Gudnius abaotem Jisas Kraes wea Jon hemi raetem 8 - Pijin Bible

Wanfala woman hu brekem lo blong marit wetem nara man

¹ Bihaen, evriwan i gobaek long haos blong olketa nao. Bat long taem ya, Jisas hemi go long disfala hil blong Oliv tri.

² Taem hemi kasem barava moning long neks de, Jisas hemi kambaek moa long eria blong Tambuhaos ya. An evriwan i hipap raonem Jisas, so hemi sidaon an hemi stat fo tisim olketa.

³ Nao olketa tisa blong Lo an olketa Farasi, olketa tekem kam wanfala woman wea olketa bin kasholem hem taem hemi brekem lo blong marit wetem nara man. So olketa mekem disfala woman fo stanap go long frant blong olketa evriwan,

⁴ an olketa tok olsem, “Tisa, disfala woman ya, olketa lukim dat hemi barava brekem lo blong marit wetem nara man ya.

⁵ Insaet long Lo, Mosis hemi talem finis dat diskaen woman ya yumi mas sutim hem dae long ston. ?So waswe, wanem nao yu save talem abaotem diswan?”

⁶ Olketa askem Jisas olsem bikos olketa laek fo trikim hem nomoa ya, mekem olketa save ripotem hem. Bat Jisas hemi bendaon nomoa, an hemi raet long graon wetem fingga blong hem.

⁷ Long taem ya, olketa go-gohed fo askem olketa kuestin long hem. So hemi luk goap moa, an hemi tok olsem long olketa nao, “Eniwan long yufala hu hemi nating duim eni rong samting yet, hem nao hemi fas man fo sutim ston go long woman ya.”

⁸ An hemi bendaon moa an hemi gohed fo raet long graon.

⁹ Taem olketa herem toktok blong hem ya nomoa, olketa stat fo go-goaot nao, an olketa oloman nao olketa stat fo go-goaot fastaem. Olketa go olsem, go-go Jisas nomoa hemi stap, an disfala woman tu hemi stanap yet.

¹⁰ So Jisas hemi luk goap moa an hemi askem woman ya olsem, “?Woman, wea nao olketa ya? ?Waswe, eniwan long olketa hemi tok agensim yu?”

¹¹ Nao woman ya hemi sei, “Masta, no eniwan nao.” Nao Jisas hemi sei, “Mi tu mi no talem enisamting agensim yu. So yu gobaek, bat yu mas no duim eni rong samting moa.”

Jisas nao laet blong wol

¹² Jisas hemi toktok olsem moa long olketa pipol, “Mi nao mi laet fo pipol long disfala wol ya. Man hu hemi falom mi, bae hemi no save wakabaot long tudak ya, bat bae hemi garem laet wea hemi save givim laef ya.”

¹³ Nao olketa Farasi tok olsem long hem, “Yu nomoa yu talemaot evrisamting abaotem yu seleva ya, so hemi had fo mifala bilivim wanem yu talem ya.”

¹⁴ Bat Jisas hemi sei, “Nomata mi nomoa mi talemaot evrisamting abaotem mi seleva, wanem mi talem hemi tru. Bikos mi save long ples wea mi stap kam long hem, an ples wea bae mi go long hem. Bat yufala nating save long ples wea mi stap kam long hem ya, an long ples wea bae mi go long hem.

¹⁵ Yufala jajem olketa samting falom barava wei blong man long wol nomoa. Mi no save jajem eniwan.

¹⁶ Bat sapos mi jajem eniwan, mi jajem hem long wei wea hemi barava stret. Bikos mi no jajem eniwan mi seleva, bat mitufala Dadi blong mi hu hemi sendem mi kam, mitufala nao duim.

¹⁷ Lo blong yufala hemi talem finis nao, wea sapos toktok blong tufala man i barava semsem nomoa, wanem tufala talem hemi barava tru nao ya.

¹⁸ Mi nao talemaot evrisamting abaotem mi seleva, an Dadi blong mi hu hemi sendem mi kam, hemi talemaot semsamting tu abaotem mi.”

¹⁹ Nao olketa askem Jisas olsem, “?Wea nao dadi blong yu?” Bat Jisas hemi ansarem olketa olsem, “Yufala nating save long mi, an yufala nating save long Dadi blong mi tu. Bat sapos yufala save long mi, yufala save long Dadi blong mi tu ya.”

