Matiu 6 - Pijin Bible

Tising abaotem helpem pua pipol

¹ Jisas hemi sei moa, “Yufala mas lukaot, nogud yufala duim olketa gudfala samting nomoa bikos yufala laekem olketa pipol fo lukim. Sapos yufala duim olsem, Dadi blong yufala long heven bae hemi no givim gudfala samting long yufala ya.

² “So taem yu givim enisamting fo helpem wanfala man, yu mas no trae fo somaot long evriwan, olsem olketa pipol hu i save laea tumas olketa save duim long olketa preahaos an long olketa bikrod long midol long taon. Olketa duim olsem fo mekem olketa pipol tinghae long olketa nomoa. Mi talem yufala tru samting nao, olketa tekem blesing blong olketa finis nao ya.

³ Bat yu ya, taem yu givim enisamting fo helpem eniwan, yu mas duim long wei wea nomata fren blong yu, hemi no save long hem.

⁴ Sapos olsem, yu seleva nomoa yu save long wanem yu givim. An Dadi blong yu nomoa hemi lukim, an bae hem nao hemi givim gudfala samting long yu.”

Tising abaotem prea

⁵ An Jisas hemi sei moa, “Taem yufala prea, yufala mas no duim olsem olketa pipol hu i save laea tumas, wea olketa laekem tumas fo go stanap long preahaos an long olketa bikrod long midol long taon, taem olketa prea. Olketa duim olsem fo mekem olketa pipol save lukim olketa nomoa ya. Mi talem yufala tru samting nao, olketa tekem blesing blong olketa finis ya.

⁶ Bat yu ya, taem yu prea, yu mas go insaet long rum long haos blong yu an yu mas satem doa, an yu save prea long Dadi blong yu wea no eniwan save lukim. An hem nomoa hemi lukim yu, an bae hem nao hemi givim gudfala samting long yu.

⁷ “An taem yufala prea, yufala mas no prea olsem olketa wea olketa no biliv long God, wea olketa go-gohed fo talem enikaen toktok nating nomoa. Olketa tingse sapos olketa talemaot plande toktok, hem nao bae hemi mekem God fo herem olketa.

⁸ Yufala mas no falom wei blong olketa, bikos Dadi blong yufala hemi save finis wanem yufala laekem, nomata yufala no askem hem yet.

⁹ So taem yufala prea, yufala mas prea olsem, ‘Dadi blong mifala long heven, nem blong yu nao hemi mas stap bikfala.

¹⁰ Yu mekem kingdom blong yu fo kam. Yu mekem wanem yu laekem nomoa fo hapen long disfala wol, olsem wea hemi hapen long heven.

¹¹ Yu givim kam kaikai wea hemi fitim mifala fo tude.

¹² Yu fogivim mifala long olketa ravis samting wea mifala duim, olsem mifala tu fogivim olketa hu i duim olketa ravis samting long mifala.

¹³ Yu no letem enikaen samting kam fo traem mifala, bat yu sevem mifala from paoa blong Seitan.

¹⁴ “Nao sapos yufala fogivim olketa pipol hu i duim olketa ravis samting long yufala, bae Dadi blong yufala long heven hemi fogivim yufala tu.

¹⁵ Bat sapos yufala no fogivim olketa nara pipol, bae Dadi blong yufala hemi nating save fogivim yufala long olketa ravis samting wea yufala duim.”

Tising abaotem stop fo no kaikai

¹⁶ An Jisas hemi sei moa, “Taem yufala stop fo no kaikai, yufala mas no duim olsem olketa pipol hu i save laea tumas, wea olketa save mekem fes blong olketa fo luk sore taem olketa stop fo no kaikai. Olketa duim olsem fo mekem olketa pipol i save lukim nomoa ya. Bat mi talem yufala tru samting nao, olketa tekem blesing blong olketa finis taem olketa pipol i tinghae long olketa ya.

¹⁷ Bat yu ya, taem yu stop fo no kaikai, yu mas wasim fes blong yu an stretem hea blong yu,

¹⁸ mekem no eniwan hemi luksave dat yu stop fo no kaikai. Bat Dadi blong yu wea no eniwan save lukim, hem nomoa hemi lukim an bae hem nao hemi givim gudfala samting long yu.”

