Provebs 23 - Pijin Bible

Meksiks waes toktok

¹ Sapos yu go kaikai wetem bikman, yu mas tingting olsem hemi watkaen man.

² Sapos kaikai hemi nambawan samting long yu, yu mas no kaikai tumas.

³ Yu mas no laekem tumas gudfala kaikai hemi givim long yu. Maet hemi laea long yu nomoa.

Mekseven waes toktok

⁴ Nogud yu hadwaka tumas fo kamap risman. Sapos yu waes bae yu no save waka olsem.

⁵ Lukluk long risis blong yu, an seknomoa hemi finis, bae hemi flae go olsem bed.

Mekeit waes toktok

⁶ Yu no kaikai long haos blong man hu hemi holetaet long olketa samting blong hem. Yu mas no laekem tumas gudfala kaikai hemi givim long yu.

⁷ Hemi sei long yu, “Yu gohed, yu kaikai olsem yu laekem,” bat hemi kaen man tingim kost olowe so hemi no toktru.

⁸ Kaikai blong hem bae mekem yu toraot nomoa, an gudfala toktok blong yu, bae hemi yusles.

Meknaen waes toktok

⁹ No talem gudfala toktok long krangge man, bikos bae hemi tingdaonem toktok blong yu.

Mekten waes toktok

¹⁰ Yu no muvum mak blong spialaen blong pisgraon wea olketa olo bifoa kam i putum. Yu no tekem eni lelebet pisgraon blong olketa hu i lusim dadi.

¹¹ Yu no duim olsem bikos Yawe hemi strong tumas fo lukaftarem olketa, an bae hemi agensim yu.

Mekleven waes toktok

¹² Yu mas lisingud long tisa blong yu, an yu mas traehad fo lanem evrisamting.

Mektuel waes toktok

¹³ Yu no fraet fo stretem pikinini. Sapos yu wipim as blong hem, bae hemi no dae.

¹⁴ Taem yu panisim hem, yu save sevem laef blong hem.

Mektetin waes toktok

¹⁵ Pikinini, sapos haat blong yu i waes, haat blong mi i hapi.

¹⁶ An sapos toktok blong yu i stret, laef blong mi i hapi.

Mekfotin waes toktok

¹⁷ Yu no joles long man nogud, tinghevi an tinghae long Yawe nomoa.

¹⁸ Sapos yu tingting olsem, laef blong yu bae kamap nambawan.

Mekfiftin waes toktok

¹⁹ !Pikinini blong mi, yu lisin kam gudfala! Yu mas waes, an falom stretfala wei.

²⁰ Yu no joenem olketa hu i spaka an kaikai tumas.

²¹ Olketa spakmasta an olketa hu kaikai tumas, bae olketa kamap puaman, an garem ravis kaleko nomoa.

Meksikstin waes toktok

²² Yu mas lisin long dadi blong yu. An yu no tingdaonem mami blong yu taem hemi olo.

²³ Tekem wanem hemi tru an waes. Traehad fo kasem gudfala tising an save. No lusim olketa ya.

²⁴ Dadi blong stretfala man, hemi hapi tumas. Eniwan hu hemi garem waes pikinini, hemi hapi moa.

²⁵ So mekem mami an dadi blong yu fo hapi.

Mekseventin waes toktok

²⁶ Pikinini blong mi, yu mas barava lisingud long mi. Falom wei blong mi nomoa.

²⁷ Juri woman, hemi hol fo foldaon long hem. An woman fo durong, hemi hol wea i dip tumas.

²⁸ Hemi olsem man fo stil wea i staphaed, an hemi mekem plande man fo lusim waef.

Mekeitin waes toktok

²⁹ ?Hu nao sore? ?Hu nao trabol? ?Hu nao raoa? ?Hu nao faet? ?Hu nao garekil? ?Hu nao garem ae wea i red?

³⁰ Hem nao, man fo spaka. Hem nao, man dringim tumas bia.

³¹ Yu no lukluk long waen, nomata hemi red tumas. Yu no daedae fo hem, nomata hemi luknaes long kap, an filgud long maos.

³² Hemi olsem poesen snek i baetem yu, bae yu dae from hem.

³³ Ae blong yu bae lukim enikaen, an maen blong yu bae tingim eni ravis samting.

³⁴ Bae yu fil olsem yu stap long raf si, nao yu toraot. Bae yu fil olsem yu antap long mas blong sip.

³⁵ An bae yu sei, “!Ating olketa kilim mi! Bat mi no garekil. Ating olketa faetem mi, bat mi no filim. Mi laek fo wekap, mekem mi spaka moa.”