²⁰ Jisas hemi talem olketa samting ya long taem hemi tisim olketa pipol insaet long Tambuhaos, kolsap long ples blong olketa boks fo putum seleni long hem. Long taem ya, no eniwan kasholem hem bikos hemi no kasem taem blong hem yet.

Jisas wonem olketa lida blong Jiu

²¹ Jisas hemi tok moa olsem long olketa, “Bae mi go ya an bae yufala lukaotem mi, bat olketa sin blong yufala i stap yet, mekem yufala dae. An bae yufala no save go long ples wea bae mi go long hem.”

²² So olketa bikman blong olketa Jiu ya, olketa toktok tugeta long olketa seleva olsem, “Hemi sei bae yumi no save go long ples wea hemi go long hem ya. !Maet hemi minim wea bae hemi go an kilim dae hem seleva ya!”

²³ Nao Jisas hemi sei, “Yufala stap kam long disfala ples long daon nomoa ya, bat mi blong antap. Yufala blong disfala wol, bat mi no blong disfala wol ya.

²⁴ Dastawe nao mi talem long yufala finis, wea olketa sin blong yufala i stap yet, mekem yufala dae. Sapos yufala no biliv wea ‘Mi nao Mi Stap Olowe’ oraet, olketa sin blong yufala i stap yet, mekem yufala dae.”

²⁵ Nao olketa askem olsem, “?Yu hu ya?” So Jisas hemi ansarem olketa olsem, “Mi nao man wea mi talem yufala finis ya

²⁶ Mi garem plande samting tumas wea mi save talem abaotem yufala, an fo jajem yufala long hem. Bat bae mi talemaot nomoa long evriwan long disfala wol wanem mi herem long disfala man hu hemi sendem mi kam. Bikos hem nao yumi save trastem hem finis.”

²⁷ Nao olketa nating minim wea Jisas hemi tokabaotem Dadi ya.

²⁸ So hemi tok olsem long olketa moa, “Taem yufala putum mi San Blong Man antap long kros fo dae, bae yufala save dat ‘Mi nao Mi Stap Olowe’. An long taem ya, bae yufala save nao dat mi nating duim enisamting falom tingting blong mi seleva. Bat wanem Dadi ya hemi tisim mi nomoa, hem nao mi tisim yufala long hem.

²⁹ An hem nao hemi sendem mi kam, an hemi stap wetem mi. Hemi no save lusim mi, bikos mi duim olowe evrisamting wea hemi laekem mi fo duim.”

³⁰ Nao taem Jisas hemi talem olketa samting ya, plande pipol nao olketa biliv long hem.

Laen blong Ebraham

³¹ So Jisas hemi sei long olketa Jiu hu i biliv long hem, “Sapos yufala obeim olowe tising blong mi, yufala barava disaepol blong mi nao.

³² Bae yufala save long tru samting abaotem God, an disfala tru samting bae hemi mekem yufala fri.”

³³ Nao olketa talem Jisas olsem, “Mifala ya, mifala pipol long laen blong Ebraham ya, an mifala nating kamap slev blong eniwan yet ya. ?So waswe nao yu sei bae mifala fri ya?”

³⁴ Jisas hemi tok olsem long olketa moa, “Mi talem yufala tru samting nao, evriwan hu i falom rong wei, hemi barava slev blong disfala rong wei blong hem ya.

³⁵ Man hu hemi bon long famili, hemi save stap olowe long haos blong dadi blong hem. Bat olketa slev ya, olketa no save stap olowe.

³⁶ Nao sapos San Blong God hemi mekem yufala fri, hem nao bae yufala barava fri finis.

³⁷ Mi save dat yufala nao long laen blong Ebraham ya. Bat yufala no laek fo falom tising blong mi, an dastawe yufala trae fo kilim mi dae nomoa.

³⁸ Mi save tisim yufala abaotem wanem Dadi blong mi hemi som long mi, bat yufala duim nomoa wanem dadi blong yufala hemi talem long yufala.”

³⁹ Nao olketa tok olsem long hem, “!Ei, Ebraham nao hemi dadi blong mifala!” Bat Jisas hemi sei long olketa, “Sapos yufala laen blong Ebraham tru, yufala save duim semsamting wea hemi bin duim tu ya.

⁴⁰ Bat yufala traehad nomoa fo kilim mi dae, nomata mi nao mi talem yufala tru samting wea mi herem kam long God. Ebraham hemi no duim enisamting olsem ya.