Tising abaotem risis long heven

¹⁹ An Jisas hemi sei moa, “Yufala mas no hipimap olketa risis blong yufala long disfala wol. Bikos olketa kokoros an rasta i save spoelem nomoa, an olketa man fo stil olketa save brekem haos fo stilim risis ya tu.

²⁰ Bat yufala mas hipimap olketa risis blong yufala long heven, wea no eni kokoros an no eni rasta save spoelem. An long heven, no eni man fo stil save brekem haos fo stilim olketa risis ya tu.

²¹ Bikos ples wea risis blong yu hemi stap long hem, long ples ya nao tingting blong yu hemi stap long hem tu.

Gudfala tising hemi olsem laet

²² “Ae blong yu nao hemi mekem bodi blong yu fo garem laet. So sapos ae blong yu hemi gud, bae bodi blong yu hemi laet tu ya.

²³ Bat sapos ae blong yu hemi nogud, bae bodi blong yu hemi tudak tu. So sapos no eni laet hemi stap long yu bat hemi tudak nomoa, bae yu barava tudak nao ya.”

Tising abaotem wei fo trastem God

²⁴ An Jisas hemi sei moa, “No eniwan hemi save waka fo tufala deferen masta. Bae hemi laekem wanfala, an bae hemi no laekem narawan ya. An bae hemi tinghae long wanfala, an bae hemi no tinghae long narawan ya nao. So yu no save tinghae long God an long risis blong wol tu, olsem tufala masta blong yu.

²⁵ “Hem nao mi talem long yufala, yufala mas no wari abaotem wanem nao bae yufala kaikaim an dringim fo mekem yufala stap laef. An yufala mas no wari tu abaotem wanem nao bae yufala werem long bodi. Bikos laef nao hemi bikfala samting moa winim kaikai, an bodi nao hemi bikfala samting moa winim kaleko wea yufala werem ya.

²⁶ Yufala tingting fastaem long olketa bed wea olketa flae olobaot ya. Olketa nating wari fo wakem eni gaden o fo tekem kaikai kam from gaden fo hipimap long eni haos tu. Bat nomata olsem, Dadi blong yufala long heven, hemi fidim olketa bed ya. Bat yufala ya, yufala nao bik samting long ae blong God winim olketa bed ya.

²⁷ An nomata yufala wari tumas long laef blong yufala, yufala no save mekem laef blong yufala fo stap lelebet longtaem go moa.

²⁸ “An yufala mas no wari abaotem kaleko fo werem. Yufala tingting gud fastaem long olketa flaoa wea olketa grou olobaot ya. Olketa no duim eni waka an olketa no mekem eni kaleko.

²⁹ Bat mi talem long yufala, olketa flaoa ya i barava lukgud tumas winim King Solomon, hu hemi ris tumas an werem enikaen barava spesol kaleko blong hem.

³⁰ Nao olketa flaoa olobaot ya, olketa save stap fo lelebet taem nomoa, an bihaen ya, olketa pipol save torowem olketa go long faea. Bat nomata olsem, God hemi givim samting wea hemi lukgud tumas fo olketa werem. ?Bat yufala tingse bae God hemi no save givim kaleko long yufala? Biliv blong yufala hemi smolfala tumas ya.

³¹ “Yufala mas no wari an sei, ‘?Wanem nao bae yumi kaikaim an dringim, an wanem nao bae yumi werem?’

³² Olketa hu i no biliv long God nao, olketa save wari oltaem abaotem olketa samting olsem. Bat yufala ya, Dadi blong yufala long heven, hemi save finis wea yufala laekem olketa samting ya.

³³ Bat fas samting yufala mas duim, yufala mas aftarem kingdom blong God, an yufala mas tingim tu fo duim wanem hemi laekem. Sapos olsem, God nao bae hemi givim kam olketa narasamting ya long yufala.

³⁴ So yufala mas no wari abaotem wanem bae hemi hapen tumoro. Letem go fo tumoro nao. Evri de hemi garem olketa wari wea hemi naf fo hem seleva.”