Provebs 17 - Pijin Bible

¹ Lelebet drae kaikai long laef wea hemi kuaet, hemi moabeta winim plande kaikai blong fist long laef wea hemi garem raoa.

² Wakaman wea hemi waes bae hemi bos long ravis san blong masta. An bae hemi olsem pikinini an tekova long pat blong olketa samting blong masta.

³ Man save testem gol an silva long faea. Yawe save testem haat blong man.

⁴ Ravis man hemi laekem ravis tok. Man fo laea hemi laekem laea.

⁵ Man hemi mekful long puaman, hemi tingdaonem God hu hemi mekem man. Man hemi hapi long trabol blong nara man, bae hemi panis.

⁶ Olketa smol grani i mekem grandadi blong olketa fo garem biknem, an pikinini tu garem biknem from dadi blong hem.

⁷ I no stret fo krangge man yusim spesol tok. I nating stret fo sif hemi laea.

⁸ Nila hemi olsem grinlif, man hemi yusim hemi tingse hemi lake olowe.

⁹ Man hemi fogiv, hemi faendem lav. Man talem trabol moa, hemi lusim fren.

¹⁰ Strong toktok save sensim man wea hemi garem gud tingting, bat nomata yu wipim krangge man wan handred taem, hemi no save sens.

¹¹ Ravis man hemi laekem nomoa fo agensim gavman, so man wea hemi raf tumas bae hemi panisim hem nogud.

¹² Yu fraetem dog wea hemi kros from olketa stilim pikinini blong hem. Yu mas fraetem moa krangge man wetem krangge tingting.

¹³ Sapos man hemi givim ravis samting fo sensimbaek gudfala samting, ravis samting bae stap olowe long famili blong hem.

¹⁴ Stat blong raoa hemi olsem wata hemi lus long smol hol long tangk, stopem bifoa bikfala faet i kamap.

¹⁵ Sapos jaj hemi letem man nogud hemi gofri, o mekem gudfala man hemi panis, Yawe hemi les long tufala wei ya.

¹⁶ Waswe nao krangge man garem seleni fo kasem save? Hemi no laek fo lane.

¹⁷ Fren blong yu, hemi lavem yu olowe. Brata blong yu, hemi helpem yu long hadtaem.

¹⁸ Man wea hemi no garem save, hem nao hemi promis fo peimaot kaon blong nara man.

¹⁹ Man laekem raoa, hem laekem sin. Man laek fo tok praod, hem laekem trabol.

²⁰ Man hu hemi tingting nogud, bae hemi nogud. Man hu hemi laea, bae hemi kasem trabol.

²¹ Man hemi garem krangge pikinini, hemi sore olowe. Dadi blong krangge man, hemi nating save hapi.

²² Man hemi hapi, laef hemi helti. Man hemi filnogud, laef hemi bagarap.

²³ Ravis man hemi save tekem nila wea hemi haed, an bae hemi spoelem stretfala wei blong kot.

²⁴ Man hemi garem save, hemi lukaotem waes tingting. Man no garem save, hemi lukaotem enikaen tingting nomoa.

²⁵ Krangge pikinini, hemi mekem dadi sore olowe, an hemi mekful long mami hu hemi bonem hem.

²⁶ Hemi no stret fo panisim stretfala man. An hemi nogud fo wipim gudfala man.

²⁷ Man no toktok tumas, hemi waes. Man kuaet nomoa, hemi save.

²⁸ Yu save, nomata man hemi krangge, olketa tingse hemi waes an garem save sapos hemi no tok.