Josua 19 - Pijin Bible

Lan blong traeb blong Simion

¹ Mektu haf long lan ya hemi go fo traeb blong Simion. Eria blong olketa ya hemi stap insaet long eria blong olketa long traeb blong Jiuda.

² Nem blong olketa taon wea i stap long eria ya nao: Beereseba, an Seba, an Molada,

³ an Hasasual, an Baala, an Esem,

⁴ an Eltolad, an Betul, an Homa,

⁵ an Siklag, an Bet-Makabot, an Hasasusa,

⁶ an Bet-Lebeot, an Saruhen. Hem nao tetinfala taon wetem olketa vilij raonem olketa wea i stap long datfala eria.

⁷ An hemi garem fofala taon tu wea nem blong olketa nao Aen, an Rimon, an Eta an Asan, wetem olketa vilij wea i stap raon long olketa.

⁸ An olketa garem samfala narafala vilij tu wea i stap long midol long olketa taon ya, go-go kasem taon long Baalat-Beere long saot, wea narafala nem blong hem nao Rama. Hem nao lan wea traeb blong Simion i onam.

⁹ Josua bin givim bikfala lan tumas long traeb blong Jiuda wea olketa no yusim haf long hem, so hemi givim samfala blong datfala lan go long traeb blong Simion fo onam nao.

Lan blong traeb blong Sebulun

¹⁰ Mektri haf long lan ya moa hemi go fo olketa long traeb blong Sebulun. Spialaen long eria blong olketa long saet long saot hemi stat long taon long Sarid,

¹¹ an hemi go long saet long west wea hemi winim Marala an Dabeset, an hemi en long saet kam long wanfala riva kolsap long Jokneam.

¹² Disfala spialaen hemi stat moa long Sarid an hemi go long saet long ist go-go kasem spialaen long Kislot-Teboa, an go moa kasem long Daberat, an hemi goap kasem long Jafia.

¹³ Long ist saet, spialaen hemi stat long ples ya go-go kasem Gat-Hefa an Etkasin, hemi gopas long Rimon, an tane go long Nea.

¹⁴ Long not, spialaen ya hemi go stret fo Hanaton, an hemi en long riva ya long Iftahel.

¹⁵ Nem blong samfala taon wea i stap insaet long eria ya nao: Katat, an Nahalal, an Simron, an Idala an Betlehem. Tuelfala taon wetem olketa vilij raonem olketa i stap long datfala eria.

¹⁶ Hem nao olketa taon an olketa vilij wea olketa laen long traeb blong Sebulun i onam.

Lan blong traeb blong Isaka

¹⁷ Mekfoa haf long lan ya hemi go fo olketa long traeb blong Isaka.

¹⁸ Olketa taon insaet long eria ya nao: Jesreel, an Kesulot, an Sunem,

¹⁹ an Hafaraem, an Sihon, an Anaharat,

²⁰ an Rabit, an Kision, an Ebes,

²¹ an Remet, an En-Ganim, an En-Hada, an Bet-Pases.

²² Spialaen blong eria ya hemi go pas insaet long trifala taon moa wea nem blong olketa nao Teboa, an Sahasuma an Bet-Semes, an hemi en long Jodan Riva. Sikstinfala taon wetem olketa vilij raonem olketa i stap long datfala eria.

²³ Hem nao olketa taon an olketa vilij wea olketa laen long traeb blong Isaka i onam.

Lan blong traeb blong Asa

²⁴ Mekfaev haf long lan ya moa hemi go fo olketa long traeb blong Asa.

²⁵ Eria blong olketa ya hemi garem samfala taon insaet long eria blong olketa ya nao Helkat, an Hali, an Beten, an Aksaf,

²⁶ an Alamelek, an Amad, an Misal. Spialaen blong olketa long saet long saot hemi stat kolsap long maonten long Kaamel long west, an falom riva long Siho-Libnat.

²⁷ Spialaen blong olketa long ist saet hemi go long not pasim Bet-Dagon an pasim spialaen long eria blong olketa long traeb blong Sebulun an riva long Iftahel. Hemi go moa long not pasim tufala taon long Bet-Emek an Neel. Hemi go moa long not pasim olketa taon long Kabul,

²⁸ an Abdon, an Rehob, an Hamon, an Kana, an go muv go moa fo kasem bikfala taon long Saedon.

