Nambas 26 - Pijin Bible

Mektu sensas

¹ Bihaen long taem wea ravis sik hemi finis, Yawe hemi tok olsem long Mosis an Haeprist Eleasa, san blong Eron,

² “Yutufala mas mekem sensas fo kaontem olketa man blong Israel. Yufala mas kaontem olketa falom olketa laen an olketa famili long tuelfala traeb blong Israel. Yufala mas raetemdaon nem blong olketa man hu i kasem tuenti yia an goap, an hu i fit fo go faet.”

³ Olketa man i hipap tugeta long bikfala flat ples blong Moab, long narasaet long Jodan Riva from Jeriko. An Mosis an Eleasa i tok olsem long olketa,

⁴ “Mitufala mas kaontem olketa man hu i kasem tuenti yia an goap. Hem nao wanem Yawe hemi talem Mosis fo duim.” Olketa laen blong Israel wea olketa kamaot from Ijip i olsem:

^5-7 Traeb blong Ruben hu hemi fasbon san blong Israel, hemi garem laen blong Hanok, an laen blong Palu, an blong laen blong Hesron, an laen blong Kami. An namba blong olketa man long olketa laen ya i kasem 43,730.

⁸ An long laen blong Palu, Eliab hemi san blong Palu.

⁹ Eliab hemi garem trifala pikinini an nem blong trifala i Nemuel, an Datan, an Abiram. Datan an Abiram nao, olketa siusim tufala fo kamap lida blong olketa, bat tufala nao i bin agensim Mosis an Haeprist Eron, taem tufala joenem Kora fo agensim Yawe.

¹⁰ An long taem wea faea hemi kilim dae Kora wetem 250 man blong hem, an graon hemi open fo sualomdaon olketa, tufala tu i dae wetem Kora. Diswan hemi olsem wanfala woning fo olketa pipol hu i agensim Yawe.

¹¹ Bat olketa pikinini blong Kora i no dae long datfala taem.

^12-14 Traeb blong Simion hemi garem laen blong Nemuel, an laen blong Jamin, an laen blong Jakin, an laen blong Sera, an laen blong Saol. An namba blong olketa man long olketa laen ya i kasem 22,200.

^15-18 Traeb blong Gad hemi garem laen blong Sefon, an laen blong Hagi, an laen blong Suni, an laen blong Osni, an laen blong Eri, an laen blong Arod, an laen blong Areli. An namba blong olketa man long olketa laen ya i kasem 40,500.

^19-22 Traeb blong Jiuda hemi garem laen blong Sela, an laen blong Peres, an laen blong Sera. Nao long laen blong Peres ya, hemi garem tufala smol laen olsem, laen blong Hesron an laen blong Hamul. An namba blong olketa man long olketa laen blong Jiuda i kasem 76,500. Bifoa kam Jiuda hemi garem nara tufala pikinini bat tufala dae long Kenan an no eni laen hemi kamaot from tufala. Nem blong tufala nao i Era an Onan.

^23-25 Traeb blong Isaka hemi garem laen blong Tola, an laen blong Pua, an laen blong Jasub, an laen blong Simron. An namba blong olketa man long olketa laen ya i kasem 64,300.

²⁶ Traeb blong Sebulun, hemi garem laen blong Sered, an laen blong Elon, an laen blong Jaleel.

²⁷ An namba blong olketa man long olketa laen ya i kasem 60,500.

^28-32 Traeb blong Manase, san blong Josef, hemi kamap traeb blong Makia, san blong Manase. Makia hemi olo long laen blong Gilead. Laen blong Gilead hemi garem olketa smol laen olsem: laen blong Yesa, an laen blong Helek, an laen blong Asriel, an laen blong Sekem, an laen blong Semida, an laen blong Hefa.

³³ Nao laen blong Hefa hemi garem wanfala man wea nem blong hem Selofehad. Selofehad hemi nating garem eni pikinini boe, bat hemi garem olketa gele nomoa, wea nem blong olketa, Mala, an Noa, an Hogla, an Milka, an Tiasa.

³⁴ An namba blong olketa man long olketa laen long traeb blong Manase i kasem 52,700.

