Josua 11 - Pijin Bible

Josua hemi winim olketa long not long faet

¹ Taem Paramaon Sif Jabin blong taon long Hasoa hemi herem nius wea Josua wetem ami blong Israel i tekova finis long plande ples, hemi sendem go toktok long Paramaon Sif Jobab blong taon long Madon, an long paramaon sif blong taon long Simron, an paramaon sif blong taon long Aksaf.

² Hemi sendem go toktok tu long olketa paramaon sif wea i stap long olketa taon long hil long saet long not, an long olketa paramaon sif wea i stap long olketa taon long vali long Jodan Riva wea hemi stap long saot kolsap long Leik Galili. Hemi sendem go toktok tu long olketa paramaon sif long olketa smolfala hil long west saet, an long olketa paramaon sif wea i stap kam long daon long saet si kolsap long taon long Doa.

³ An hemi sendem go toktok tu long olketa narafala pipol long lan ya long Kenan wea olketa stap long tufala saet long Jodan Riva, an long olketa laen blong Amoa, an long olketa laen blong Het, an long olketa laen blong Peres, an long olketa laen blong Jebus wea i stap long olketa taon long olketa hil, an long olketa laen blong Hivi wea i stap long distrik ya long Mispa long botom blong maonten long Hemon.

⁴ Olketa paramaon sif ya kam tugeta wetem evri soldia blong olketa, wea i staka fogud olsem sanbis long saet si. Olketa garem tu plande hos an plande kaat fo faet wea olketa hos nao i pulum.

⁵ Evri paramaon sif ya i kam tugeta an mekem wanfala ami. Olketa mekem olketa haostent blong olketa kolsap long wanfala wata wea olketa kolem Marom, an mekredi fo faetem Josua an ami ya blong Israel.

⁶ Yawe hemi tok olsem long Josua, “Yu mas no fraetem olketa. Long disfala taem tumoro, bae mi kilim dae finis evriwan long olketa. Taem yufala faet, bae yufala mas katem string long bihaen lek blong olketa hos blong olketa, an yufala mas barava bonem tu olketa kaat fo faet blong olketa.”

⁷ Seknomoa, Josua wetem ami blong hem i kamap an faetem ami blong olketa kolsap long wata long Marom.

⁸ Yawe hemi mekem Josua an ami blong Israel fo winim olketa enemi. Samfala long ami blong Josua i ronem olketa enemi ya an faetem olketa go-go kasem olketa farawe ples olsem taon long Misrefotomaem, an long taon long Saedon long not. Olketa narafala long ami blong Josua i gohed fo ronem tu narafala haf long olketa enemi ya go-go kasem vali long Mispa long ist. Olketa gohed fo faet go-go olketa kilim dae evriwan long olketa enemi.

⁹ So Josua wetem ami blong hem i duim nao olketa samting wea Yawe bin talem fo duim, an olketa katem olketa string long bihaen lek blong olketa hos blong olketa, an bonem finis olketa kaat fo faet blong olketa.

¹⁰ Bihaen, Josua wetem ami blong hem i taneraon fo faetem ami blong Hasoa. Olketa kilim dae evriwan blong Hasoa, wetem paramaon sif blong olketa. Nomata paramaon sif blong Hasoa hemi strong moa winim olketa narafala paramaon sif long evri narafala taon wea hemi bin lidim olketa,

¹¹ Josua wetem ami blong hem i kilim dae evriwan an barava bonem disfala taon long Hasoa.

¹² Josua wetem ami blong hem i tekova long evri taon blong olketa paramaon sif ya. An Josua hemi talem olketa man blong hem fo kilim dae evriwan, olsem wea Mosis hu hemi wakaman blong Yawe hemi bin talem.

¹³ Bat olketa blong Israel i no bonem olketa taon wea olketa enemi i wakem antap long olketa hil.

¹⁴ Olketa pipol blong Israel i kilim dae evriwan long olketa, an tekemaot evri gudfala samting blong olketa wetem olketa animol blong olketa, an kipim fo olketa seleva.

¹⁵ Josua hemi barava obeim nao evri toktok wea Mosis hu hemi wakaman blong Yawe hemi bin talem hem fo duim. Yawe nao bin talem disfala toktok long Mosis bifoa.

Olketa lan wea Josua hemi tekova long hem

¹⁶ Josua wetem ami blong hem i tekova long evri lan, stat long not go-go kasem long saot. Olketa tekova tu long olketa ples long olketa hil an olketa ples long vali wetem evri lan long Gosen an olketa drae eria long saot go-go kasem vali long Jodan.

^17-18 Olketa tekova long evri ples from maonten long Halak long saot kolsap long kantri long Idom, go-go kasem taon long Balgad long vali long Lebanon long not kolsap long maonten long Hemon. Fo longtaem nao Josua bin gohed fo faet wetem olketa paramaon sif blong olketa ples ya, go-go hemi winim olketa evriwan long faet an kilim dae evriwan long olketa.

¹⁹ Olketa laen blong Hivi wea i stap long Gibeon nomoa i mekem piis wetem Josua an olketa pipol blong Israel, bat evri narafala pipol, Josua wetem ami blong hem i kilim evriwan dae.

²⁰ Yawe hemi mekem olketa enemi ya i laekem tumas fo faet agensim olketa pipol blong Israel, mekem Josua wetem ami blong hem i nating sore long olketa an kilim dae olketa evriwan. Hem nao wanem Yawe bin talem bifoa long Mosis.

²¹ Long datfala taem tu, Josua wetem ami blong hem i kilim dae olketa jaean long laen blong Anak wea i stap long olketa taon long Hebron, an Debia an Anab, an long olketa hil long eria long not an long eria long saot.

²² Josua wetem ami blong hem i kilim dae evri jaean wea i stap long olketa ples ya. Tu-tri nomoa i stap long olketa taon long Gasa, an Gat, an Asdod.

²³ Josua wetem ami blong hem i tekova long evri lan long olketa eria ya, olsem wea Yawe bin talem bifoa long Mosis. An bihaen, Josua hemi divaedem evri lan ya long tuelfala traeb blong Israel. An bihaen, olketa stap kuaet moa an garem piis.