Josua 20 - Pijin Bible

Olketa taon wea man save haed long hem

¹ Yawe hemi talem Josua

² fo tok olsem long olketa pipol blong Israel, “Yufala mas siusim olketa taon fo haed long hem, olsem wea Yawe bin talem bifoa long Mosis fo talemaot long yufala.

³ Sapos wanfala man hemi no minim nomoa fo kilim dae narafala man bat man ya hemi dae nao, disfala man save ranawe go fo haed long wanfala long olketa taon ya. An sapos wanfala wantok blong disfala man wea hemi dae hemi kam fo kilim hem dae fo sensim laef blong datfala wantok blong hem, bae hemi no save kilim hem dae.

⁴ “Sapos wanfala man hemi olsem, bae hemi save go fo haed long wanfala long olketa taon ya, bat hemi mas go lukim fastaem olketa lida long geit blong bikfala wolston blong taon ya fo talemaot wanem hemi hapen, mekem olketa save jajem hem. Bihaen, olketa save letem hem stap long taon ya wetem olketa, an olketa givim wanfala ples fo hemi stap long hem.

⁵ Sapos wantok wea hemi garem raet fo kilim dae disfala man hemi kam fo askem olketa man blong taon ya fo hem, bae olketa evriwan mas no letem man ya fo hem. Olketa mas gadem hem mekem disfala wantok no save kilim dae narafala man ya bikos dae ya hemi wanfala aksiden nomoa an man ya no heitem man hu hemi dae.

⁶ Datfala man save stap long taon ya go-go olketa jajem hem, an sapos toktok blong hem hemi tru, bae hemi mas stap long taon ya go-go kasem taem wea hae prist blong Israel hemi dae. An bihaen, bae trabol blong man ya hemi finis an hemi save gobaek long hom blong hem.”

⁷ So olketa pipol blong Israel i siusim trifala taon fo haed long west saet long Jodan Riva. Nem blong olketa nao Kedes long Galili wea hemi stap long olketa hil long eria blong Naftali, an Sekem wea hemi stap long olketa hil long eria blong Efrem, an Hebron wea hemi stap long olketa hil long distrik blong Jiuda.

⁸ An olketa siusim moa trifala taon long ist saet long Jodan Riva wea nem blong olketa nao Bese wea hemi kolsap long Jeriko long drae eria antap long hil long eria blong Ruben, an Ramot long Gilead wea hemi long eria blong Gad, an Golan long Basan wea hemi stap long eria blong Manase.

⁹ Hem nao olketa taon wea olketa siusim, mekem eniwan long Israel o eni strensa wea i stap wetem olketa save go haed long hem sapos hemi kilim dae narafala man long aksiden nomoa. An nomata eni wantok hemi kam fo sensimbaek dae ya, hemi no save duim sapos olketa lida mekem kot an faendemaot wea dae ya hemi aksiden nomoa.