Jona 4 - Pijin Bible

Profet Jona hemi kros long Yawe

¹ Bat Profet Jona hemi no hapi abaotem wei wea God hemi no panisim olketa, an hemi kros tumas.

² So hemi prea olsem, “Yawe, taem mi stap yet long kantri blong mi, mi save finis wea yu save fogivim pipol. Dastawe nao mi trae fo ranawe go long Spen. Mi save finis wea yu kaen tumas an yu save sore long pipol. Yu no save kros kuiktaem, an yu tinghevi tumas long pipol. Ya, yu redi olowe nomoa fo fogivim pipol, an i no fo panisim olketa.

³ Bat Yawe, letem mi dae. ?Fo wanem nomoa mi laef? Hemi moabeta fo mi dae nomoa.”

⁴ Yawe hemi tok olsem, “Jona. ?Waswe, hemi stret nomoa fo yu kamap kros olsem?”

⁵ Jona hemi goaot from taon ya, long saet long ist. Hemi wakem wanfala smolfala lif haos an hemi sidaon insaet long hem fo haed from san, mekem hemi save lukim wanem nao bae hemi kasem Nineve.

⁶ Yawe God hemi mekem wanfala vaen tri fo grouap bikfala kolsap long Jona, an tri ya hemi givim sado long hem, mekem Jona hemi filgud moa. Jona hemi barava hapi tumas long tri ya.

⁷ Bat long eli moning long neks de, God hemi mekem wom fo kaikaim disfala vaen tri, an tri ya hemi dae nao.

⁸ An long taem wea san hemi kamap, God hemi mekem ist win fo blou wea hemi barava hot fogud. An hot san ya hemi saen daon long hed blong Jona, mekem hemi wik fogud. Nao hemi tok olsem, “?Fo wanem nomoa mi laef? Hemi moabeta fo mi dae nomoa.”

⁹ Yawe hemi tok olsem long hem, “?Waswe, hemi stret nomoa fo yu kamap kros abaotem vaen tri ya?” Jona hemi ansarem hem olsem, “!Ya! !Hemi stret nomoa! !Mi kros tumas ya! !Hem nao mi wande dae!”

¹⁰ Nao Yawe hemi tok olsem long hem, “Vaen tri ya hemi grouap kam long wanfala naet nomoa, an long neks de hemi dae. Yu nating plantem o mekem hem grou, bat yu sore tumas long hem.

¹¹ Tri ya wea yu sore long hem, hemi smolfala tumas. Bat disfala taon long Nineve hemi bikfala tumas, an winim 120,000 pipol nao i stap long hem. Tingting blong olketa hemi olsem nomoa smolfala pikinini hu hemi no save yet wanem hemi gud o wanem hemi nogud, an plande animol tu i stap long ples ya. ?Waswe, yu barava tingse hemi no fitim fo mi sore long olketa ya?”