Josua 15 - Pijin Bible

Lan blong traeb blong Jiuda

¹ Hem ya nao lan blong olketa long traeb blong Jiuda. Lan ya hemi stat long bikfala drae eria long Sini an hemi go kasem spialaen blong lan blong Idom long saot.

² Disfala spialaen long saot, hemi stat long en blong Ded si long saot,

³ an hemi go long saet long saot from rod long Akrabim wea hemi go midol long olketa hil, an go kasem disfala drae eria long Sini. An hemi pas narasaet long Kades-Banea long saot, an hemi winim go taon long Hesron, an hemi goap long taon long Ada, an hemi tane go long taon long Kaka,

⁴ an hemi go kasem taon long Asmon. Spialaen ya hemi falom smolfala wata long spialaen long lan blong olketa pipol blong Ijip, an hemi go moa kasem Mediterenian Si. Hem nao en long spialaen blong olketa long saot.

⁵ Long ist saet, spialaen blong distrik ya hemi stat long en blong Ded Si, an hemi falom go saet si ya go-go kasem en blong Jodan Riva wea hemi kasem Ded Si long not. An spialaen long not hemi stat long maos blong riva ya,

⁶ an hemi go kasem taon long Bet-Hogla, an hemi goap moa fo bikfala hil long Bet-Araba long not wea yu save luk godaon long Jodan vali. An hemi goap moa from ples ya go-go kasem bikfala “Ston blong Bohan”. Bohan ya hemi wanfala san blong Ruben.

⁷ Spialaen ya hemi go kasem vali long Akoa an goap moa kasem taon long Debia, an tane go moa long Gelilot long not, go-go kasem rod long Adumim wea hemi go long saet hil, an hemi falom rod ya go-go kasem tufala springwata ya long En-Semes an long En-Rogel.

⁸ Spialaen ya hemi goap stret falom vali long Hinom, wea hemi pas long saot saet, botom long hil ya long Jerusalem, disfala taon blong olketa laen blong Jebus. Spialaen ya hemi go antap long hil saet long vali long Hinom wea hemi stap long west saet, kolsap long vali long Refaem long saet long not.

⁹ An spialaen ya hemi stat moa long ples ya an hemi go-go kasem springwata ya long Neftoa, an hemi go moa go-go kasem olketa taon kolsap long maonten long Efron. Hemi stat moa long ples ya an hemi go stret long taon long Baala wea narafala nem blong hem nao Kiriat-Jearim.

¹⁰ Spialaen ya hemi raon go moa long west saet blong taon long Baala, an hemi go stret long olketa hil long Idom, an hemi gopas kolsap long saet long not blong hil long Kiriat-Jearim. Narafala nem blong hil ya nao Kesalon. Hemi godaon moa go-go kasem taon long Bet-Semes, an hemi go moa pasim taon long Timna.

¹¹ Spialaen ya hemi go moa kasem not saet long hil long Ekron, an hemi tane go long taon long Sikeron, an hemi pasim hil long Baala, an hemi go-go kasem taon long Jamnia, an hemi en long Mediterenian Si.

¹² An saet si long Mediterenian Si nao hemi spialaen blong eria ya long west. Hem nao spialaen long lan blong traeb blong Jiuda.

Kelab hemi winim olketa pipol blong Hebron an Debia long faet

¹³ Josua hemi duim nao olsem wea Yawe bin talem long hem. Hemi givim samfala lan long distrik ya blong olketa traeb blong Jiuda fo Kelab. Josua hemi givim hem disfala taon long Hebron wea bifoa olketa kolem long Kiriat-Aba, wea hemi minim “Taon blong Aba”, an Aba nao hemi olfala grani blong Anak long bifoa.

¹⁴ Nao Kelab hemi ronemaot olketa laen blong Anak from taon ya. Olketa ya nao i from laen blong Sesae, an laen blong Ahiman an laen blong Talmae.

¹⁵ An taem hemi winim finis olketa pipol long ples ya, hemi go moa fo faetem olketa pipol long Debia wea bifoa olketa kolem Kiriat-Sefa.

¹⁶ An Kelab hemi tok olsem, “Sapos wanfala man hemi lidim yumi fo faet long taon ya, go-go yumi winim olketa, bae mi givim dota blong mi, Aksa, long hem fo hemi maritim.”

¹⁷ Otniel nao hemi lidim olketa man fo tekova long taon ya. Hemi bon long brata blong Kelab wea nem blong hem nao Kenas. Kelab hemi givim nao dota blong hem ya long Otniel fo tufala marit.

¹⁸ Bihaen, Aksa hemi talem Otniel fo hemi mas go askem Kelab fo hemi givim samfala graon long tufala. Bihaen moa, Aksa hemi go fo tok wetem dadi blong hem. Nao taem hemi kasem ples an hemi jamdaon from dongki blong hem, dadi blong hem askem hem olsem, “?Aksa, waswe?”

¹⁹ Hemi tok olsem, “Dadi, plis yu sore long mi. Disfala graon long drae eria long saot wea yu bin givim long mitufala ya hemi drae tumas. Mi laekem yu fo givim eni pisgraon moa fo mitufala wea hemi garem wata long hem.” So dadi blong hem hemi givim nao lan wea hemi garem olketa springwata wea olketa kolem springwata long antap, an springwata long daon.

