Lamentesin 5 - Pijin Bible

Profet hemi prea long Yawe fo hemi sore long olketa

¹ Yawe, plis yu tingim disfala trabol wea hemi kasem mifala. Lukim tu wea mifala sem tumas.

² Olketa lan wea yu bin givim long mifala, an olketa haos blong mifala tu, distaem i stap long han blong olketa strensa.

³ Mifala kamap olsem pikinini wea mami an dadi i lus, an olketa mami blong mifala i olsem wido.

⁴ Mifala mas baem wata, an faeawud hemi dia tumas.

⁵ Olketa enemi gohed fo mekful long mifala, mekem mifala i taet tumas, an no save res.

⁶ Mifala bin putum mifala seleva andanit long paoa blong Ijip an Asiria, mekem mifala save garem kaikai fo stap laef.

⁷ Olketa grani blong mifala long bifoa i sin, bat olketa evriwan i dae finis, an distaem mifala safa nomoa from sin blong olketa.

⁸ Olketa wakaman nomoa i rul ovarem mifala, an no eniwan save tekem mifala aot from paoa blong olketa.

⁹ Mifala mas go long bus, fo lukaotem kaikai, bat mifala no sef bikos man fo kil an stil i stap olobaot.

¹⁰ Mifala hanggre tumas, mekem mifala garem fiva wea bodi hemi barava hot fogud olsem aven.

¹¹ Olketa enemi i reipem olketa woman long Jerusalem, an olketa gele tu long evri vilij long Jiuda.

¹² Olketa hangem olketa lida blong mifala, an olketa no tinghae long olketa olo.

¹³ Olketa fosim olketa yangman, fo pusum hevi ston fo krasim wit fo mekem flaoa. An olketa boe mas karim hevi bandol faeawud.

¹⁴ Olketa lida i no sidaon moa long miting ples blong olketa taon, an olketa yanga i no mekem miusik moa.

¹⁵ Mifala no save hapi. Bifoa, mifala save dans fo hapi, bat distaem mifala gohed fo sore an krae nomoa.

¹⁶ Olketa samting wea mifala bin praod long hem, distaem i samting nating nomoa. !Sore tumas long mifala, bikos mifala sin!

¹⁷ From panis ya mifala filnogud tumas, an mifala gohed fo sore an krae go-go mifala no save lukluk nao.

¹⁸ Mifala gohed fo sore an krae bikos maonten long Saeon hemi kamap emti ples wea olketa wael dog nomoa i stap long hem.

¹⁹ Bat yu, Yawe, yu nao yu king fo evritaem olowe.

²⁰ ?Waswe nao yu oltaem fogetem mifala? ?Waswe nao yu gohed fo les long mifala enitaem?

²¹ O Yawe, plis yu tekem mifala kambaek long yu, mekem mifala save stap hapi olsem bifoa.

²² ?Bat wea, yu les long mifala tumas? ?Kros blong yu bae hemi no save finis?