Nambawan Singsing 1 - Pijin Bible

¹ “Nambawan Singsing Winim Evri Narafala Singsing”, blong King Solomon.

Fas Singsing Yang woman hemi tok

² Daling blong mi, mi laekem tumas fo yu gohed nomoa fo kisim mi. Lav blong yu fo mi hemi barava suit tumas winim nambawan waen.

³ Mi laekem tumas smel blong disfala oel wea hemi smel naes tumas long bodi blong yu. An nem blong yu tu hemi here naes olsem suit smel blong disfala oel. Hem nao olketa gele save laekem yu tumas.

⁴ Yu olsem king blong mi nao. Plis yu tekem mi. Yumitufala kuiktaem go fo stap insaet long rum blong yu. Bae yumitufala barava hapi tumas, bikos mi barava lavem yu an yu lavem mi tumas winim evrisamting long disfala wol. Hemi fitim fo evri gele nomoa save laekem yu.

⁵ Olketa woman blong Jerusalem, mi blak ya, bat mi luknaes tumas. Nomata mi blak olsem olketa haostent long drae eria long Kedaa, bat mi luknaes tumas olsem olketa nambawan kaleko ya fo mekem haos blong king hemi luk barava spesol.

⁶ Plis no lukdaon long mi bikos mi dak skin. Kala blong mi hemi deferen olsem, bikos olketa brata blong mi i kros long mi an mekem mi fo lukaftarem plantesin grep insaet long hot san. Dastawe nao mi no save lukaftarem gud bodi blong mi seleva.

⁷ Daling blong mi, plis yu talem mi, wea nao oltaem yu tekem go olketa sipsip blong yu fo kaikai, an wea nao olketa res long hem taem san hemi hot. Hemi no fitim fo mi wakabaot seleva fo lukaotem yu long ples wea olketa fren blong yu i lukaftarem sipsip blong olketa.

Yang man hemi tok

⁸ Daling blong mi, yu barava luknaes tumas winim evri narafala woman. Sapos yu no save long ples wea olketa sipsip ya i stap long hem, yu mas falom rod blong olketa, mekem olketa nanigot blong yu save kaikai kolsap long olketa haostent blong olketa man fo lukaftarem sipsip.

⁹ Daling blong mi, taem man hemi luk long yu hemi mas laekem yu nao, olsem olketa man hos wea i pulum kaat fo faet blong king long Ijip, i no save stap kuaet taem olketa lukim mere hos.

¹⁰ Olketa iaring blong yu wea hemi hangdaon long fes hemi luknaes tumas, an nekles wea hemi stap raonem nek blong yu hemi barava luknaes tu.

¹¹ Bae mi wakem iaring long gol fo yu wea mi dekoretem long lelebet silva.

Yang woman hemi tok

¹² King blong mi, taem yu leidaon long longfala sea blong yu, oel wea hemi smel naes long bodi blong mi hemi fulumapem rum ya nao.

¹³ Daling blong mi, mi barava laekem yu tumas. Taem yu leidaon wetem mi yu olsem wanfala samting wea hemi barava smel naes tumas, hemi stap midol long tufala susu blong mi.

¹⁴ Daling blong mi, bodi blong yu hemi smel naes tumas olsem olketa flaoa insaet gaden ya long En-Gedi.

Yang man hemi tok

¹⁵ Daling, yu barava luknaes tumas long mi. Ae blong yu hemi barava luknaes tumas, olsem kurukuru.

Yang woman hemi tok

¹⁶ Daling, yu barava luknaes tumas long mi. Mi hapi tumas long yu. Bae yumitufala go leidaon long gudfala gras ya,

¹⁷ andanit long olketa sida tri an olketa paen tri. Olketa sida tri ya bae i olsem haos blong yumitufala, an olketa paen tri ya bae i olsem ruf long haos ya.