Olketa taon blong olketa long traeb blong Jiuda

²⁰ Hem ya nao lan wea olketa long traeb blong Jiuda i onam.

²¹ Olketa taon wea i stap barava long saot, kolsap spialaen blong olketa pipol blong Idom nao, Kabseel, an Eda, an Jagua,

²² an Kina, an Dimona, an Adada,

²³ an Kedes, an Hasoa, an Itnan,

²⁴ an Jif, an Telem, an Bealot,

²⁵ an Hasohadata, an Keriot-Hesron wea narafala nem blong hem nao Hasoa,

²⁶ an Amam, an Sema an Molada,

²⁷ an Hasagada, an Hesmon, an Bet-Pelet,

²⁸ an Hasasual, an Beereseba, an Bisiotaea,

²⁹ an Baala, an Yim, an Esem,

³⁰ an Eltolad, an Kesil, an Homa,

³¹ an Siklag, an Madmana, an Sansana,

³² an Lebaeot, an Silhim, an Aen, an Rimon. Hem nao tuenti-naen taon wea i stap long datfala eria wetem olketa vilij wea i stap raonem olketa.

³³ An olketa narafala taon wea i stap long olketa hil long west nao, Estaol, an Sora, an Asna,

³⁴ an Sanoa, an En-Ganim, an Tapua, an Enam,

³⁵ an Jamut, an Adulam, an Soko, an Aseka,

³⁶ an Saaraem, an Aditaem, an Gedera an Gederotaem. Hem nao fotinfala taon wea i stap long datfala eria wetem olketa vilij wea i stap raonem olketa.

³⁷ An olketa narafala taon blong olketa moa nao, Senan, an Hadasa, an Migdal-Gad,

³⁸ an Dilean, an Mispa, an Jokteel,

³⁹ an Lakis, an Boskat, an Eglon,

⁴⁰ an Kabon, an Lamam, an Kitlis,

⁴¹ an Gederot, an Bet-Dagon, an Naama an Makeda. Hem nao sikstinfala taon wea i stap long datfala eria wetem olketa vilij wea i stap raonem olketa.

⁴² An samfala narafala taon blong olketa moa nao, Libna, an Eta, an Asan,

⁴³ an Ifta, an Asna, an Nesib,

⁴⁴ an Keila, an Aksib an Maresa. Hem nao naenfala taon wea i stap long datfala eria wetem olketa vilij wea i stap raon long olketa.

⁴⁵ An narafala taon blong olketa tu, hemi Ekron wetem olketa vilij wea i stap raonem hem,

⁴⁶ an evri taon an vilij long saet kam kolsap long Asdod wea hemi stat long Ekron go-go kasem long Mediterenian Si.

⁴⁷ An samfala taon moa hemi Asdod wetem evri taon an evri vilij raon long hem, an taon long Gasa wetem evri taon an evri vilij raon long hem, go-go kasem smolfala wata wea hemi makem spialaen long lan blong olketa pipol long Ijip long saot, an hemi go-go kasem Mediterenian Si long west.

⁴⁸ An nem blong olketa taon blong olketa long hil ples hemi olsem: Samia, an Jatia, an Soko,

⁴⁹ an Dana, an Kiriat-Sefa, wea narafala nem blong hem nao Debia,

⁵⁰ an Anab, an Estemoa, an Anim,

⁵¹ an Gosen, an Holon an Gilo. Hem nao levenfala taon wea i stap long datfala eria wetem evri vilij wea i stap raon long olketa.

⁵² An samfala taon moa wea nem blong olketa nao Arab, an Duma an Esan

⁵³ an Janim, an Bet-Tapua, an Afeka,

⁵⁴ an Humta, an Kiriat-Aba wea narafala nem blong hem nao Hebron, an Sioa. Hem nao naenfala taon wea i stap long datfala eria wetem evri vilij wea i stap raon long olketa.

⁵⁵ An samfala taon moa wea nem blong olketa nao Maon, an Kaamel, an Jif, an Juta,

⁵⁶ an Jesreel, an Jokdeam, an Sanoa,

⁵⁷ an Kain, an Gibea an Timna. Hem nao tenfala taon wea i stap long datfala eria wetem evri vilij wea i stap raon long olketa.

⁵⁸ An olketa garem samfala taon moa wea nem blong olketa nao Halhul, an Bet-Sua, an Gedoa,

⁵⁹ an Maarat, an Bet-Anot an Eltekon. Hem nao siksfala taon wea i stap long datfala eria wetem evri vilij wea i stap raon long olketa.

⁶⁰ An tufala taon moa wea nem blong wanfala nao Kiriat-Baal wea narafala nem blong hem nao Kiriat-Jearim, an narawan nao Raba. Hem nao tufala taon wea i stap long datfala eria wetem olketa vilij wea i stap raon long tufala.

⁶¹ An samfala taon tu i stap long drae eria wea nem blong olketa nao, Bet-Araba, an Midin, an Sekaka,

⁶² an Nibsan, an Iramelak, an En-Gedi. Hem nao siksfala taon wea i stap long datfala eria wetem evri vilij wea i stap raon long olketa.

⁶³ Bat olketa long traeb blong Jiuda i no save ronemaot olketa long laen blong Jebus bifoa wea olketa gohed fo stap long Jerusalem long datfala taem. Olketa pipol ya i stap yet wetem olketa long traeb blong Jiuda ka-kam kasem tude.