting. Bat sapos yu no tingabaotem olketa ya, bae evriwan tokspoelem yu.

²⁸ Taem olketa ravis pipol i kasem paoa, pipol i haed. Bat taem ravis pipol i lus, stretfala pipol kasem paoa.