Provebs 25 - Pijin Bible

Samfala narafala waes toktok blong King Solomon

¹ Hem nao samfala narafala waes toktok blong King Solomon. Olketa wakaman blong King Hesekaea long Jiuda i raetemdaon.

² Yu tinghae long God bikos hemi haedem samting. Yu tinghae long lida bikos hemi faendemaot samting.

³ Olsem skae hemi antap tumas, an dipsi hemi dip tumas, yu no save long tingting blong bikman.

⁴ Aotem ravis samting long silva, an man save wakem nambawan samting.

⁵ Aotem ravis man, an bikman save mekem kantri kamap nambawan gudfala ples.

⁶ No mekhae long yu seleva long ae blong sif, no sidaon wetem olketa bikman.

⁷ Nogud hemi mekem yu filsem long ae blong olketa. Moabeta hem nao talem yu fo kam sidaon kolsap long hem.

⁸ Taem yu lukim nogud samting, no hariap fo go long kot fo talemaot. Nogud nara man talemaot dat yu rong, an bae yu sem.

⁹ Sapos yu raoa wetem wantok, yu no tokabaotem samting wetem nara man.

¹⁰ Nogud nara man mekem yu filsem, an olketa tingdaonem yu.

¹¹ Waes toktok long barava taem, hemi olsem naes kaikai long gol plet.

¹² Taem waes man tok fo stretem man hu hemi save lisin, hemi olsem naesfala gol ring an sen.

¹³ Man fo karim toktok wea olketa save trastem hem, hemi olsem kolwata fo man hu i hadwaka. Hem nao mekem bos blong hem filgud.

¹⁴ Man promis fo givim samting, bat hemi no givim, hemi olsem klaod wetem laea ren.

¹⁵ Yu no kros kuiktaem, an yu gohed fo tok gudfala olowe nomoa, yu save sensim tingting blong bikman nomata hemi had olsem bon.

¹⁶ Yu faendem hani, no kaikaim tumas. Kaikaim tumas, bae yu toraot.

¹⁷ Yu faendem wantok, no ka-kam tumas long hem. Ka-kam tumas, bae hem heitem yu.

¹⁸ Laea toktok agensim wantok, hemi olsem naef, o stik, o spia.

¹⁹ Taem trabol hemi kam, sapos yu trastem man hu i no tinghevi long yu, hemi olsem tit blong yu i pein, o yu garekil long lek.

²⁰ Yu singsing long man hu i filnogud, hemi olsem yu putum lemon long kil blong hem.

²¹ Sapos enemi blong yu hemi hanggre, yu mas givim kaikai long hem. An sapos hemi dae long wata, yu mas givim wata long hem fo hemi dringim.

²² Sapos yu duim diswan, bae yu mekem hem fo filsem tumas nao, an Yawe bae givim olketa gudfala samting long yu.

²³ Komburu tekem kam ren, ravis tok tekem kam kros.

²⁴ I moabeta yu stap antap long haos olowe, winim yu stap tugeta wetem waef hu hemi raoa olowe.

²⁵ Gudnius from ples farawe, hemi olsem kolwata long man i dae long wata.

²⁶ Taem olketa ravis man i daonem olketa stretfala man, hemi olsem olketa doti long springwata.

²⁷ Nogud yu dringim tumas suga. Nogud yu mekhae long yu seleva.

²⁸ Yu no save kontrolem kros, yu wik olsem taon wea i no garem wolston raonem.