Nambas 35 - Pijin Bible

Olketa taon blong traeb blong Livae

¹ Taem olketa stap long bikfala flat ples blong Moab, long saet blong Jodan Riva, long narasaet long riva from Jeriko, Yawe hemi gohed fo tok olsem long Mosis,

² “Talem pipol blong Israel, taem yufala tekova long lan blong olketa, bae yufala mas givim samfala taon wetem lan blong olketa fo traeb blong Livae fo stap long hem.

³ Olketa taon ya bae i blong olketa fo stap long hem. An olketa lan raonem olketa taon ya bae i blong olketa fo lukaftarem olketa buluka blong olketa wetem olketa narafala animol blong olketa.

^4-5 Saes blong lan ya long evri taon wea yufala givim long olketa long traeb blong Livae hemi olsem: lan hemi mas go raonem evri saet blong taon ya, an waed blong hem hemi mas kasem 450 mita.

^6-7 “Bae yufala mas givim go long traeb blong Livae, foti-eit taon wetem lan fo olketa animol blong olketa. An long olketa taon ya, bae yufala mas makem siksfala taon olsem i olketa taon fo haed. Sapos wanfala man hemi no minim nomoa fo kilim dae narafala man bat man ya hemi dae nao, yufala mas letem disfala man ranawe go fo haed long wanfala long olketa taon ya.

⁸ An namba blong olketa taon wea bae yufala givim long olketa, hemi mas falom saes blong lan blong evri traeb blong yufala. Traeb wea hemi garem plande taon, hemi mas givim plande taon long olketa, an traeb wea hemi no garem plande taon bae hemi mas givim tu-tri nomoa.”

Olketa Taon fo Haed

⁹ Yawe hemi gohed fo tok olsem long Mosis,

¹⁰ “Talem pipol blong Israel wea taem yufala krosim Jodan Riva fo go long Kenan,

¹¹ yufala mas siusim siksfala taon fo kamap olketa taon fo haed. Sapos wanfala man hemi no minim nomoa fo kilim dae narafala man bat man ya hemi dae nao, yufala mas letem disfala man ranawe go fo haed long wanfala long olketa taon ya.

¹² An long datfala taon, hemi save stap sef, bikos famili blong man hu hemi dae bae i no save duim enisamting long hem fo sensimbaek, go-go kasem taem wea hemi go long kot long olketa pipol.

¹³ Bae yufala mas siusim siksfala taon fo haed.

¹⁴ Nao trifala taon olsem bae i stap long saet blong Jodan Riva long ist, an nara trifala bae i stap long narasaet long Kenan.

¹⁵ Olketa taon fo haed i fo yufala, an fo olketa strensa wea i stap kam wetem yufala. Long wei olsem eniwan nomoa wea hemi no minim fo kilim dae narafala man, hemi save ranawe go fo haed long wanfala long olketa taon ya.

^16-19 “Sapos eniwan hemi holem enisamting fo faet wea olketa wakem long aean, o ston, o timba, an hemi kilim dae narafala man, datfala man hemi man fo kil, an yufala mas kilim hem dae. An wantok blong man hu hemi dae, hem nao mas kilim hem dae taem hemi kasem hem.

²⁰ “O sapos eniwan hemi kros an tingting fo spoelem narafala man an hemi kilim man ya dae long eni wei olsem hemi pusum hem foldaon, o hemi sutim hem long ston,

²¹ o hemi kros an faetem hem, oraet, hem tu hemi man fo kil, an yufala mas kilim hem dae. An wantok blong man hu hemi dae, hem nao mas kilim hem dae taem hemi kasem hem.

^22-24 “Bat sapos wanfala man hu hemi no kros an hemi no garem tingting fo spoelem nara man, hemi kilim dae narafala man bat hemi nating minim fo duim, olketa pipol long ples mas mekem kot fo lukluk gudfala long disfala samting. Maet hemi bin pusum narafala man foldaon, o sutim hem long enisamting, o sutim ston long narafala samting, bat hemi kasem man mekem hem dae. Long kot wea olketa pipol mekem, olketa mas faendemaot sapos man hemi minim fo duim o nomoa. An olketa mas tingting long olketa lo ya an talemaot dat wantok blong man dae hemi garem raet fo kilim dae man ya o nomoa.

²⁵ “Sapos olketa save dat dae blong man hemi aksiden nomoa, oraet, olketa mas stopem wantok blong disfala man dae fo no duim enisamting long man hu hemi kilim dae. An olketa mas tekem hem go long wanfala taon fo haed. An hemi mas stap kam long taon ya go-go kasem taem wea Haeprist blong datfala taem hemi dae.

²⁶ Bat sapos man ya hemi go aotsaet from taon fo haed ya,

²⁷ an eni wantok blong man dae ya hemi faendem hem an kilim hem dae, disfala wantok hemi nating fit fo panis long dae ya.

²⁸ Hem olsem bikos man hu hemi bin kilim man dae, hemi mas stap kam nomoa long taon fo haed, go-go kasem taem wea Haeprist hemi dae. Bihaen long datfala taem nomoa, hemi save gobaek moa long hom blong hem.

²⁹ “Olketa lo ya hemi fo yufala evriwan long evri ples blong yufala. An olowe nao yufala mas falom olketa lo ya.

³⁰ “Sapos eniwan hemi kilim dae narafala man, datfala man hemi mas dae tu. Bat yufala mas garem olketa witnes fo talemaot olsem samting ya hemi tru o nomoa, mekem yufala jajem man olsem hemi mas dae. Nao sapos wanfala man nomoa hemi witnes agensim datfala man, toktok blong hem hemi no naf fo yufala jajem datfala man olsem hemi mas dae.

³¹ “Sapos eniwan hemi kilim dae narafala man, yufala mas kilim hem dae. An yufala no save tekem eni seleni fo peimaot laef blong hem mekem hem gofri.

³² An sapos eniwan hemi kilim dae narafala man, bat hemi nating minim fo duim, an hemi ranawe go haed long wanfala long olketa taon fo haed ya, yufala no save tekem eni seleni fo peimaot laef blong hem, mekem hem fri fo gohom. Hemi mas stap long taon fo haed ya, go-go kasem taem wea Haeprist long datfala taem hemi dae.

³³ “Yu save, blad blong man dae hemi save spoelem lan blong yufala. So yufala mas no letem eniwan spoelem lan blong yufala olsem. Dastawe taem blad blong man dae hemi spoelem lan, wanfala wei nomoa hemi stap fo mekem lan hemi kamap klin moa long ae blong mi. Datfala wei nao hemi olsem, yufala mas kilim dae man fo kil ya.

³⁴ “Yufala mas no letem enisamting fo mekem lan blong yufala hemi kamap nogud long ae blong mi, bikos mi Yawe, mi stap kam wetem yufala pipol blong Israel long lan wea yufala stap long hem.”