Nambawan Singsing 7 - Pijin Bible

Yang man hemi tok

¹ !Daling blong mi, yu barava olsem dota blong king! Tufala lek blong yu wetem sandol ya long hem i luknaes tumas. Saet goap blong lek blong yu hemi barava luknaes tumas, olsem man hu hemi wakem, hemi barava save tumas.

² Frant long bele blong yu hemi raon olsem wanfala kap, wea hemi fulap olowe nomoa long nambawan waen. Ya, bele blong yu hemi naesbola tumas, Hemi luknaes olsem wanfala hip long wit wea olketa naes flaoa i stap raonem.

³ Tufala susu blong yu hemi barava luknaes tumas olsem tufala yang gasele. An hemi luknaes tu olsem tufala yang dia wea i tuin,

⁴ Nek blong yu hemi raon an hemi smut naes. Tufala ae blong yu hemi saen fogud olsem olketa pul long wata long taon long Hesbon, wea i stap kolsap long geit long Bat-Rabim. Nous blong yu hemi sap an hemi luknaes tumas olsem hae taoa ya long Lebanon wea olketa save lukim go Damaskas.

⁵ Taem mi lukim hed blong yu, mi tingim disfala hae maonten long Kaamel wea hemi luknaes tumas. Hea blong yu hemi blak an hemi saen fogud. Nomata wanfala king save dae nomoa fo yu taem hemi lukim hea blong yu, bikos hemi barava luknaes fogud.

⁶ Yu barava luknaes an mi laekem yu tumas. Disfala lav blong yu fo mi, hemi mekem mi barava hapi an filgud tumas.

⁷ Yu olsem wanfala tol pam tri wea hemi luknaes fogud, an tufala susu blong yu hemi raon an fulap olsem olketa bans long frut blong hem.

⁸ Bae mi klaemap disfala pam tri, fo tekem frut blong hem. Bae tufala susu blong yu hemi naes tumas long mi, olsem wea olketa frut long grep hemi suit. Bae maos blong yu hemi smel naes tumas long mi, olsem naes smel blong apol frut.

⁹ Ya, bae kis blong yu tu hemi suit, olsem barava nambawan waen. Oraet, letem suit waen ya hemi randaon stret go long maos blong daling blong mi, fo hemi watarem lip blong hem an tit blong hem.

Yang woman hemi tok

¹⁰ Mi blong hem, an hemi laekem mi tumas.

¹¹ !Kam, daling blong mi! Yu kam, mekem yumitufala goawe long bus. An long naet bae yumitufala slip nao midol long olketa wael flaoa.

¹² Bae yumitufala getap eli long moning, an go long olketa plantesin long grep tri fo lukim sapos olketa stat fo garem niu lif long hem, an flaoa blong olketa i open yet. An fo lukim tu sapos olketa pomegranet tri i stat fo garem flaoa long hem. Long ples ya nao, bae mi givim mi seleva fo yu.

¹³ Long ples ya tu, bae yu save smelem olketa mandrek flaoa wea hemi smel naes tumas, an bae olketa naes frut fo kaikaim i stap raonem yumitufala. Daling blong mi, mi bin kipim mi seleva olowe nomoa fo yu.