Provebs 18 - Pijin Bible

¹ Man hem tingim seleva nomoa, hemi falom nomoa laek blong hem, an hemi agensim eni gudfala tingting.

² Krangge man, hemi no hapi long gudfala save, bat hemi hapi tumas fo talemaot tingting blong hem.

³ Ravis wei fastaem, sem bihaen. Meksem fastaem, filsem bihaen.

⁴ Toktok blong waes man, hemi save dip tumas. Waes toktok, hemi save kamap olsem springwata.

⁵ I no stret fo saet wetem man hu hemi brekem lo. An i nating stret fo mekem man hu hemi no brekem lo no win long kot.

⁶ Toktok blong krangge man, mekem trabol kam. Hemi olsem, hem askem olketa fo wipim hem.

⁷ Toktok blong krangge man, hemi spoelem hem seleva. Hemi olsem wanfala trap fo hem seleva.

⁸ Toktok abaotem nara man, hemi olsem nambawan samting wea yu laek fo kaikaim.

⁹ Lesibon hemi garem wanfala brata, hem nao, man fo spoelem evrisamting.

¹⁰ Nem blong Yawe hemi olsem wanfala sefples, olketa stretfala pipol save go haed long hem.

¹¹ Seleni blong risman hemi olsem wolston blong taon, risman hemi tingse hem barava sef long hem.

¹² Haat praod fastaem, foldaon bihaen Hambol fastaem, biknem bihaen.

¹³ Man hu hemi ansa bifoa hemi lisin, bae hemi krangge an filsem.

¹⁴ Man laek fo laef, hemi oraet nomata hemi sik. Bat hemi had tumas fo karim tingting hem filnogud.

¹⁵ Man wetem gudfala tingting, hemi kasem save. Ia blong waes man, hemi laek fo herem save tu.

¹⁶ Yu givim go presen, an rod hem klia. Hem nao save mekem yu lukim bikman.

¹⁷ Man talem kam toktok fastaem, bae olketa tingse hem toktru go kasem taem nara man hem kam askem olketa kuestin.

¹⁸ Samfala pleim daes fo finisim raoa, hemi wanfala wei fo stopem faet long tufala bikman.

¹⁹ Hemi had tumas fo go kolsap long brata hu hemi kros long yu, bikos hemi olsem biktaon wetem wolston raonem. Raoa blong hem, hemi olsem aean geit wea olketa lokem.

²⁰ Toktok blong man hemi olsem kaikai, wanem hemi talem save mekem hem hapi.

²¹ Tang save mekem yu dae o laef, yusim gud, bae yu no dae.

²² Taem yu faendem woman fo maritim, yu faendem wanfala gudfala samting ya. Hemi wanfala blesing.

²³ Puaman save ask olowe. Risman save tokhad olowe.

²⁴ Plande fren i yusles nomoa. Barava fren, hemi gud winim wantok.