Levitikas 12 - Pijin Bible

Wei fo mekem woman hu hemi jes bonem pikinini fo kamap klin moa long ae blong Yawe

¹ Yawe hemi tok olsem long Mosis,

² “Talem olketa blong Israel, sapos eni woman hemi bonem pikinini boe, oraet, hemi no klin long ae blong mi go kasem sevenfala de. Hemi no klin long ae blong mi olsem long taem wea hemi lukim mun.

³ Long mekeit de blong hem, bae olketa mas mekem kate long pikinini ya.

⁴ An bihaen, woman ya hemi no klin yet long ae blong mi fo teti-tri de moa bikos hemi lusim blad blong hem long datfala taem. So long olketa de, hemi mas no tasim olketa samting wea hemi holi, an hemi mas no kam insaet long ples blong Tambu Haostent.

⁵ “An sapos eni woman hemi bonem pikinini gele, oraet, hemi no klin long ae blong mi go kasem fotin de. Hemi no klin long ae blong mi olsem long taem wea hemi lukim mun. An bihaen, woman ya hemi no klin yet long ae blong mi fo siksti-siks de moa bikos hemi lusim blad blong hem.

⁶ “Sapos woman hemi bonem wanfala pikinini an taem wea hemi no klin long ae blong mi hemi finis, oraet, hemi mas tekem kam wanfala smolfala sipsip wea hemi kasem wan yia, an givim long prist long doa blong Tambu Haostent. Smolfala sipsip ya hemi fo mekem sakrifaes wea hemi barava bone. An hemi mas tekem kam wanfala yang pisin o wanfala kurukuru fo mekem sakrifaes fo mekem hem seleva stret moa long ae blong mi.

⁷ Den prist hemi mas tekem kam tufala samting ya, an sakrifaesim long mi fo mekem woman ya klin moa long ae blong mi. Hem nao olketa lo wea eni woman hemi mas falom bihaen long taem wea hemi bonem pikinini, nomata hemi boe o hemi gele.

⁸ “Sapos woman ya hemi pua tumas, an hemi no save tekem kam smolfala sipsip, oraet, hemi save tekem kam tufala kurukuru o tufala yangfala pisin, wanfala fo sakrifaes wea hemi barava bone, an narafala fo mekem hem stret moa long ae blong mi. Den prist hemi mas tekem kam tufala bed ya, an sakrifaesim long mi fo mekem woman ya klin moa long ae blong mi”