Nambawan Singsing 5 - Pijin Bible

Yang man hemi tok

¹ Daling, yu nao braed blong mi. Mi kam finis insaet long disfala gaden blong mi. Mi tekem nao wata blong maa tri wetem olketa lif wea hemi garem gudfala smel. Mi hapi tumas fo kaikaim gudfala hani blong mi. Mi dringim nao disfala waen an milk blong mi. Tufala fren, yutufala gohed fo kaikaim tugeta olsem, an gohed fo dring tugeta olsem, go-go yutufala i barava fulap long lav blong yutufala.

Olketa woman tok Mekfoa Singsing Yang woman hemi tok

² Taem mi slip, mi gohed fo tingim nomoa daling blong mi ya. Mi drim wea mi lukim hem, hemi gohed fo noknok kam long doa blong mi. !Lisin kam! Hemi kol kam olsem long mi, “!Openem doa, daling blong mi! Yu barava luknaes tumas long mi, an yu barava gud nao. Plis yu letem mi kam insaet. Hed blong mi hemi tuwet nao long wata blong naet, an hea blong mi hemi tuwet finis long hem.”

³ Bat mi tok olsem, “Mi tekemaot finis kaleko blong mi an mi redi fo slip nao. ?Mi mas werem moa? An mi wasim finis lek blong mi. ?Mi mas mekem hemi doti moa?”

⁴ Daling blong mi hemi putum han blong hem gotru long hol blong doa ya, mekem bele blong mi hemi filnaes tumas.

⁵ Mi stanap nao fo openem doa fo daling blong mi ya. Taem mi holem handol blong doa ya, han blong mi hemi fulap long wata blong maa tri, an olketa fingga blong mi i tuwet finis long wata ya wea hemi smel naes tumas.

⁶ So, mi openem doa fo hemi kam insaet. Bat wea, hemi go finis nao. Mi laekem tumas fo dae nomoa taem mi no herem voes blong hem. Mi lukaotem hem, bat mi nating faendem hem. Mi singaot fo hem, bat hemi nating ansa.

⁷ Olketa sekiuriti long taon ya i lukim mi. Olketa kilim mi an mekem mi garekil. Olketa hu i gadem bikfala wolston blong taon ya, i brekemaot kaleko wea mi kavam long hed blong mi.

⁸ Olketa woman long Jerusalem. Yufala mas mekem strongfala promis: Sapos yufala faendem daling blong mi ya, bae yufala mas talem hem wea mi barava dae tumas fo hem nao.

Olketa woman tok

⁹ Talem mifala, yu hu yu barava luknaes tumas winim evri narafala woman. ?Wanem nao hemi deferen long man blong yu from olketa narafala man? ?Wanem nomoa hemi gud long man ya winim olketa narafala man, mekem mifala promis olsem?

Yang woman hemi tok

¹⁰ Man blong mi ya hemi strong, an hemi barava luknaes tumas. Nomata 10,000 man i kam, bat hemi gud moa winim evriwan.

¹¹ Fes blong hem hemi smut an luknaes tumas olsem gol. An hea blong hem hemi barava blak an hemi sof fogud.

¹² Ae blong hem hemi barava luknaes tumas olsem wanfala kurukuru wea hemi stap kolsap long riva, olsem kurukuru wea hemi barava waet olsem milk, an hemi sidaon saet long wata.

¹³ Fes blong hem hemi naes tumas, olsem gaden wea hemi fulap long olketa tri wea lif blong olketa hemi garem gudfala smel. An maos blong hem hemi fil naes fogud olsem barava naes flaoa wea hemi tuwet long wata blong maa tri.

¹⁴ Tufala am blong hem i strong an naes tumas, olsem gol wea olketa putum olketa barava spesol ston long hem. Bele an sest blong hem hemi smut an had olsem wanfala naes samting wea olketa dekoretem long tit blong elifan an dekoretem long nambawan blu ston.

¹⁵ Tufala lek blong hem i olsem tufala pos wea olketa wakem long nambawan waet ston, an botom blong tufala pos ya, olketa wakem long gol. Taem mi lukim hem, mi tingim olketa strongfala maonten an olketa tolfala sida tri long Lebanon.

¹⁶ Toktok blong hem hemi suit tumas Mi barava lavem hem tumas. Olketa woman blong Jerusalem, hem nao daling blong mi. Hem nao fren blong mi.