Lamentesin 3 - Pijin Bible

Nomata hemi panis, bat Jerusalem hemi trastem Yawe (Profet hemi tok)

¹ Mi nao wanfala man wea mi savegud long wei wea Yawe hemi panisim eniwan, taem hemi kros fogud long hem.

² Hemi ronem mi aot from delaet, mekem mi stap long tudak.

³ Hemi gohed fo wipim mi nogud, stat long moning go-go kasem tudak.

⁴ Panis ya blong hem hemi mekem mit an skin blong mi i olsem oloman, an hemi brekem olketa bon blong mi.

⁵ Hemi mekem mi fo safa, an mekem laef hemi had tumas, olsem wea enemi hemi raonem taon fo spoelem hem finis.

⁶ Hemi mekem mi fo stap long tudak, olsem man wea hemi dae longtaem bifoa kam.

⁷ Hemi olsem wea hemi taemapem mi long hevi sen, an putum mi long prisin, mekem mi no save ranawe.

⁸ Nomata mi kraeaot go long hem, bat hemi les fo lisin long prea blong mi.

⁹ Hemi olsem wea hemi blokem rod blong mi long bikfala wolston, an mekem rod ya hemi had fogud.

¹⁰ Hemi weitem mi, olsem wea animol ya bea o laeon hemi we-weit fo kasholem enisamting fo kaikaim.

¹¹ Hemi kasholem mi, an pulum mi aot from rod, an pisisim mi, an livim mi long ples wea no eniwan save helpem mi.

¹² Hemi olsem man fo sutim bou, an hemi tagetem mi long olketa aro blong hem.

¹³ Olketa aro hemi sutim mi long hem, i kasem haat blong mi.

¹⁴ Olketa pipol blong mi evriwan i gohed fo mekfan long mi. Olketa mekem singsing fo laflaf nomoa, stat long moning go-go kasem tudak.

¹⁵ Hemi spoelem laef blong mi olsem wea kaikai blong mi hemi roten, an dring blong mi hemi saoa.

¹⁶ Hemi pusum mi godaon long dast, an step long mi, wea fes blong mi hemi bangam graon, an olketa tit blong mi i brek long ston.

¹⁷ Mi no save stap moa long piis, an mi fogetem nao wei wea mi save stap gudfala.

¹⁸ So mi tingting wea strong blong mi hemi finis, an mi no save weitem Yawe moa fo hemi helpem mi.

¹⁹ Oltaem mi tingting long trabol blong mi, wea mi barava filnogud tumas, olsem wea mi no garem hom fo res long hem, an mi fil olsem wea mi dringim poesen.

²⁰ Evritaem mi tingabaotem disfala samting, tingting blong mi hemi nogud tumas.

²¹ Bat nomata olsem, narafala samting nao mi tingabaotem, an hemi liftimap moa tingting blong mi:

²² Wei blong Yawe fo tinghevi long yumi, hemi no save finis. Wei blong hem fo sore an kaen long yumi, hemi gohed olowe nomoa.

²³ Ya, olketa wei ya blong Yawe hemi gohed olowe, olsem niufala de wea hemi kamap long evri moning. Yawe, mi preisim yu fo disfala wei wea mifala save trastem yu olowe.

²⁴ Mi tingting olsem, “Yawe nao hemi evrisamting mi nidim, dastawe nao mi save gohed fo trastem hem.”

²⁵ Yawe hemi blesim olketa hu i trastem hem, an long olketa hu i laekem tumas fo savegud long hem.

²⁶ Hemi gud sapos yumi stap kuaet, an we-weitem fo hemi kam sevem yumi.

²⁷ Hemi gud sapos yumi mas lanem wei ya long taem wea yumi yang yet.

²⁸ Sapos Yawe hemi mekem eniwan fo safa, hemi gud fo hem sidaon seleva, long ples wea hemi kuaet.

²⁹ Hemi gud fo hemi mekem hem seleva lou, bikos maet gudfala samting hemi hapen yet.

³⁰ Sapos pipol laek fo hitim hem long fes, hemi mas no trae fo stopem olketa. Hemi gud nomoa fo hemi letem olketa fo mekful long hem.

³¹ Masta ya hemi no save gohed fo les long yumi fo evritaem olowe.

