Josua 13 - Pijin Bible

Olketa lan wea olketa no tekova long hem yet

¹ Josua hemi kamap olo fogud nao, an Yawe hemi tok olsem long hem, “Josua, distaem yu olo tumas nao, bat plande bikfala lan hemi stap yet wea yufala no tekova long hem yet.

^2-3 Plande ples i stap yet long eria long Filistia wetem faefala taon long Gasa, an Asdod, an Askelon, an Gat, an Ekron. Yufala mas tekova tu long olketa eria long Gesua long ist saet long Ijip an long eria long Ava long saot. An yufala mas tekova tu long disfala lan wea hemi stat long smolfala riva ya long Sihoa long saot wea hemi makem spialaen long lan blong olketa pipol blong Ijip, an hemi go olowe go-go kasem taon long Afek long not.

⁴ Plande eria long Kenan hemi stap yet fo yufala tekova long hem, olsem eria long Meara wea hemi ples blong olketa pipol blong Saedon go olowe go-go kasem taon long Afek wea hemi makem spialaen long lan blong olketa long laen blong Amoa.

⁵ Yufala mas tekova tu long olketa lan blong olketa long taon long Gebal, an yufala mas tekova long evri eria long Lebanon wea hemi stat long taon long Balgad kolsap long maonten long Hemon go-go kasem Lebo-Hamat.

⁶ Olketa ples wea hemi stap yet fo yufala tekova long hem nao, olketa lan wea olketa pipol blong Saedon i stap long hem long olketa hil long Lebanon an Misrefotomaem. “Taem yufala kam kolsap long olketa ples ya, bae mi ronemaot evri pipol wea i stap long hem. Yu mas divaedem olketa lan ya go long olketa pipol blong mi, olsem wea mi bin talem finis long yu.

⁷ Yu mas divaedem olketa lan ya go long narafala naenfala traeb blong yufala, wetem narafala haf long olketa long traeb blong Manase wea i no garem lan yet.”

Lan wea Mosis givim go long olketa traeb blong Ruben an Gad an long haf long traeb blong Manase

⁸ Mosis hu hemi wakaman blong Yawe, hemi bin givim lan wea hemi stap long ist saet long riva Jodan fo go long traeb blong Ruben, an traeb blong Gad, an narafala haf long traeb blong Manase.

⁹ Hemi givim tu lan wea hemi stat long Aroa long Anon Riva go kasem taon long midol long vali blong Anon riva, an hemi go olowe go-go kasem bikfala flat ples antap long hil wea hemi stat kam long taon long Medeba go-go kasem taon long Dibon.

¹⁰ Saet blong lan ya long ist hemi go kasem spialaen long lan blong olketa pipol blong Amon. An long not saet, hemi kasem evri taon wea Paramaon Sif Sihon long laen blong Amoa hemi rul ovarem, wetem taon long Hesbon.

¹¹ Lan ya hemi go kasem olketa lan long distrik long Gilead, an long distrik blong olketa man blong Gesua, an long distrik blong olketa pipol long Maaka, wetem evri ples long maonten long Hemon, wetem evri ples long distrik long Basan wea hemi kasem taon long Saleka.

¹² Lan ya hemi gohed moa go-go kasem evri ples long distrik wea Paramaon sif Og hemi rul ovarem, wetem tufala taon long Astarot an Edrei wea i kapitol taon blong hem. Disfala paramaon sif nao hemi laswan long olketa laen blong Refaem long bifoa. Mosis wetem olketa pipol blong Israel nao i bin winim olketa pipol ya wetem ples blong olketa long faet.

¹³ Nomata olsem, olketa pipol long Israel i nating ronemaot nomoa olketa pipol blong Gesua an olketa blong Maaka. Tude, olketa pipol ya i stap yet wetem olketa pipol blong Israel.

¹⁴ Yawe bin talem finis long Mosis dat olketa long Traeb blong Livae bae i no garem eni lan, bat bae olketa garem kaikai from olketa samting wea olketa pipol long olketa narafala traeb i givim fo mekem wosip long hem.

