Matiu 16 - Pijin Bible

Mektu taem Jisas no wiling fo mekem wanfala spesol saen

¹ Long wanfala taem, samfala Farasi an samfala Sadiusi olketa kam fo trikim Jisas. So olketa askem hem fo mekem wanfala saen fo somaot sapos hemi tru wea God nao hemi sendem hem fo kam.

² Bat Jisas hemi sei long olketa, “Yufala ya, taem hemi kolsap tudak, yufala sei, ‘Bae no eni ren hemi kam ya bikos skae hemi red.’

³ An long eli moning, yufala save sei, ‘Bae hemi ren ya bikos skae hemi red an hemi dak tumas.’ Yufala save hao fo luksave long olketa samting long skae, bat yufala nating save luksave long mining blong olketa saen blong disfala taem.

⁴ “Maewat, yufala olketa pipol blong distaem ya, wei blong yufala hemi ravis an yufala no kipim yufala seleva fo God. Yufala wande fo lukim wanfala spesol saen, bat bae mi no som eni spesol saen long yufala. Saen wea bae yufala save lukim nomoa, hemi disfala saen blong Jona.” An hemi lusim olketa an hemi go moa.

Jisas tok agensim tising blong olketa lida blong Jiu

⁵ Taem olketa go long narasaet long leik ya, olketa disaepol olketa nating tingim nomoa fo tekem go bred wetem olketa. Nao Jisas hemi tok olsem long olketa,

⁶ “Yufala mas lukaot long diskaen yist blong olketa Farasi an olketa Sadiusi.”

⁷ Olketa disaepol olketa gohed fo stori tugeta long olketa seleva olsem, “Maet Jisas hemi tok olsem bikos yumi no tekem kam eni bred ya.”

⁸ Bat Jisas hemi save nomoa long wanem olketa talem, so hemi sei, “!Biliv blong yufala hemi smolfala tumas ya! ?Waswe nao yufala wari tumas from diswan wea yufala no garem eni bred?

⁹ ?Yufala nating minim yet? ?Waswe, yufala fogetem finis haomas basket nao yufala fulumapem, taem mi searemaot faefala bred nomoa long 5,000 man ya?

¹⁰ ?Waswe, yufala fogetem finis tu haomas basket nao yufala fulumapem, taem mi searemaot sevenfala bred nomoa long 4,000 man ya?

¹¹ Mi no toktok long yufala abaotem bred ya. ?Waswe nao yufala nating minim? Diskaen yist blong olketa Farasi an olketa Sadiusi nao yufala mas lukaot long hem ya.”

¹² Olketa disaepol i jes save nao dat Jisas hemi no minim fo talem olketa fo lukaot long yist blong bred ya, bat long diskaen tising blong olketa Farasi an olketa Sadiusi ya.

Pita talemaot dat Jisas nao barava Mesaea

¹³ Taem Jisas hemi kasem eria kolsap long taon long Sisaria Filipae, hemi askem olketa disaepol olsem, “?Waswe, olketa pipol tingse hu nao mi San Blong Man?”

¹⁴ Nao olketa sei, “Samfala pipol olketa sei yu Jon Baptaes ya, an samfala sei yu profet Elaeja ya. An samfala moa, olketa sei yu nao profet Jeremaea o wanfala long olketa nara profet blong bifoa kam ya.”

¹⁵ Nao Jisas hemi askem olketa moa olsem, “?Bat waswe long yufala? ?Yufala tingse hu nao mi?”

¹⁶ So long taem ya nomoa, Saemon Pita hemi sei nao, “Masta, yu nao disfala Mesaea ya. Yu ya, yu San Blong God hu hemi laef ya.”

¹⁷ Nao Jisas hemi sei long Saemon, “Saemon san blong Jona, yu save hapi tumas ya, bikos wanem yu talemaot abaotem mi, i no man nao hemi somaot long yu ya. Bat Dadi blong mi long heven, hem nao hemi somaot diswan long yu.

¹⁸ So mi talem long yu, yu nao Pita wea yu olsem wanfala ston ya. An antap long disfala bikfala ston ya bae mi wakem sios blong mi long hem. An nomata paoa blong dae, bae hemi no save fo winim disfala sios.

¹⁹ Bae mi givim yu olketa ki blong disfala kingdom long Heven. So wanem yu stopem long disfala wol, God hemi stopem tu, an wanem yu letem long disfala wol, God hemi letem tu.”

²⁰ Bihaen long diswan, Jisas hemi tokstrong long olketa disaepol fo no talemaot long eniwan wea hemi Mesaea ya.

Jisas tokabaotem dae blong hem

²¹ Stat long taem ya, Jisas hemi go-gohed fo talemaot klia long olketa disaepol olsem, “Mi mas go long Jerusalem, an bae olketa hedprist an olketa tisa blong Lo an olketa nara bikman moa bae olketa meksave long mi an bae olketa kilim mi dae. Bat long mektri de, bae mi laefbaek moa.”

²² Long taem ya, Pita hemi tekem Jisas go seleva an hemi tokstrong long hem olsem, “!Ei, Masta! Yu no tok olsem. !God hemi mas no letem diswan fo hapen long yu!”

²³ Bat Jisas hemi taneraon nomoa, an hemi tok go long Pita olsem, “!Seitan, yu giraot! !Yu no trae fo stopem mi olsem! Wanem yu talem ya, hemi no tingting blong God ya bat hemi tingting blong man nomoa.”

Jisas talemaot dat olketa hu i falom hem mas wiling fo dae tu

²⁴ Bihaen, Jisas hemi sei long olketa disaepol blong hem, “Sapos eniwan hemi wande fo kam falom mi, hemi mas no tingim hem seleva nomoa, bat hemi mas wiling fo karim kros blong hem an falom mi.

²⁵ Eniwan hu hemi wande fo sevem laef blong hem seleva, bae hemi lusim tru laef blong hem ya. Bat eniwan hu hemi lusim laef blong hem fo mi, bae hem nao hemi sevem tru laef blong hem ya.

²⁶ ?Nomata sapos eniwan hemi winim evrisamting long disfala wol, bat sapos hemi lusim tru laef blong hem from diswan ya, waswe, bae olketa samting ya save helpem hem? Nomoa ya. ?An wanem nao bae hemi givim, mekem hemi save tekembaek moa laef blong hem?

²⁷ “Bae mi San Blong Man, mi kambaek moa wetem saen blong bikfala paoa blong Dadi blong mi an wetem olketa enjel blong hem. Long taem ya, bae mi givim gudfala samting long evriwan fitim waka wea olketa bin duim.

²⁸ An mi talem yufala tru samting nao, samfala long yufala hu i stanap long hia, bifoa yufala dae, bae yufala lukim mi San Blong Man, mi kam long kingdom blong mi.”