Provebs 13 - Pijin Bible

¹ Waes pikinini lisin long dadi blong hem, bikhed pikinini no save lisin.

² Toktok blong gud man i mekem gud samting kamap, toktok blong konman i mekem ravis faet kamap.

³ Ting fastaem bifoa yu tok an bae yu laef, tok olobaot an bae yu dae.

⁴ Wanem man hu i wakahad hemi laekem, hemi garem. Wanem Lesibon hemi laekem, hemi no garem.

⁵ Stretfala pipol i les long kon, konman i mekem man fo sem.

⁶ Gudfala wei gadem gud man, nogud wei mekem nogud man fo lus.

⁷ Samfala talem dat olketa ris, bat olketa nating garem enisamting. Samfala talem dat olketa pua, bat olketa garem plande samting.

⁸ Maet samwan hemi fosim risman fo peim laef blong hem seleva, bat puaman no garem kaen trabol olsem.

⁹ Laet blong stret man hemi saen fogud, laet blong ravis man bae hemi dae nomoa.

¹⁰ Praod man hemi statem raoa nomoa, bat man hemi herem advaes hemi waes.

¹¹ Seleni man garem kuiktaem long kon, hemi lus kuiktaem. Seleni man garem long hadwaka, hemi save kamap bik.

¹² Tingting wea hemi mis, hemi save mekem man filnogud. Tingting wea hemi hapen, hemi save mekem man hapi.

¹³ Man no lisin, bae hemi garem trabol. Man hemi lisin, bae hemi garem gudfala samting.

¹⁴ Tising blong waesman hemi wata blong laef, hemi sevem man from dae.

¹⁵ Man garem gudfala save, pipol tinghae long hem. Bat man no garem save, hemi garem hadtaem.

¹⁶ Man hemi save, hemi tingting fastaem bifoa duim samting. Bat man no save, hemi somaot dat hemi krangge.

¹⁷ Man hu hemi talem ravis tok, hemi save mekem trabol. Man pipol trastem fo toktru, hemi save mekem piis.

¹⁸ Man hemi les fo eniwan i stretem hem, bae hemi kamap pua an filsem. Bat man hemi lisin long olketa hu i stretem hem, bae pipol tinghae long hem.

¹⁹ Tingting wea hemi hapen, hemi suit tumas, bat krangge man hemi les fo lusim krangge wei.

²⁰ Fren wetem waes man, bae yu waes. Fren wetem krangge man, bae yu safa.

²¹ Trabol falom nogud man, nambawan laef falom stret man.

²² Gudfala man save givim plande gud samting fo olketa grani blong hem. Bat olketa samting blong nogud man i go long olketa stretfala pipol.

²³ Maet puaman hemi garem plande kaikai long gaden, bat ravis wei i ravem hem.

²⁴ Man wea hemi no panisim pikinini blong hem, hemi no lavem. Bat man hemi lavem pikinini blong hem, hemi mas stretem.

²⁵ Stret man garem plande kaikai, nogud man hemi hanggre olowe.