Lan blong olketa long traeb blong Ruben

¹⁵ Mosis bin givim lan long olketa long traeb blong Ruben, mekem olketa save onam olowe nao.

¹⁶ Eria blong olketa hemi stat long taon long Aroa long saot, saet kam long Anon vali go-go kasem taon long midol long vali an hemi go kasem evri bikfala flat ples raonem taon long Medeba.

¹⁷ Plande taon nao hemi stap long flat ples ya. Olketa taon ya nao Hesbon, an Dibon, an Bamot-Baal, an Betbalmeon,

¹⁸ an Jahas, an Kedemot, an Maefat,

¹⁹ an Kiriataem, an Sibma, an Seretsaha wea hemi stap long saet hil kolsap long Ded Si,

²⁰ an Betjesimot, an Betpeoa wea hemi stap long saet long maonten long Pisga.

²¹ Hem nao evri taon long bikfala flat ples ya antap long hil wetem evri ples wea Paramaon Sif Sihon long laen blong Amoa hemi rul ovarem, wetem taon long Hesbon. Mosis bin winim finis paramaon sif ya wetem evri sif blong hem long faet. Evri bikman ya i kam from Midian an paramaon sif ya hemi mekem olketa fo rul ovarem olketa eria ya. Nem blong olketa man ya nao Evi, an Rekem, an Sua, an Hua, an Reba.

²² Wanfala long olketa man wea Mosis hemi kilim dae nao Balam hu hemi man fo mekem sakrifaes fo save wanem bae i kamap. Dadi blong hem nao Beo.

²³ Riva ya long Jodan nao hemi spialaen long west saet long lan wea Mosis hemi givim long traeb blong Ruben. An hem nao evri taon an evri vilij long disfala eria wea Mosis bin givim long olketa fo onam olowe nao.

Lan blong olketa long traeb blong Gad

²⁴ Mosis bin givim lan go long olketa long traeb blong Gad, mekem olketa save onam olowe nao.

²⁵ Disfala eria hemi go kasem taon long Jasea an hemi go moa kasem evri taon insaet long eria olketa kolem Gilead. Haf long lan blong Amon wea hemi go olowe go-go kasem taon ya long Aroa wea i stap ist long Raba, hemi stap insaet long lan ya.

²⁶ An lan ya hemi stat long taon long Hesbon an hemi go moa kasem taon long Rama Mispa an taon long Betonim. An stat kam from taon long Mahanaem, hemi ka-kam kasem spialaen blong ples long Lo-Deba.

²⁷ Long Jodan Vali, lan ya hemi go-go kasem olketa taon long Bet-Haran, an long Bet-Nimra, an long Sukot, an long Safon, an evri eria wea Paramaon Sif Sihon blong Hesbon hemi rul ovarem. Spialaen blong olketa lan ya long saet long west nao hemi stat long Jodan Riva go-go kasem Leik Galili long not.

²⁸ Hem nao evri taon an evri vilij long disfala eria wea Mosis bin givim long olketa fo onam olowe nao.

Lan blong olketa long haf long traeb blong Manase

²⁹ Mosis hemi bin givim samfala lan long haf blong traeb blong Manase.

³⁰ Disfala eria ya hemi stat long Mahanaem an evri lan long Basan hemi insaet long disfala eria, wetem siksti vilij wea Jaea bin winim wanfala taem bifoa long faet. Bifoa, Paramaon Sif Og blong Basan nao hemi rul ovarem evri ples long datfala eria.

³¹ Disfala distrik hemi kasem narafala haf long Gilead tu, wetem tufala taon long Astarot an Edrei wea hemi kapitol taon blong Paramaon sif Og. Hem nao olketa lan wea Mosis bin givim go long olketa laen blong Makia san blong Manase, fo onam olowe nao.

³² Hem nao wei wea Mosis bin divaedem olketa lan long taem ya hemi stap yet long bikfala flat ples ya long Moab.

³³ Bat Mosis hemi no givim eni lan go long traeb blong Livae, bikos hemi talem olketa dat bae olketa save garem pat long olketa ofaring wea olketa blong Israel i ofarem go long Yawe, God blong Israel.