Provebs 22 - Pijin Bible

¹ Gudfala biknem, hemi gud moa winim staka seleni. Fo pipol tinghae long yu, hemi gud moa winim silva an gol.

² Nomata risman o puaman, tufala semsem nomoa. Yawe mekem tufala evriwan.

³ Man garem save, hemi lukim trabol, hem go long sef ples. Man no garem save, hem gohed long trabol, an hemi panis.

⁴ Yu hambol an tinghae long Yawe, bae yu garem seleni, biknem an gudfala laef.

⁵ Rod blong ravis man i fulap long nilagras an trap, Man hu hemi lukaftarem laef blong hem, hemi stap farawe from kaen rod.

⁶ Tisim pikinini fo falom stretfala wei, taem hemi bikman, bae hemi no lusim.

⁷ Risman kontrolem puaman. Man tekem kaon hemi slev blong man givim kaon.

⁸ Man plantem ravis samting, bae digim trabol. Ravis wei blong hem, bae hemi kamap samting nating.

⁹ Man hapi fo givim kaikai long puaman, bae hemi hapi tumas.

¹⁰ Ronemaot man hemi laek fo tokspoelem nara man, raoa bae finis, faet bae finis, an toknogud bae finis.

¹¹ Man kipim haat blong hem klin, an hem save tok gud, lida bae fren blong hem.

¹² Yawe gadem tru toktok, bat hemi daonem laea toktok.

¹³ Lesibon hemi sei, “Wanfala laeon hemi stap aotsaet. Bae hemi kilim mi dae.”

¹⁴ Tok blong woman fo durong, hemi hol wea i dip tumas. Yawe bae kros long man hemi herem, an man bae foldaon long hem.

¹⁵ Krangge tingting i stap long haat blong pikinini. Panisim hem fo aotem kaen tingting ya.

¹⁶ Wanfala man mekful long puaman fo kamap ris, narafala man givim presen long risman, tufala evriwan save lus.

Teti waes toktok

¹⁷ Lisin kam gudfala long toktok blong waesman. Tingabaotem olketa samting mi tisim.

¹⁸ Hemi gud yu tingim olketa oltaem, an yu baehatem.

¹⁹ Mi tisim yu, bikos mi laekem yu fo trastem Yawe.

²⁰ Mi raetemdaon teti waes toktok, mekem yu garem save.

²¹ Olketa save tisim yu tru toktok an mekem yu fit fo talem olketa gudfala ansa long olketa hu i askem enisamting long yu.

Fas waes toktok

²² Yu no ravem olketa puaman. An yu no spoelem olketa long kot.

²³ Bikos Yawe bae saetem olketa, an bae hemi spoelem man hu hemi spoelem olketa.

Mektu waes toktok

²⁴ Yu no fren wetem man save kros tumas, an yu no stap tugeta wetem man save kros kuiktaem.

²⁵ Nogud yu lanem wei blong hem, an pas long hem olsem trap.

Mektri waes toktok

²⁶ Yu no promis fo peimaot kaon blong narafala man.

²⁷ Bikos sapos yu no save peim, bae olketa tekem evrisamting blong yu

Mekfoa waes toktok

²⁸ Yu no muvum mak blong spialaen blong pisgraon wea olketa olo bifoa kam i putum.

Mekfaev waes toktok

²⁹ Man save tumas long waka blong hem, hemi no duim waka blong olketa man nating, bat bae hemi duim waka blong bikman.