Provebs 27 - Pijin Bible

¹ Nogud yu tokpraod long samting wea bae yu duim tumoro, yu no save wanem bae kamap.

² No tokpraod long yu seleva, moabeta nara man tokhae long yu.

³ Olketa ston an sanbis i hevi tumas, trabol wea krangge man mekem i hevi moa.

⁴ Man hemi kros, save spoelem samting, bat man hemi joles, hemi barava spoelem evrisamting.

⁵ Moabeta fo talemaot rong blong man, winim yu no somaot lav long hem.

⁶ Yu save trastem fren hu hemi stretem yu, bat keakea long enemi hu hemi trae fo suit long yu.

⁷ Yu kaikai tumas, bae yu les long wanem hemi suit. Yu hanggre tumas, bae yu laekem wanem hemi saoa.

⁸ Man hemi stap farawe long hom, hemi olsem bed wea hemi lusim ples blong hem.

⁹ Insens an naesfala oel save mekem yu hapi, bat fren hemi save mekem yu hapi moa.

¹⁰ Yu no fogetem fren blong famili blong yu. Taem trabol hemi kam, no go long wantok. Neiba blong yu hemi moabeta winim wantok hu hemi stap farawe.

¹¹ Pikinini blong mi, sapos yu kamap waes, bae mi hapi, an bae mi save ansarem eniwan hu hemi tokspoelem mi.

¹² Man garem save, hemi lukim trabol, hem go long sef ples. Man no garem save, hem gohed long trabol, an hemi safa.

¹³ Sapos man hemi promis fo peim kaon blong strensa, yu holem kaleko blong hem taem man no sensim kaon.

¹⁴ Yu singaotem wanfala naes toktok long neiba long eli moning, bae hemi tingim yu tokspoelem hem.

¹⁵ Waef wea hemi raoa, hemi olsem lelebet ren i kamtru long ruf.

¹⁶ Fo stopem hem, hemi olsem yu stopem win, o yu holem oel long han.

¹⁷ Fael sapanem naef. Man sapanem tingting blong nara man.

¹⁸ Lukaftarem frut tri, bae yu kaikaim frut. Lukaftarem masta blong yu, bae yu kasem biknem.

¹⁹ Olsem fes blong man long pul, tingting blong man bae som hem aot.

²⁰ Man hu hemi gridi fo enikaen samting, hemi olsem ples blong olketa man wea i dae, hemi no save fulap.

²¹ Man save testem gol an silva long faea. Olketa save testem man long wei wea hemi tokhae.

²² Nomata yu barava panisim krangge man tumas, yu no save aotem krangge wei blong hem.

²³ Barava lukaotem olketa sipsip an buluka blong yu,

²⁴ bikos olketa save mekem yu risman, bat risis an biknem no save stap olowe.

²⁵ Evri yia, yu mas katem gras wea hemi grou gud long fil fo mekem olketa animol i kaikaim long hadtaem.

²⁶ Den olketa sipsip save grou gud an givim olketa hea fo yu wakem kaleko. An bae yu save salem olketa nanigot fo garem plande seleni.

²⁷ An bae olketa nanigot save givim plande milk fitim famili blong yu an wakamere blong yu tu.