³² Nomata hemi save mekem yumi fo safa, bat bae hemi save sore an kaen long yumi, bikos hemi tinghevi long yumi olowe.

³³ Hemi no filhapi taem hemi mekem olketa pipol fo safa, an mekem trabol fo kasem olketa.

³⁴ God hemi save, taem enemi hemi step long yumi taem yumi stap long prisin.

³⁵ God hu hemi hae tumas hemi save nomoa, taem pipol i tekemaot olketa raet blong yumi.

³⁶ Masta ya hemi save tu, taem jaj hemi no falom stret wei fo jajem yumi long kot.

³⁷ ?Waswe, man save mekem enisamting fo hapen, sapos Masta ya hemi no letem?

³⁸ God hu hemi hae tumas nomoa save tok, an mekem gudfala samting o bikfala trabol fo kamap.

³⁹ ?Waswe, yumi garem raet fo komplen taem panis hemi kasem yumi from sin blong yumi?

⁴⁰ Hemi gud fo yumi luklukgud long olketa wei blong yumi, mekem yumi lusim eni nogud wei, an kambaek long Yawe.

⁴¹ Hemi gud fo yumi liftimapem haat an han blong yumi long God hu hemi stap long heven, an yumi prea go long hem olsem,

⁴² “Mifala sin, an mifala agensim yu, bat yu no fogivim mifala yet.

⁴³ “Bikfala kros blong yu hemi mekem yu fo aftarem mifala an kilim mifala dae, an yu no save sore long mifala.

⁴⁴ Bikfala kros blong yu hemi olsem klaod wea hemi tik tumas, mekem olketa prea blong mifala hemi no save kasem yu.

⁴⁵ Yu mekem mifala fo kamap olsem hip long ravis long tingting blong pipol long wol.

⁴⁶ “Olketa enemi i gohed fo laf an mekfan long mifala.

⁴⁷ Mifala safa tumas, an plande trabol tu hemi kasem mifala. Mifala i fraet fogud, an laef blong mifala hemi barava nogud tumas.”

(Profet hemi gohed fo tok)

⁴⁸ Mi krae bikfala, wea tias blong mi hemi gohed fo ran kamdaon olsem riva bikos yu spoelem olketa pipol blong mi.

⁴⁹ Bae mi gohed fo krae bikfala olowe, an mi no save stop,

⁵⁰ go-go kasem taem wea Yawe hu hemi stap long heven, hemi luk kamdaon long trabol ya.

⁵¹ Taem mi lukim trabol wea hemi kasem olketa woman blong disfala taon, mi barava sore an krae fogud.

⁵² Nomata mi no duim enisamting long olketa, bat olketa enemi i kam handing long mi olsem wea i kasholem bed long trap.

⁵³ Olketa laek fo kilim mi dae, so olketa torowem mi go long wanfala hol, an sutim mi long ston.

⁵⁴ Hemi olsem wea wata hemi kavaremapem mi, nao mi tingse bae mi dae nao.

⁵⁵ Bat long insaet long hol ya, mi kraeaot go long yu olsem,

⁵⁶ “!O Yawe, plis yu no satem ia blong yu taem mi krae go long yu!” An yu lisin kam long mi.

⁵⁷ Yu kam kolsap fo helpem mi, an yu tok olsem, “Yu no fraet.”

⁵⁸ O Masta, yu kam an saet wetem mi, an yu sevem laef blong mi.

⁵⁹ Yu lukim finis long wei wea olketa enemi i spoelem mi. Bat distaem, plis yu jaj long stretfala wei, an som wea mi nao stret.

⁶⁰ Yu savegud wea olketa enemi blong mi i heitem mi, an mekem plan agensim mi.

⁶¹ O Yawe, yu herem wea olketa toknogud long mi, an mekem plan agensim mi.

⁶² Olketa gohed fo tokagensim mi, stat long moning go-go kasem tudak.

⁶³ Oltaem nomoa, olketa gohed nomoa fo mekem singsing fo laflaf, stat long moning go-go kasem tudak.

⁶⁴ O Yawe, plis yu sensimbaek long olketa evri ravis samting wea olketa bin gohed fo duim.

⁶⁵ Plis yu satem tingting blong olketa. !Mekem trabol fo kasem olketa!

⁶⁶ Plis yu ronem olketa long bikfala kros blong yu, mekem olketa finis from disfala wol.