Matiu 25 - Pijin Bible

Tokpiksa abaotem tenfala yang gele

¹ Nao Jisas hemi sei moa, “Long taem ya, kingdom long Heven bae hemi olsem tenfala gele wea olketa tekem olketa lam blong olketa an olketa go fo mitim wanfala man hu hemi redi fo marit.

² Nao faefala long olketa gele ya, olketa nating garem gudfala tingting, bat nara faefala olketa garem gudfala tingting.

³ Faefala gele hu olketa nating garem gudfala tingting ya, olketa tekem olketa lam nomoa, bat olketa no tekem lelebet oel moa wetem olketa.

⁴ Bat faefala gele hu olketa garem gudfala tingting ya, olketa tekem go olketa lam, an olketa tekem go oel long botol wetem olketa tu.

⁵ Nao disfala man fo marit ya, hemi no kam kuiktaem. So tenfala gele ya, olketa weitem hem go-go olketa taet tumas an olketa slip nao.

⁶ “Bat kasem long midol long naet nomoa, wanfala man hemi singaot olsem kam nao, ‘!Olketa! !Man fo marit ya hemi kam nao, yufala kam fo mitim hem!’

⁷ Long taem ya, tenfala gele ya olketa wekap nomoa, an olketa mekredi long olketa lam nao.

⁸ Nao faefala gele wea olketa no garem gudfala tingting ya, olketa tok olsem long nara faefala ya, ‘Plis, yufala givim kam lelebet oel long mifala, bikos evri lam blong mifala i kolsap emti nao.’

⁹ Bat nara faefala gele ya olketa sei nao, ‘!Ei, oel wea mifala garem hemi no fitim yumi evriwan ya! Yufala go an baem oel fo yufala seleva long stoa.’

¹⁰ Bat taem olketa go fo baem oel nomoa, disfala man fo marit ya hemi kam nao. So nara faefala gele wea olketa redi finis ya, olketa go wetem hem nao. An taem olketa go insaet finis long ples blong fist blong marit, doa ya olketa satem nao.

¹¹ “Nao bihaen lelebet taem, nara faefala gele ya, olketa jes kam nao an olketa singaot kam olsem, ‘!Plis bikman, yu openem kam doa ya fo mifala!’

¹² Bat man ya hemi sei, ‘Mi talem yufala tru samting nao. Mi nating save long yufala ya.’”

¹³ Nao Jisas hemi finisim tokpiksa ya olsem, “So yufala mas lukaot gudfala ya, bikos yufala nating save long barava de an taem blong olketa samting ya.”

Tokpiksa abaotem taem wea Masta bae hemi kambaek

¹⁴ Nao Jisas hemi sei moa, “Long taem ya, bae hemi olsem taem wanfala bos hemi redi fo go long nara ples, an hemi talem long olketa wakaman blong hem fo kam long hem, mekem hemi givim samting long han blong olketa fo lukaftarem.

¹⁵ An hemi givim plande seleni long olketa falom save blong olketa. Long wanfala hemi givim faefala bikfala seleni, long narawan hemi givim tufala, an long narawan hemi givim wanfala. Bihaen nao, hemi go long nara ples.

¹⁶ Semtaem nomoa, disfala man hu hemi tekem faefala bikfala seleni ya, hemi go fo mekem bisnis long hem nao an hemi winim kam nara faefala moa.

¹⁷ Long sem wei tu, disfala man hu hemi tekem tufala seleni ya, hemi go fo mekem bisnis long hem an hemi winim kam nara tufala moa.

¹⁸ Bat disfala man hu hemi tekem wanfala seleni ya, hemi go digim hol nomoa an hemi berem disfala seleni blong bos blong hem long insaet hol ya nao.

¹⁹ “Bihaen lelebet longtaem, disfala bos blong olketa wakaman ya hemi kambaek nao. Nao hemi wande fo faendemaot hao olketa wakaman blong hem olketa yusim seleni blong hem.

²⁰ So disfala man hu hemi tekem faefala bikfala seleni ya hemi kam nao, an hemi tekem kam moa nara faefala an hemi sei, ‘Bos, lastaem yu givim faefala seleni long mi ya, bat lukim, mi winim kam nara faefala moa ya.’

²¹ Long taem ya, bos blong hem hemi sei, ‘!Oo gud tumas! Yu ya, yu gudfala wakaman wea yu kipim promis olowe ya. Yu bin lukaftarem gud disfala smolfala waka ya, olsem, bae mi putum yu fo lukaftarem plande samting moa. Yu kam an joen wetem mi fo gohed fo hapi olowe.’

²² “Nao disfala man hu hemi tekem tufala bikfala seleni ya, hemi kam tu an hemi sei, ‘Bos, lastaem yu givim kam tufala seleni long mi ya, bat lukim, mi winim kam nara tufala moa ya.’

²³ Long taem ya, bos blong hem hemi sei long hem tu, ‘!Oo gud tumas! Yu ya, yu gudfala wakaman wea yu kipim promis olowe ya. Yu bin lukaftarem gud disfala smolfala waka ya, olsem, bae mi putum yu fo lukaftarem plande samting moa. Yu kam an joen wetem mi fo gohed fo hapi olowe.’

²⁴ “Nao disfala man hu hemi tekem wanfala bikfala seleni ya hemi kam, an hemi sei, ‘Bos, mi save dat yu wanfala had man tumas ya. Yu save tekem kaikai long gaden wea olketa nara pipol nao olketa bin plantem olketa samting long hem.