²⁹ Disfala spialaen ya hemi tane go moa long Rama, an go kolsap long taon long Taea wea bikfala wolston nao hemi goraonem. Spialaen ya hemi tane go long Hosa an go-go hemi en long Mediterenian Si. Olketa narafala taon moa wea i stap insaet long eria ya nao: Mahalab, an Aksib,

³⁰ an Uma, an Afek an Rehob. Tuenti-tu taon wetem olketa vilij raonem olketa i stap long datfala eria.

³¹ Hem nao olketa taon an olketa vilij wea olketa laen long traeb blong Asa i onam.

Lan blong traeb blong Naftali

³² Meksiks haf moa long lan ya hemi go long olketa long traeb blong Naftali.

³³ Spialaen long eria blong olketa long not an long ist, hemi stat long taon long Helef an go moa kasem bikfala ok tri long Saananim, an hemi go moa kasem taon long Adami-Nekeb, an hemi go moa long taon long Jabneel, go-go kasem taon long Lakum an hemi en long Jodan Riva.

³⁴ Spialaen long saot hemi stat moa long Jodan riva an go west long taon long Asnot-Teboa an hemi falom spialaen long eria blong traeb blong Sebulun wea hemi go kasem taon long Hukok. Spialaen blong olketa long west nao hemi olsem spialaen blong traeb blong Asa.

³⁵ Lan blong olketa ya hemi garem samfala taon wea bikfala wolston nao hemi raonem olketa, an nem blong olketa nao Sidim, an Sea, an Hamat, an Rakat, an Kineret,

³⁶ an Adama, an Rama an Hasoa,

³⁷ an Kedes, an Edrei, an En-Hasoa,

³⁸ an Iron, an Migdal-El, an Horem, an Bet-Anat an Bet-Semes. Naentinfala taon wetem olketa vilij raonem olketa i stap long datfala eria.

³⁹ Hem nao olketa taon an olketa vilij wea olketa laen long traeb blong Naftali i onam.

Lan blong traeb blong Dan

⁴⁰ Mekseven haf long lan hemi go fo olketa long traeb blong Dan.

⁴¹ Olketa taon wea i stap insaet long lan blong olketa nao, Sora, an Estaol, an Ir-Semes,

⁴² an Saalabin, an Aejalon, an Itla,

⁴³ an Elon, an Timna, an Ekron,

⁴⁴ an Elteke, an Gibeton, an Baalat,

⁴⁵ an Jehud, an Bene-Berak, an Gat-Rimon,

⁴⁶ an Mejakon an Rakon, wetem olketa ples raon long Jopa.

⁴⁷ Bihaen, taem olketa ya no save tekova long disfala lan blong olketa, olketa go an faetem olketa pipol long taon long Laes. Olketa winim taon ya long faet, an kilim dae evri pipol long ples ya, an tekova tu long olketa lan wea i stap raon long hem. Olketa mekem ples blong olketa long taon ya, an sensim nem ya Lesem go long Dan wea hemi nem blong olfala grani blong olketa long bifoa.

⁴⁸ Hem nao olketa taon an olketa vilij wea olketa laen long traeb blong Dan i onam.

Olketa finis fo divaedem olketa lan

^49-51 So long datfala taem, Haeprist Eliesa an Josua wetem evri lida long olketa laen blong olketa traeb blong Israel i kam tugeta long doa blong Tambu Haostent blong Yawe long Saelo. An taem olketa stap frant long Yawe, olketa bin divaedem olketa lan go long olketa pipol blong Israel. Olketa rolem olketa spesol ston fo somaot olketa hu nao bae i onam olketa pis lan ya. An long wei nao olketa divaedem finis olketa lan ya. Taem olketa divaedem finis olketa lan fo olketa traeb blong olketa, olketa givim wanfala pis lan go long Josua fo hemi onam. Bifoa, Yawe hemi bin talem dat sapos Josua hemi askem wanfala taon, bae olketa mas givim datfala taon long hem. Josua hemi askem taon long Timnat-Sera long olketa hil long Efrem. So olketa givim long hem nao an hemi go stap long hem an mekem taon ya kamap gudfala.