Provebs 14 - Pijin Bible

¹ Waes woman hemi lukaftarem gud famili blong hem, bat krangge wei blong krangge woman i save spoelem.

² Man no save laea, i tinghae long Yawe, man hemi save laea, i tingdaonem hem.

³ Tok blong krangge man hemi olsem wip fo wipim hem seleva, maos blong waes man hem gadem hem seleva.

⁴ Man no garem buluka, hemi no garem kaikai, bat man garem strongfala buluka, bae hemi garem gudfala gaden.

⁵ Gudfala witnes, hemi no save laea, ravis witnes, hemi save laea nomoa.

⁶ Man fo toknogud i save lukaotem waes tingting, bat no save kasem. Man hu hemi garem gud tingting, hemi kasem save.

⁷ Yu mas stap farawe long krangge man, bae yu no faendem save long hem.

⁸ Man tingting stret long wei blong hem, hem nao hemi waes. Man tingting krangge long wei blong hem, hem nao hemi gorong.

⁹ Krangge man hemi mekfan long wei fo stretem samting, bat God hemi hapi long stretfala pipol.

¹⁰ Man seleva save long hevi blong hem, an hem nomoa save long hapi blong hem seleva.

¹¹ Haos blong man nogud, bae hemi brekdaon, bat haos blong gudfala man, bae hemi stap olowe.

¹² Wanfala man hemi tingse rod hemi laekem i stret nomoa, bat hemi rod blong dae.

¹³ Man hu hemi filnogud save laf fo haedem. Sore save finisim taem fo hapi.

¹⁴ Man hemi lusim God, bae hemi fulap long ravis wei blong hem seleva, bat gudfala man, bae garem plande gudfala samting.

¹⁵ Man no garem save, bae biliv long enisamting. Man garem gudfala save, bae hemi tingim wei fo falom.

¹⁶ Waes man hemi keakea an no kasem trabol, krangge man hemi nating keaful an kasem trabol kuiktaem.

¹⁷ Man fo kros kuiktaem, save mekem krangge samting, an olketa heitem man fo mekem ravis plan.

¹⁸ Man no garem save, hemi kasem krangge tingting. Man garem gudfala tingting, hemi kasem save.

¹⁹ Man nogud bae baodaon long ae blong stretfala man, an ravis man bae askem stretfala man fo helpem hem.

²⁰ Puaman no garem wantok. Risman garem staka.

²¹ Man les long wantok, hemi sin. Man kaen long pua pipol, hemi hapi.

²² Man mekem ravis plan, bae hemi gorong. Bat pipol trastem an tinghevi long man hemi mekem gudfala plan.

²³ Wakahad an bae yu garem gud samting, tok nating an bae yu garem nating.

²⁴ Yu waes an bae yu save ris, yu krangge an bae yu save krangge moa.

²⁵ Witnes hemi toktru, hemi sevem laef, witnes hemi toklaea, hemi kilim man dae.

²⁶ Man hemi tinghae long Yawe, hemi garem sef ples fo haed, an olketa pikinini blong hem i sef tu.

²⁷ Fo tinghae long Yawe, hemi wata blong laef, hemi sevem man from dae.

²⁸ Lida blong plande pipol, hemi garem hae nem. Lida blong tu-tri man, hemi samting nating nomoa.

²⁹ Man no save kros kuiktaem, hemi waes fogud. Man save kros kuiktaem, hemi krangge fogud.

³⁰ Garem kuaet tingting, bae yu helti. Garem joles tingting, bae yu kansa.

³¹ Man hemi mekful long puaman, hemi tingdaonem God hu hemi mekem man. Man hemi kaen long puaman, hemi tinghae long God.

³² Taem trabol hemi kam, ravis man hemi foldaon finis. Bat nomata stretfala man hemi dae, hemi garem sefples long God.

³³ Waes tingting hemi stap long haat blong man hemi garem save, bat hemi nating stap long maen blong krangge man.

³⁴ Stretfala wei hemi liftimap laef blong kantri bat ravis wei hemi meksem long evriwan.

³⁵ Olketa bikman i hapi long eni wakaman hu hemi waes, bat bae hemi panisim olketa hu i mekem hem sem.