Jona 2 - Pijin Bible

Profet Jona hemi prea long Yawe

¹ Taem Profet Jona hemi stap insaet long bele blong bikfala fis ya, hemi prea olsem long Yawe hu hemi God blong hem,

² “Yawe, taem trabol hemi kasem mi, mi singaot go long yu, an yu lisin kam long mi an yu ansarem mi. From bele blong Grev mi kraeaot long yu, an yu herem voes blong mi.

³ Yu torowem mi godaon long barava dip si, wea solwata hemi kavarem mi finis, an olketa bikfala wev i gohed fo brek antap long mi.

⁴ Mi tingse mi bin lus finis from yu, an bae mi kanduit lukim moa Tambuhaos blong yu.

⁵ Mi dringim solwata go-go mi kolsap dae nao. Solwata ya hemi kolsap draonem mi, an gras long solwata hemi taemapem hed blong mi.

⁶ Hemi olsem wea mi singdaon barava long botom blong olketa maonten. An graon ya hemi satem mi olsem wea mi insaet long prisin, an mi kanduit kamap fri moa. “Bat Yawe, yu nao yu God blong mi, an yu sevem laef blong mi, olsem wea yu bin tekem mi aot from grev blong mi.

⁷ O Yawe, mi tingim yu long disfala taem wea mi kolsap dae. Prea blong mi hemi kasem yu long Tambuhaos blong yu.

⁸ Evriwan hu i holetaet long olketa laea god, olketa ya i nating tinghevi long yu.

⁹ Bat bae mi singsing fo preisim nem blong yu, an bae mi mekem sakrifaes fo talem tengkiu long yu. Evrisamting wea mi promisim long yu bae mi duim. !Yawe nomoa save sevem man!”

¹⁰ Taem Jona hemi prea olsem, Yawe hemi tok long fis ya, an hemi gosoa an toraotem profet ya long sanbis.