Nehemaea 11 - Pijin Bible

Olketa hu i stap long Jerusalem

¹ Oraet, olketa lida i mekem hom blong olketa long Jerusalem, an olketa narafala pipol i yusim olketa spesol ston fo faendemaot wanem famili nao hemi mas stap long tambu taon ya. Long evri ten famili, olketa siusimaot wanfala famili fo muv go long taon, an naen narafala famili ya i stap nomoa long olketa ples blong olketa.

² Samfala man i talemaot dat olketa wiling fo stap long Jerusalem, mekem samfala famili save gohed fo stap long ples blong olketa, an olketa pipol i mekhae long olketa man ya.

^3-4 Samfala long olketa prist, an olketa Livaet, an olketa wakaman long Tambuhaos, an olketa long laen blong olketa wakaman blong King Solomon bifoa, wetem samfala narafala pipol blong Israel, olketa gohed fo stap long ples blong olketa long olketa taon long Jiuda. Bat samfala lida wetem narafala pipol long tufala distrik long Jiuda an Benjamin, olketa mekem hom blong olketa long Jerusalem. Olketa long laen blong Jiuda hu i stap long Jerusalem hemi olsem: Ataea, san blong Yusaea, hu hemi bon kam long laen blong Peres. Laen ya nao hemi olsem: Ataea, Yusaea, Sekaraea, Amaraea, Sefataea, Mahalalel, Peres hu hemi olo grani long disfala laen.

⁵ Maasea, san blong Baruk, hu hemi bon kam long laen blong Sela. Laen ya nao hemi olsem: Maasea, Baruk. Kolose, Hasaea, Adaea, Joearib, Sekaraea, Sela hu hemi olo grani long disfala laen.

⁶ Olketa long laen blong Peres wea i stap long Jerusalem, namba blong olketa hemi kasem 468 nambawan man fo faet.

⁷ Olketa long laen blong Benjamin hu i stap long Jerusalem hemi olsem: Salu, san blong Mesulam, hu hemi bon kam long laen blong Jesaea. Laen ya nao hemi olsem: Salu, Mesulam, Pedaea, Kolaea, Maasea, Itiel, Jesaea hu hemi olo grani long disfala laen.

⁸ Gabae an Salae wetem 928 man i kam wetem.

⁹ Joel, san blong Sikri, hemi komanda blong olketa, an Jiuda, san blong Hasenua, hemi mektu bikman long taon ya.

¹⁰ Olketa prist wea i stap long Jerusalem hemi olsem: Jedaea, san blong Joearib, an Jakin,

¹¹ an Seraea, san blong Hilkaea, wea laen blong hem hemi olsem: Mesulam, Sadok, Meraeot, Ahitub, hu hemi olo long laen ya an hu hemi bin Haeprist long bifoa.

¹² Olketa wetem olketa wantok hu i duim waka blong Tambuhaos, namba blong olketa hemi kasem 822. Adaea, san blong Jeroham, wea laen blong hem hemi olsem: Pelalaea, Amsi, Sekaraea, Pasuru, Malkaeja.

¹³ Hem wetem olketa wantok hu i hed blong olketa laen, namba blong olketa hemi kasem 242. Amasae, san blong Asarel, wea laen blong hem hemi olsem: Ahasae, Mesilemot, Ima.

¹⁴ Hem wetem olketa wantok hu i nambawan soldia, namba blong olketa hemi kasem 128. Lida blong olketa soldia ya, hemi Sabdiel hu hemi blong wanfala barava impoten famili.

¹⁵ Olketa Livaet wea i stap long Jerusalem hemi olsem: Semaea, san blong Hasub, wea laen blong hem hemi olsem: Asrikam, Hasabaea, Buni.

¹⁶ Sabetae an Josabad, tufala ya i lida blong olketa Livaet wea i lukaftarem olketa waka aotsaet long Tambuhaos blong God.

¹⁷ Matanaea, san blong Mika, wea laen blong hem hemi olsem: Sabdi, Asaf. Matanaea ya, hemi lida long kuaea long Tambuhaos blong God, fo singim prea fo talem tengkiu long hem. Bakbukaea, hu hemi mektu lida long kuaea ya. Abda, san blong Samua, wea laen blong hem hemi olsem: Galal, Jedutun.

¹⁸ Namba long olketa Livaet ya wea i stap long tambu taon ya, hemi kasem 284.

¹⁹ Olketa Livaet hu i sekiuriti long olketa geit blong Tambuhaos hemi olsem: Akub an Talmon, wetem olketa wantok wea namba blong olketa nao hemi kasem 172.

²⁰ Olketa narafala pipol blong Israel, wea samfala i prist, an samfala i Livaet, olketa ya gohed fo stap long ples blong olketa famili long olketa taon long Jiuda, long graon wea olketa seleva i onam.

²¹ Olketa Livaet hu i wakaman long Tambuhaos, olketa stap antap long hil long Ofel, an tufala man ya Siha an Gispa, tufala ya nao i lida blong olketa.

²² Nambawan lida blong olketa Livaet wea i stap long Jerusalem, nem blong hem Usi, san blong Bani, wea laen blong hem hemi olsem: Hasabaea, Matanaea, Mika. Olo grani blong laen ya nao hemi Asaf. An olketa hu i bon kam long laen blong Asaf nao, olketa lukaftarem singsing an miusik long taem fo wosip long Tambuhaos blong God.

²³ King hemi mekem rul fo somaot wanem olketa long kuaea ya mas duim long evri de.

²⁴ Petahaea, san blong Mesesabel, hu hemi long laen blong Sera, san blong Jiuda, hemi nambawan advaesa blong king abaotem olketa pipol blong Israel an evrisamting wea hemi hapen long kantri ya.

Olketa pipol wea i stap long olketa narafala taon an vilij

²⁵ Plande pipol nao i stap long taon blong olketa, wea hemi kolsap long fam blong olketa. Samfala long laen blong Jiuda i stap long olketa taon blong olketa olsem: Kiriat-Aba wetem olketa vilij wea i stap raonem hem, an Dibon wetem olketa vilij wea i stap raonem hem, an Jekabseel wetem olketa vilij wea i stap raonem hem,

²⁶ an Jesua, an Molada, an Bet-Pelet,

²⁷ an Hasasual, an Beereseba wetem olketa vilij wea i stap raonem hem,

²⁸ an Siklag, an Mekona wetem olketa vilij wea i stap raonem hem,

²⁹ an En-Rimon, an Sora, an Jamut,

³⁰ an Sanoa an Adulam wetem olketa vilij wea i stap raonem tufala, an Lakis wetem olketa fam kolsap long hem, an Aseka wetem olketa vilij wea i stap raonem hem. Hem nao olketa ples wea olketa long laen blong Jiuda i stap long hem, hemi stat long taon long Beereseba long saot, go kasem Hinom Vali long not.

³¹ Olketa long laen blong Benjamin i stap long olketa taon blong olketa olsem: Geba, an Mikmas, an Ai, an Betel wetem olketa vilij wea i stap raonem hem,

³² an Anatot, an Nob, an Ananaea,

³³ an Hasoa, an Rama, an Gitaem,

³⁴ an Hadid, an Seboeim, an Nebalat,

³⁵ an Lod, an Ono, an Ge-Harasim.

³⁶ Samfala grup long olketa Livaet wea olketa grani blong olketa bifoa bin stap long distrik long Jiuda, olketa nao go stap long distrik long Benjamin.