Nambawan Singsing 6 - Pijin Bible

Olketa woman tok

¹ Talem mifala, yu hu yu barava luknaes tumas winim evri narafala woman. ?Wea nao man blong yu hemi go? Yu talem kam ples wea hemi go long hem, mekem mifala save helpem yu fo faendem hem.

Yang woman hemi tok

² Daling blong mi hemi godaon long gaden blong hem, wea hemi fulap long olketa tri wea lif blong olketa hemi garem gudfala smel. Hemi kaikai long gaden ya, an hemi tekemaot olketa naes flaoa.

³ Daling blong mi hemi lavem mi tumas, mi blong hem an hem blong mi. Hemi olsem nomoa wanfala sipsip wea hemi kaikai midol long olketa naes flaoa ya.

Mekfaev Singsing Yang man hemi tok

⁴ Daling, yu barava luknaes tumas long mi, olsem taon long Tiasa an Jerusalem. Ya, yu barava luk spesol olsem taem olketa soldia i maas.

⁵ Plis yu no luk kam long mi. Yu barava spoelem tingting blong mi taem mi luk long ae blong yu. Hea blong yu hemi muv taem yu muv, olsem olketa blak nanigot i gohed fo ja-jam, taem olketa kamdaon falom maonten long Gilead.

⁶ Olketa tit blong yu hemi barava waet fogud olsem waet sipsip wea olketa jes wasim bodi blong hem klin gudfala, an redi fo katemaot hea blong hem. No eni tit blong yu hemi foldaon, evriwan i laenap gud nomoa.

⁷ Nomata pis kaleko ya hemi satem fes blong yu, bat mi luksave nomoa wea fes blong yu hemi luknaes tumas.

⁸ Nomata yu stap midol long siksti kuin an eiti narafala waef blong king wetem staka yang woman wea no eniwan save kaontem nao,

⁹ bat yu seleva nomoa yu luknaes fogud olsem wanfala kurukuru, an mi laekem yu tumas. Yu seleva nomoa wanfala dota wea mami blong yu hemi garem, an hemi lavem yu tumas winim evri narafala pikinini blong hem. Taem evri yang woman i luk kam long yu, olketa tokhae long yu. Ya, taem evri kuin an evri narafala waef blong king i luk kam long yu, olketa preisim yu.

¹⁰ Olketa tok olsem, “?Hu nao disfala woman wea hemi luknaes tumas olsem moning sta? Hemi barava luknaes fogud olsem mun wea hemi saen long naet an san wea hemi braet long de taem. Ya, hemi barava luk spesol olsem taem olketa sta i saenaot long naet.”

¹¹ Mi bin godaon long plantesin ya blong nat tri fo lukim olketa yang tri insaet long vali. An fo lukim sapos olketa grep tri i garem olketa niufala lif long hem, an sapos olketa pomegranet tri i garem flaoa long hem.

¹² Seknomoa, mi barava seksek fo filhapi, olsem man hu hemi go insaet long kaat blong king.

Olketa woman tok

¹³ !Kambaek, yu gele blong Sulam! !Plis kambaek! Mifala laek fo lukluk long yu. ?Waswe nao yufala laek fo lukluk long mi nomoa, taem mi dans midol long tufala grup?