Nehemaea 12 - Pijin Bible

Olketa prist an olketa Livaet

¹ Taem Serababel, san blong Sealtiel, wetem Haeprist Jesua, tufala kambaek from Babilonia, plande prist and Livaet i kambaek wetem tufala. Nem blong olketa prist ya hemi olsem: Seraea, an Jeremaea, an Esra,

² an Amaraea, an Maluk, an Hatus,

³ an Sekanaea, an Rehum, an Meremot,

⁴ an Ido, an Gineton, an Abaeja,

⁵ an Mijamin, an Maadaea, an Bilga,

⁶ an Semaea, wetem olketa wantok blong olketa Joearib, an Jedaea,

⁷ an Salu, an Amok, an Hilkaea, an Jedaea. Olketa ya i lida blong olketa prist long taem wea Jesua hemi bin Haeprist.

⁸ Olketa Livaet hu i kambaek wetem tufala ya, nem blong olketa ya hemi olsem: Jesua, an Binui, an Kadmiel, an Serebaea, an Jiuda, an Matanaea hu hemi lidim kuaea wea olketa singim olketa preis singsing, wetem olketa wantok blong hem.

⁹ Bakbukaea an Uni, wetem olketa wantok blong tufala, olketa singim ansa long singsing ya.

¹⁰ Haeprist Jesua, hemi dadi blong Joeakim, an Joeakim, hemi dadi blong Eliasib, an Eliasib, hemi dadi blong Joeada,

¹¹ an Joeada, hemi dadi blong Jonatan, an Jonatan, hemi dadi blong Jadua.

¹² Long taem wea blong Joeakim hemi Haeprist, olketa man hu i hed long olketa laen blong olketa prist, nem blong olketa i olsem: Laen blong Seraea: Meraea. Laen blong Jeremaea: Hananaea.

¹³ Laen blong Esra: Mesulam. Laen blong Amaraea: Jehohanan.

¹⁴ Laen blong Maluk: Jonatan. Laen blong Sebanaea: Josef.

¹⁵ Laen blong Harim: Adna. Laen blong Meraeot: Helkae.

¹⁶ Laen blong Ido: Sekaraea. Laen blong Gineton: Mesulam.

¹⁷ Laen blong Abaeja: Sikri. Laen blong Miniamin: wanfala prist. Laen blong Moadaea: Piltae.

¹⁸ Laen blong Bilga: Samua. Laen blong Semaea: Jehonatan.

¹⁹ Laen blong Joearib: Matenae. Laen blong Jedaea: Usi.

²⁰ Laen blong Salae: Kalae. Laen blong Amok: Eba.

²¹ Laen blong Hilkaea: Hasabaea. Laen blong Jedaea: Netanel.

²² Long taem blong Haeprist Eliasib, an long taem blong Haeprist Joeada, an long taem blong Haeprist Johanan, an long taem blong Haeprist Jadua, olketa bin raetemdaon long wanfala buk, olketa nem blong hed long olketa laen blong olketa Livaet an olketa prist. Olketa finisim disfala rekod long taem wea King Darias hemi rul ovarem Pesia.

²³ Olketa bin gohed fo raetemdaon long wanfala spesol buk, nem blong olketa hed long olketa laen hu i bon kam long laen blong Livae bifoa. Olketa gohed fo rekodem olketa nem ya go-go kasem taem blong Haeprist Johanan, san blong Eliasib.

²⁴ Long datfala taem tu, olketa hed blong olketa Livaet i olsem: Hasabaea, an Serebaea, an Jesua, san blong Kadmiel. Olketa ya i stanap long wanfala saet blong Tambuhaos fo singim olketa preis singsing, an olketa wantok blong olketa i stanap long narasaet fo singim ansa long singsing ya, barava olsem King Deved hu hemi man blong God, hemi bin tisim olketa Livaet bifoa.

²⁵ Matanaea, an Bakbukaea, an Obadaea, an Mesulam, an Talmon, an Akub, olketa ya i sekiuriti long olketa stoarum blong Tambuhaos wea i stap kolsap nomoa long olketa geit.

²⁶ Olketa ya i gohed fo waka olsem long taem blong Haeprist Joeakim, san blong Jesua, wea grani blong hem nao Josadak, an long taem wea mi Nehemaea nao mi gavna, an long taem blong Prist Esra hu hemi tisa long Lo blong God.

Nehemaea hemi mektambu long bikfala wolston long taon

²⁷ Taem mifala redi fo mektambu long bikfala wolston blong Jerusalem, olketa go lukaotem olketa Livaet long olketa ples blong olketa, fo tekem olketa kam long Jerusalem fo selebretem bikde ya. Olketa kam fo singim olketa preis singsing an fo pleim miusik long olketa simbol an olketa deferen kaen gita.

²⁸ Olketa Livaet long kuaea blong Tambuhaos wea i stap long olketa vilij kolsap long Jerusalem, olketa kam tu fo selebretem disfala bikde. Olketa kam from olketa vilij kolsap long Netofa,

²⁹ an long Bet-Gilgal, an Geba, an Asmavet. Olketa ya long kuaea bin wakem olketa vilij ya raonem Jerusalem, mekem olketa save stap kolsap long Tambuhaos ya.

³⁰ Den olketa prist an olketa Livaet i mekem olketa seleva klin long ae blong God, an bihaen olketa mekem olketa pipol blong taon, an bikfala wolston ya, wetem olketa geit blong hem, fo klin tu long ae blong God.