³⁵ Traeb blong Efrem, san blong Josef, hemi garem laen blong Sutela, an laen blong Bekea, an laen blong Tahan.

³⁶ An laen blong Sutela hemi garem laen blong Eran.

³⁷ An namba blong olketa man long olketa laen ya i kasem 32,500.

^38-41 Traeb blong Benjamin, hemi garem laen blong Bela, an laen blong Asbel, an laen blong Ahiram, an laen blong Sefufam, an laen blong Hufam. An laen blong Bela, hemi garem tufala smol laen olsem: laen blong Ad, an laen blong Naaman. An namba blong olketa man long olketa laen ya i kasem 45,600.

⁴² Traeb blong Dan, hemi garem laen blong Suham.

⁴³ An namba blong olketa man long laen ya i kasem 64,400.

⁴⁴ Traeb blong Asa, hemi garem laen blong Imna, an laen blong Isvi, an laen blong Beraea.

⁴⁵ An laen blong Beraea, hemi garem tufala smol laen olsem: laen blong Heba, an laen blong Malkiel.

⁴⁶ Bifoa kam Asa hemi garem wanfala dota wea nem blong hem Sera.

⁴⁷ An namba blong olketa man long olketa laen ya i kasem 53,400.

⁴⁸ Traeb blong Naftali, hemi garem laen blong Jaseel, an laen blong Guni,

⁴⁹ an laen blong Jesa, an laen blong Silem.

⁵⁰ An namba blong olketa man long olketa laen ya i kasem 45,400.

⁵¹ So namba blong olketa man blong Israel, hemi kasem 601,730.

⁵² Oraet, Yawe hemi tok olsem long Mosis,

⁵³ “Olketa lan wea bae mi givim go long yufala, bae yufala mas divaedem long olketa traeb blong yufala, falom namba blong olketa.

^54-56 Bikfala lan nao bae yu givim go long traeb wea hemi garem plande man long hem, an smolfala lan nao bae yu givim go long traeb wea hemi no garem plande man long hem. Oraet, yufala mas yusim tufala spesol ston fo faendemaot olsem watkaen lan nao bae i go long evri traeb.”

⁵⁷ Nao traeb blong Livae, hemi garem laen blong Geson, an laen blong Kohat, an laen blong Merari.

⁵⁸ An hemi garem olketa narafala laen olsem: laen blong Libni, an laen blong Hebron, an laen blong Mali, an laen blong Musi, an laen blong Kora. Long laen blong Kohat, hemi garem wanfala man long bifoa wea nem blong hem Amram.

⁵⁹ Nao Amram hemi marit long wanfala woman long traeb blong Livae wea nem blong hem Jokebed hu hemi bon long Ijip. Oraet, tufala bonem trifala pikinini, wanfala gele, wea nem blong hem Miriam, an tufala boe, wea nem blong tufala Eron an Mosis.

⁶⁰ An Eron hemi garem fofala san, wea nem blong olketa, Nadab, an Abihu, an Eleasa, an Itama.

⁶¹ Bat Nadab an Abihu, tufala dae long taem wea tufala bonem insens fo Yawe long faea wea hemi no tambu.

⁶² Namba blong olketa man long traeb blong Livae wea i kasem wan mans an goap, hemi 23,000. Bat olketa no kaontem traeb blong Livae tugeta wetem olketa narafala traeb, bikos God hemi no givim eni lan long olketa olsem hemi givim long olketa narafala traeb blong Israel.

⁶³ Hem nao evriwan long olketa traeb blong Israel wea Mosis an Prist Eleasa i kaontem long bikfala flat ples blong Moab, long narasaet long Jodan Riva from Jeriko.

^64-65 Nao Kelab, san blong Jefune, an Josua, san blong Nun, tufala i laef long datfala taem. Bat olketa narafala man wea Mosis an Haeprist Eron i bin kaontem bifoa kam taem olketa stap fastaem long drae eria long Saenae, no eniwan long olketa ya i laef. Hemi olsem bikos Yawe hemi bin talem finis dat olketa evriwan mas dae long drae eria.