²⁵ Mi fraetem yu ya, so mi haedem nomoa seleni blong yu insaet long graon. Lukim, hem nao seleni blong yu.’

²⁶ “Long taem ya nomoa, bos blong hem ya hemi sei long hem nao, ‘!Oo yu ravis wakaman! !Yu les tumas ya! Ya, yu save tru wea mi save tekem kaikai long gaden wea olketa nara pipol nao olketa bin plantem olketa samting long hem.

²⁷ ?So waswe nao yu no bin putum seleni blong mi long bank, mekem taem mi kambaek fo tekem, mi save tekem wetem lelebet seleni wea hemi winim?’

²⁸ ‘Yufala tekemaot seleni ya from han blong man ya, an yufala givim go long man ya wetem tenfala seleni ya.

²⁹ Bikos eniwan hu hemi yusim gud wanem hemi garem, bae mi givim go samfala moa long hem, an bae hemi garem plande nao. Bat eniwan hu hemi no yusim gud wanem hemi garem, nomata lelebet samting wea hemi garem, bae mi tekemaot from hem nomoa.

³⁰ Yufala torowem disfala nogud wakaman ya long aotsaet long dak ples nao. Long ples ya bae olketa go-gohed fo krae nomoa an fo sore bikfala nao.’”

Tising blong Jisas abaotem taem bae hemi jajem evriwan long wol

³¹ Nao Jisas hemi sei moa, “Taem mi San Blong Man, mi kambaek wetem saen blong paoa blong God an wetem evri enjel blong mi, bae mi sidaon fo rul long paoa blong God.

³² An bae evri pipol blong evri kantri long wol, olketa hipap kam long frant blong mi. An bae mi divaedem olketa long tufala deferen seksin olsem wea man fo lukaftarem sipsip hemi divaedem olketa sipsip fo stap deferen from olketa nanigot.

³³ Long taem ya, bae mi putum olketa pipol wea olketa stret long ae blong God, fo olketa stap long raetsaet blong mi, an olketa nara pipol, bae olketa stap long lefsaet blong mi.

³⁴ An bihaen moa, mi disfala King, bae mi tok olsem long olketa pipol hu olketa stap long raetsaet blong mi, ‘Yufala nao wea Dadi blong mi hemi blesim yufala, yufala kam an tekem olketa samting long kingdom long Heven, wea hemi mekredi long hem finis fo yufala taem hemi stat fo mekem disfala wol.

³⁵ Taem mi hanggre, yufala nao givim kam kaikai long mi, an taem mi wande fo dring, yufala nao givim wata long mi. Taem mi no garem eni ples fo stap long hem, yufala nao tekem mi go long haos blong yufala,

³⁶ an taem mi no garem enisamting fo werem, yufala nao givim kaleko long mi. Taem mi sik, yufala lukaftarem mi, an taem mi stap long prisin, yufala nao kam fo lukim mi.’

³⁷ “Long taem ya, bae olketa pipol wea olketa stret long ae blong God olketa askem mi olsem nao, ‘?Masta, bat long wataem nao mifala lukim dat yu hanggre an mifala givim kaikai long yu, an wea yu wande fo dring an mifala givim wata long yu?

³⁸ ?An wataem nao yu no garem eni ples fo stap long hem an mifala tekem yu go long haos blong mifala, an yu no garem enisamting fo werem an mifala givim kaleko long yu?

³⁹ ?An wataem nao mifala lukim dat yu sik o yu stap long prisin an mifala go fo lukim yu?’

⁴⁰ Long taem ya, mi disfala King ya, bae mi ansarem olketa olsem, ‘Mi talem yufala tru samting nao, taem yufala duim kam enisamting long eniwan long olketa brata o sista blong mi hu hemi lou tumas, yufala duim diswan long mi nao ya.’

⁴¹ “Bihaen moa, bae mi tok olsem long olketa pipol hu olketa stap long lefsaet blong mi, ‘Yufala wea God bae hemi panisim yufala, yufala goawe from mi. Ples blong yufala nao hemi longwe insaet long faea wea hemi no save finis ya, wea God hemi mekredi fo Seitan an olketa enjel blong hem.

⁴² Taem mi hanggre, yufala nating givim eni kaikai long mi, an taem mi wande fo dring, yufala nating givim wata long mi.

⁴³ Taem mi no garem eni ples fo stap long hem, yufala nating tekem mi go long haos blong yufala, an taem mi no garem enisamting fo werem, yufala nating givim kaleko long mi. An taem mi sik an taem mi stap long prisin, yufala nating kam fo lukim mi.’

⁴⁴ “Long taem ya, bae olketa pipol ya olketa askem mi olsem tu, ‘?Masta, bat long wataem nao mifala lukim dat yu hanggre o yu wande fo dring o yu no garem eni ples fo stap long hem o yu no garem enisamting fo werem o yu sik o yu stap long prisin, an mifala no duim enisamting fo helpem yu?’

⁴⁵ An long taem ya, bae mi ansarem olketa olsem, ‘Mi talem yufala tru samting nao, taem yufala no duim enisamting fo helpem eniwan long olketa pipol hu olketa lou tumas ya, yufala no duim enisamting fo helpem mi nao ya.’

⁴⁶ Nao olketa pipol ya, bae olketa panisim olketa olowe nao. Bat olketa pipol wea olketa stret long ae blong God bae olketa garem tru laef wea hemi no save finis.”