³¹ Mi talem olketa lida blong distrik long Jiuda fo goap tugeta antap long wolston ya. An mi siusim tufala grup long kuaea fo singim olketa preis singsing. Wanfala grup hemi goap antap long wolston an go long raet saet falom wei fo go long Geit fo Torowem Ravis.

³² Hosaea hemi wakabaot bihaen long fas grup ya long kuaea, wetem wanfala haf long olketa lida blong Jiuda.

^33-34 Asaraea, an Esra, an Mesulam, an Jiuda, an Benjamin, an Semaea, an Jeremaea, olketa tu wakabaot long disfala grup.

³⁵ Bihaen long olketa ya, samfala prist wea i gohed fo bloum olketa trampet, i wakabaot bihaen. An bihaen long olketa ya, Sekaraea, san blong Jonatan, hemi wakabaot. Laen blong hem nao hemi olsem: Jonatan, Semaea, Matanaea, Mikaea, Sakua, Asaf.

³⁶ Olketa wantok blong hem wea nem blong olketa, Semaea, an Asarel, an Milalae, an Gilalae, an Maae, an Netanel, an Jiuda, an Hanani, olketa bihaenem hem. Olketa ya i gohed fo pleim nao olketa samting fo mekem miusik, olsem King Deved, man blong God bifoa, hemi bin tisim olketa Livaet fo yusim. Prist Esra, hu hemi tisa long Lo blong God, hemi wakabaot long frant long disfala grup.

³⁷ Taem olketa kasem Springwata Geit, olketa klaeap long lada wea hemi goap long olo haf long taon wea olketa kolem Taon blong Deved, nao olketa gopas long bikfala haos blong King Deved ya bifoa, den olketa gobaek antap long wolston ya long ist saet long taon wea Wata Geit hemi stap long hem.

³⁸ Mektu grup long kuaea ya, hemi goap antap long wolston an go long lef saet. Mi wetem narafala haf long olketa pipol ya, mifala wakabaot bihaen long olketa. Mifala go winim Gadhaos blong olketa Aven, fo go kasem Waed Wolston.

³⁹ Nao mifala go winim long Efrem Geit, an Jesana Geit, an Fis Geit, an Gadhaos blong Hananel, an Gadhaos blong Handred, go kasem Sipsip Geit. Den mifala wakabaot go an stop long Sekiuriti Geit.

⁴⁰ Nao tufala grup ya wea i gohed fo singim preis singsing, tufala kam tugeta long ples blong olketa long frant blong Tambuhaos blong God. Mi wetem haf blong olketa lida, mifala tu go long ples blong mifala long Tambuhaos.

⁴¹ Den olketa prist fo bloum olketa trampet, olketa kam long ples blong olketa. Nem blong olketa nao, Eliakim, an Maasea, an Miniamin, an Mikaea, an Elioenae, an Sekaraea, an Hananaea.

⁴² Olketa narafala prist i kam bihaen long olketa ya, an nem blong olketa nao, Maasea, an Semaea, an Eleasa, an Usi, an Jehohanan, an Malkaeja, an Elam, an Esa. Jesrahaea nao hemi lidim olketa kuaea ya long singsing blong olketa.

⁴³ Long datfala de, mifala mekem plande sakrifaes, an mifala evriwan i hapi tumas, bikos God hemi mekem mifala hapi. Olketa woman an olketa pikinini tu i hapi, an hapi noes wea mifala evriwan gohed fo mekem, olketa hu i stap farawe save herem nomoa.

Olketa Livaet fo kolektem olketa ofaring blong Tambuhaos

⁴⁴ Long datfala taem, olketa siusim wanfala grup long olketa Livaet fo lukaftarem olketa stoarum long Tambuhaos wea olketa putum olketa ofaring, an olketa fas kaikai wea olketa tekemaot from gaden, an olketa ten. Olketa samting ya i fo olketa prist an olketa Livaet, mekem olketa save garem kaikai an olketa narafala samting, olsem Lo blong God hemi talem. Olketa Livaet ya i goaot long olketa fam raonem olketa taon fo kolektem olketa samting ya, an tekem kam long olketa stoarum long Tambuhaos. Olketa pipol long Jiuda i hapi tumas fo duim diswan, bikos olketa prist an olketa Livaet ya i gohed fo duim waka blong olketa gudfala.

⁴⁵ Olketa ya i gohed fo duim waka blong olketa fo mekem olketa pipol an olketa samting fo klin long ae blong God, an olketa mekem olketa narafala seremoni wea God hemi talem olketa fo duim. An olketa Livaet long kuaea long Tambuhaos wetem olketa Livaet hu i sekiuriti long olketa geit blong Tambuhaos, olketa ya tu i gohed fo duim waka blong olketa gudfala, barava falom nao olketa rul wea King Deved an King Solomon bifoa, tufala mekem.

⁴⁶ Hemi olsem bikos stat long taem blong King Deved wetem Asaf, hemi garem olketa lida long kuaea, wea olketa gohed fo singsing fo preisim God an fo talem tengkiu long hem.

⁴⁷ An long taem blong Serababel, an long taem wea mi Nehemaea nao mi gavna, evri de, olketa pipol blong Israel i gohed fo givim olketa ofaring, mekem olketa Livaet long kuaea long Tambuhaos wetem olketa Livaet hu i sekiuriti long olketa geit blong Tambuhaos, fo garem kaikai an narafala samting wea olketa nidim long evri de. An olketa givim tu olketa spesol ofaring fo olketa narafala Livaet, an olketa Livaet tu i givim haf long wanem olketa tekem fo go long olketa prist wea i bon kam long laen blong Eron, olsem wea Lo blong God hemi talem.