⁴¹ Yufala ya, yufala duim semsamting wea dadi blong yufala hemi duim nomoa.” Taem ya, olketa tok olsem long hem nao, “God nomoa hemi Dadi blong mifala, an mifala nao barava tru pikinini blong hem.”

⁴² Nao Jisas hemi tok olsem long olketa, “?Bat sapos God hemi barava Dadi blong yufala, waswe nao yufala no lavem mi? Mi nao mi kamaot long God, an distaem mi stap wetem yufala long hia. An mi no kam falom tingting blong mi seleva, bat God nao hemi sendem mi kam.

⁴³ ?Waswe nao yufala nating save minim nomoa toktok blong mi? Hemi bikos yufala no laek fo herem tising blong mi ya.

⁴⁴ Seitan nao hemi dadi blong yufala ya an yufala laek fo duim wanem disfala dadi blong yufala hemi laekem. Olowe nomoa, Seitan hemi save kilim man dae ya, an hemi nating laekem wanem hemi tru bikos hemi nating garem enisamting wea hemi tru long hem. Taem hemi laea long eniwan, hemi barava falom wei blong hem seleva nao ya, bikos hemi man fo laea an hemi barava dadi blong evri laea nao.

⁴⁵ Bat mi ya, mi talem yufala tru samting, dastawe nao yufala no wande fo bilivim mi.

⁴⁶ ?Waswe, eniwan long yufala i save somaot enisamting wea mi bin duim rong? ?Bat sapos mi talem olketa tru samting nomoa, waswe nao yufala no bilivim mi?

⁴⁷ Olketa hu i blong God, olketa nao herem toktok blong hem, bat yufala ya yufala no blong God ya, dastawe nao yufala no laek fo herem hem.”

Jisas an Ebraham

⁴⁸ Nao olketa bikman blong olketa Jiu ya olketa talem Jisas olsem, “Oo, mifala talem tru ya, taem mifala sei yu man blong Samaria an wanfala devol hemi stap long yu.”

⁴⁹ Nao Jisas hemi sei, “Nomoa, no eni devol i stap long mi. Mi haemapem Dadi blong mi, bat yufala tokspoelem mi nomoa.

⁵⁰ Mi no traehad fo haemapem mi seleva. Bat wanfala nao hemi haemapem mi, an hem nao hemi save jajem evriwan.

⁵¹ Mi talem yufala tru samting nao, man hu hemi obeim tising blong mi, bae hemi nating save dae nao.”

⁵² Olketa bikman i tok olsem moa long Jisas, “!Distaem mifala barava save dat wanfala devol hemi stap long yu ya! Bikos Ebraham hemi dae, an olketa profet tu olketa dae, bat yu sei man hu hemi obeim tising blong yu bae hemi nating save dae ya.

⁵³ ?Waswe, yu tingse yu nao bikfala moa winim Ebraham, dadi blong mifala? Hemi dae finis an olketa profet tu olketa dae finis. ?So yu tingse yu hu nao ya?”

⁵⁴ Nao Jisas hemi sei long olketa, “Sapos mi nomoa mi haemapem mi seleva, diswan hemi minim nating nomoa ya. Bat Dadi blong mi hemi haemapem mi. An hem nao yufala sei hemi God blong yufala.

⁵⁵ Bat yufala nating save long hem ya, mi nomoa mi save long hem. Nao sapos mi sei mi no save long hem, bae mi kamap wanfala man fo laea olsem yufala tu ya. Bat mi barava save long hem an mi obeim toktok blong hem.

⁵⁶ Ebraham, dadi blong yufala, hemi hapi tumas from hemi tingim dat bae hemi save lukim taem blong mi ya. Nao hemi lukim diswan finis an hemi hapi long hem ya.”

⁵⁷ Olketa talem hem olsem, “!Maewat, yu sei yu bin lukim Ebraham, bat nomata fifti yia yu nating kasem yet ya!”

⁵⁸ Bat Jisas hemi tok olsem, “Mi talem yufala tru samting nao, taem Ebraham hemi no bon yet, Mi nao Mi Stap Olowe.”

⁵⁹ Long taem ya, olketa lukaotem kam olketa ston fo sutim hem dae nao ya. Bat Jisas hemi go haed nomoa, an hemi lusim Tambuhaos ya nao.